|
Da Rovigo
I Vèneti de Latina
 | | 1935. Laori de bonifica de l’Agro Pontino. |
I Vèneti de la provincia de Latina i xe propio na gran bela comunità, fin da i tenpi del Fassismo, quando ca ghe xe stà, in te i ani Trenta, la grande emigrazion de tanta zente dal Vèneto, dal Friuli e dal Ferarese, partìi a bonificare le palù de l’Agro Pontino.
A bisogna dire che tante fameje (3.200 e tute piene de fiòi), na olta rivà là, i se ga fato la so casa, la stala, la cantina, l’orto, el vegneto e messa la tera in produzion, cavàndola fora a le aque, a le zanzale e a la malaria. “I laorava in mezo l’aqua co la botilieta del chinin in te la scarsèa de la giaca” a me dise Piero. L’è stà on laoro duro ca te slangoriva e te sfiancava.
“Gran laorare ca ga fato, i me veci!” a me dise Lorenzo. “I ga laorà tuti a sangue e gola, poarini!” a ghe zonta Adriano.
“Le xe stà fadighe grande – a me fa Alberto – che gnanca no semo boni de avérghene on’idea. E co sto laoro i ga dà vita a tante contrà e paisi darente a Latina che na olta la se ciamava ‘Littoria’: a Sabaudia, Aprilia, Pomezia, ma in particolare a i borghi de periferia, ch’i se ciama co numi ca ne ricorda la gôera del Quìndese-Disdoto: Borgo Sabotino, Podgora, Piave, Isonzo, San Michele, Montello, e chì, ignonde ca se catemo adesso, Borgo Carso...”
Anca adesso, andando in zo, vegnendo da Roma, na olta passà Cisterna, e ancora de più, vegnendo in su da la provincia de Caserta, piena de scoaze e de desòrdene dapartuto, passà el ponte so ’l Garigliano, el paesajo e le robe le canbia: casete par conto soo, ben messe e co la so recinzion, i filari de vegne, la cantina, el tirazó, la tera de drìo, le sieve, i àlburi e i frutari, i canpi de kiwi e de carciofi, le stale, insuma tuto messo ben e in òrdine, ca te pare de èssare in te ’l Trevisan o in te ’l Furlan, ca te vien da dire: “A so’ rivà a casa!”
L’è na pìcola California, come ca me cunta Alberto, el presidente de l’Associazion Vèneta: orti grandi, casari de “fior de late”, cantine de bon vin, che tanti i vien a cronpare par dopo vèndarlo come se ’l fusse vin napoletan o sicilian; e le tante fameje artigiane, ca se ga industrià e modernizà come da nantri. E tanti ragazi de le nuove generazion, i se ga laureà.
“A go on gran despiazere – a me dise Adriano – parchè gnissun più vole laorare la tera, anca par via de la crisi agrìcola, ca no ciapemo gnanca i schei del somenare. Ma i tenpi oramai i xe canbià. A me ricordo me nono che ’l ghea fato la gôera del ’15-18, e che ’l laorava sodo, come on musso. L’ùnica sodisfazion el jera el vin ca ghe piaséa tanto. El lo bevéa co la scudèa. Anca co la secia lo bevéa, quando che ’l travasava. E mi a go on fiolo ingegnere e na fiola dotoressa, ca fa scuola. Ma la tera, morti nantri de la seconda generazion, i la lassa morire, e gnissun la cronpa.”
Le xe fameje, quele de Latina, ligà tanto tra de lore e piene de nostalgia e de rinpianto par la tera de le so radise, par le nostre tradizion e sora de tuto par la nostra cara lengôa.
Ogni tanto i se cata insieme par far festa: quela del Carnoale, quela del racolto, quela de la ua, e le feste grande de Nadale.
“Parlèo ancora in dialeto in faméja?” la me domanda la Angela.
“Tuti a parlemo in dialeto, da nantri. Dapartuto. Anca a scuola, anca el dotore, anca el prete, tuti a parlemo in vèneto.”
“Che belo! – la fa. – E inveze qua, solo i veci i parla ancora come na olta!”
Par mi l’è stà na gran bela roba, catarme a tola co tanta zente piena de alegrìa e de fraternità, ca me paréa de vìvare i tenpi de na olta, quando che in te on sposalizio, sentà a tola, a se faséa amicizia co zente mai vista, a se parlava co tuti, come ca te li ghissi senpre cognossisti.
Anca el magnare el jera tuto vèneto: antipasto de polenta zala, sopressa e formajo inbriago; bìgoi co l’ànara muta; codeghini, lugàneghe col radecio, salame rosto, e la pinza de Nadale.
Insuma, par farla curta, na festa granda, da no desmentegare.
Tuto orgolioso, Alberto el me dise che la provincia de Latina la xe l’otava provincia vèneta.
E da bon presidente el ga ideà e tirà sù on monumento in una de le tante piaze de la cità: on arco fato de tante taveline in còto co su scriti i cognumi de le fameje nostrane emigrà a Latina: cognumi missi lì senza òrdene alfabético, parchè tuti i possa zercare el so cognome de fameja, lezendo anca i cognumi de le altre fameje.
Quando po’, ca go leto do tre robete in te ’l nostro dialeto, a ogni parola, luri i tornava indrìo co i ricordi e la comozion: “a te dago na rozà de pache (e rìdare) , na cresemà de sberle (e rìdare), na batù da mandarte via gobo, a t’in dago on pasto, na carga, on pelòto (rìdare), on stramuson da roessarte el muso; a te stranbèo, a te roesso come on calzeto, a te verzo cofà na anguria...” e cussì via, tra aplausi e rideste bone e tanta sinpatìa. Par farla curta, a jero in fameja.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vorìa on Nadale par tuti
Savemo che el xe on sogno, ma xe stà dito che el futuro xe suo de chi crede
ne la beleza de i sogni. Par questo se auguremo che el Nadale el vaga ben
par chi crede e par chi lo nega, par chi no vede l’ora che ’l riva e par chi se ne frega,
par chi ga tuto e par chi no ga gnente…
de Mario Klein
Da Rovigo
I Vèneti de Latina
de Gianni Sparapan
Da Verona
Quando èrene buteleti
Al tenpo de la nostra infansia, èrene inpegnà a inventarse zughi e zugàtoli. Stavolta passemo in rassegna on pochi de zughi.
de Wanda Girardi Castellani
|
