|
Ricodi de na volta
“Sior Rino”, el casoin
 | Eco… me par proprio de védarme mi a fare el garzon dal “sior Rino”.
|
Vinti giorni fà, de matina bonora, jero a l’ULS par na visita e me so’ catà sentà rente a Luciano, el me vecio casoin che gheva botega davanti a casa mia. Vecio par modo de dire: el ga solo qualche ano pi de mi, ma vecio par dire che el so mestiere, ’desso, no ’l xe pi de moda. A jera un tòco de tenpo che no se incontràvino, e cussì a ghemo tacà contarse de i tenpi indrìo, quando ne i primi ani ’50 del secolo passà, so pare gheva cronpà la botega dal − quelo sì jera vecio − sior Rino.
El pare de Luciano el gheva messo a laorare i fiòi che ’l se gheva portà drìo: 5 tosati tuti inpegnài, ogniuno co’ le so mansion. Col tenpo, i fiòi se ga sistemà diversamente: chi ga canbià laoro e chi se ga messo par conto suo, versendo na nova botega senpre in sità. Luciano, però, jera restà ne la botega-madre, fin quando, rivà a l’età de la pension, el ga sarà i batenti e vendù el negossio.
Mi a go tacà a contarghe del tenpo passà quando, par drissarme da la poca voja de studiare, me pare el me ga mandà, par un paro de ani, a fare el garzon da “sior Rino”, co’ l’intento de farme capire che laorare, soto paron, jera na s-cianta pesantin. “Sior Rino” el me mandava a portare le spese a le signore; el me faseva guernare la botega, portando sù dal magazin la roba che serviva par stropare i busi ne i scafài; a ghevo da menare la ponpa pa’ inpienare i serbatòi de i diversi distributori de l’ojo che na volta el vigneva vendù sfuso, e cussì par el vin, la pasta, el riso, el sùcaro, la farina e tanti altri prodoti che i jera ne i sachi co la so bela sèssola pronta par torli sù. “Sior Rino” el me voleva anca ben, qualche volta el me portava co lu a pescare: la jera la so passion e ’pena che ’l gheva na s-cianta de tenpo libero, el me diseva: “Viento co mi doman a la diga de Sotomarina o a Caroman a pescare? Dìghelo a to mama che te me vien a fare conpagnìa”, e me mama me lassava ’ndare. Par mi jera conóssare posti novi che ghevo sentìo nominare da chi jera pi sior e che se permeteva sti viaji in istà e ne le grande feste: par mi e i me fradèi jera solo casa e… casa: no ghe jera la possibilità de evadere. Diese jèrimo, pi la mama e el popà e no se podéa fare serto tanti salti. A la fine setimana, el sabo de sera, prima de sarare la botega, “sior Rino” me meteva in man sinquesento franchi, a mi me pareva de èssare un sior e orgolioso ghe li davo a la mama ’pena rivà a casa.
Co’ Luciano a ghemo tacà a contarse come, na volta, el mestiere del casoin, jera ’na roba diversa de ’desso: al supermercato te si solo, col to carelo e in mezo a un fotìo de scafài. Serto che i casoini de na volta i xe sparìi, anca se qualchedun resiste ancora, spece ne i quartieri fora sità o in te qualche paeseto de canpagna. I clienti xe restà solo qualche vecioto, zente de na serta età che, par abitudine romai incarnà, va torse chel poco che ghe serve o parché i xe sensa màchina e no i pol ’ndare al supermercato distante da casa. Altri veci casoini invesse, spece in sità, i se ga trasformà in ”boutique gastronomiche”, roba da siori o da regali par conpleani e par le “Feste Grandi”, gnente da che védare col mezo eto de mortadèa e na ciopa de pan… Po’, la botega del casoin la jera pìcola rispeto al supermarket, la porta la se verzeva a man, el pavimento el jera de matonele come quele de casa: un solo locale, tre pareti de scafali, o dó se ghe jera la vetrina a far ciaro, co raquanti prodoti che solo el casoin saveva trovare. ’Pena drento ghe jera el bancon co’ in bela mostra le balanse, la ’fetatrice, in te un canton la cassa; el casoin, senpre là, pronto de drio al bancon a servirte soridente e magari co l’ultima storiela o l’ultima novità da contare. Solo lu te podéa servire, el te consiliava, el te proponeva l’ultimo arivo; lu gheva l’ultima parola: o questo o questo, no ghe jera alternativa, però, a difarenza del supermercato, co’ lu te podevi brontolare se ’l te gheva tratà male la volta prima, co’ lu se podeva parlare…
Vuto métare ’desso, có te ve al supermercato: te ciapi sù el carelo co ’l scheo, te te presenti a la porta che la se vèrze da sola e la se sara a le spale, davanti a te ghe xe un labirinto de scafài ben ’luminài dove fa bela mostra ogni bendedìo: scàtole e scatolami de marche diverse e robe par tuti i gusti. A volte te te trovi intrigà a trovare quel che te serve e ’lora te toca sercare qualchedun par dimandare dove che xe el vaseto o la confession che te intaressa; tute le to sielte le vien fate sensa sentire nessun, la spesa la deventa na roba personale: te vè ’torno pa’ coridòi, toendo na scàtola par de qua, un vaseto par de là, el sacheto de verdure za pronte, bele che lavà, el sacheto de fruti za pesà, adiritura ’desso ghe xe anca le casse “fai da te”, e te vè fora sensa avere parlà co nessun. Dal casoin, invesse, spece quelo de fiducia (quelo che te faseva credito, che ’l segnava sul libreto, có jera necessario) no ’l se limitava solo a servirte: co’ lu te scanbiavi dó parole, el se interessava de tuti e de tuto. ’Desso, invesse, se va, se fa, se se rangia, se ga perso el gusto de comunicare, de scanbiarse un grassie, un come vala, bon dì e arivederci…
No par èssare pessimista, ma anca questo fa parte del progresso!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara la me fameja…
El tarlo del canbiamento a tutti i costi el continua a rosegare l’istituzion de la fameja. Forse xe ora de passarghe sora na man de antitarlo e farghe on bel restauro conservativo e de consolidamento a sto capolavoro d’arte storico-civile de inestimabile valore
de Mario Sileno Klein
Da la Bassa Padovana
On Santo ne la Bassa
Ricordi de on prete speciale, acoliente de là de ogni confine.
de Roberto Soliman
Da la Marca
I filotadori de San Martin
de Emanuele Bellò
Da Verona
Soride la vita… in poesia
de Lucia Beltrame Menini
|
