Da la Marca

I filotadori de San Martin

Filò d’altri tenpi.

Na sèna rievocativa del filò.

La voga del “come eravamo” e la riscoperta de tante tradission ga fato fiorir in tuta la Marca grupi e associassion che ripropone aspeti de vita contadina de un tenpo, come “I sgrafalopa” che canta e conta le tradission de i bisnenti del Montel, “I fìòi del fiò” de Povejan che tien vive le usanse paesane come el canpanò, “I do storieschi” che presenta el repertorio de musica e leteratura oral e tanti altri grupi anca de cabaret.
Uno de i grupi pi originali el xe quelo de “I filotadori de San Martin” che ciapa el nome da l’antichissima ceseta canpestre de San Martin a San Biagio di Callalta, viçina a l’ostarìa dove che se ritrova i filotadori par le so riunion. I soci i ripropone in maniera rigorosamente filologica la rapresentassion del filò, la veja in stala che fin a l’avento de la television ne i ani ’50 del secolo passà, la riuniva fameje, amiçi e viçinanti dentro a l’unico posto caldo de la casa rural. No xe un spetàcolo ma ’na riunion de amiçi dove che se pratica ancora veci mestieri come inpajar careghe o fiaschi, far sù crìvole, scapinar calse, descartossar panoce, giustar ordegni, e intanto se ciàcola, se conta storie o barzelete, se beve un giosso o se bècola fruti sechi.
Chi vol pol métarse a far i veci zoghi de conpagnìa come el giro de l’oca, tónbola, tria o fileto e tuti i zoghi de carte, come el scarabocion, la giagrega, la concincina, la brìscola ciaciarona o el marcante in fiera.
Se qualcun xe intonà se pol alsar un coro strapaesan e a volte se dise qualche terseto de rosario o se conta storie de vita vera, de naja, de emigrassion, de amor; par i putèi xe pronte fiabe, indovinèi e filastroche tramandàe da generassion. Tuti pol partecipar, veci e zòveni, òmeni e done, siori e puareti, çitadini e canpagnòi che pol zontarse sensa paura a chi xe za in òpara.
L’atività, nata in sordina squasi par scherso a la fine del secolo passà, la ga talmente divertìo i partecipanti che la xe stada riproposta co un sucesso senpre cressente e ogni inverno se tien raquante serate, in casa de fameje private, in locali pùblici, in parochie e parfin drento a 'na cesa sconsacrada.
I canti eseguìi in maniera coral e spontanea i xe stài racolti in un volumeto e anca le storie, par la magior parte legende o raconti de figure fantastiche provenienti da i ricordi de i veci i xe drio formar ’na vera antologìa che vegnarà publicada tra poco.
Tra le atività recuperàe el gradimento pi grando lo ga avùo la produssion manual de zogàtoli, come cavalini, aeroplanini e caretini realizài co canoti de soturco e piagolete fate co scartossi de panoce o torsi de fruti, fionde, archi e racolete ricavài da legni de piante selvàdeghe.
In seguito a le tante richieste ricevùe i filotadori i ga deciso de ripréndar ogni rapresentassion in video par realizar de i CD in modo da lassar 'na documentassion etnografica conpleta de una de tradission pi antiche de la cultura contadina che la confluirà ne l'archivio del Gruppo Folcloristico Trevigiano che da squasi mezo secolo el mete via le testimonianse de la vita popolar a futura memoria.

[torna sopra]