Da la Bassa Padovana

On Santo ne la Bassa
Ricordi de on prete speciale, acoliente de là de ogni confine.

Don Giuseppe Pavanello, “un vero sacerdote di Dio”.

La tonba de don Giuseppe, senpre somersa de fiori freschi, tel pìcolo cimitero de San Salvaro.

A fine novenbre de st’ano, a ghe xe el nono aniversario de la sconparsa de don Giuseppe Pavanello, pàroco de San Salvaro de Urbana par 38 ani, dal 1967 al 2005, che par tuti coéi che lo ga conossù el jera on Santo, parché tanti i xe stà i episodi straordinari, ligà a don Giuseppe, sia in vita che dopo la so morte.
De don Giuseppe, a ne resta el ricordo de la so acolienza e conprension, e de na vita oferta a tuti, co ’l so soriso, on poco amaro par le soferenze de i altri, che ’l ga fato sue.
Na vita oferta, coela de don Giuseppe, a la so comunità prima de tuto, curà seguendo le tradizion pastorali del caro vecio clero veneto, a la cura de la gente e de le associazion, a l’educazion de i zóvani verso valori che semo drio desmentegarse. Ma na vita dedicà a tante altre persone che lo zercava da fora parochia, da fora diocesi, da tuta Italia.
Sì, parché rivava, a San Salvaro, gente anca dal Sud, de note in coriera, par èssare pronti a la matina par ricévare na parola bona, na preghiera, na confession. El passa parola el gavéa slargà la so fama de “curatore” del spirito, al punto che el ga dovùo limitarse a on giorno a la setimana par ricévare sta gente.
El se dedicava a tuti: malà, toseti, anziani, malà in tel spirito; el faséa anca nar via el “maligno”, con autorizazion del Vescovo, con gran sforzo fisico e mentale. Ma don Giuseppe el jera nato e el ga vivesto da prete fin in fondo a i so giorni.
A i malà, in particolare, el ghe dedicava tanto. A ghin sò calcossa mi ca son stà ricovarà par coatro mesi in ospedale a Verona par ’na Leucemia acuta, e che na serie de conplicazion le me ga portà in fin de vita.
I dotori me lo ga dito dopo, anca parché i se daséa on gran da fare par tentare de salvarme da sta situazion, ma senza risultati. Anca mi a me rendéa conto ca non a ghe la gavarìa fata a guarire e vedéa tuto nero da la disperazion. Scherzando adesso a digo: “Par fortuna che San Piero, a chei tenpi, el jera inpegnà par le riprese de la publicità del cafè Lavazza e alora i me ga mandà indrìo!”
In ospedale i me ga messo in càmara da solo, me mojere la me faséa assistenza, i infermieri e i dotori i jera senpre lì a controlarme e a provare on mucio de medezine, ma coasi par gnente, fin che me fiolo el me ga portà don Giuseppe. Alora el jera za malà, el caminava col baston, ma el xe vegnù istesso a catarme e a benedirme.
A me ricordo poco de coéi momenti, ma sò che a ghe go dito a on dotore, co on filo de voze: “Coel prete lì el jutarà anca valtri par guarirme!” A me ricordo anca che go scomizià a védare na luce de speranza e che dopo na setimana a go scomizià a riprèndarme e che i dotori i jera pi contenti de mi!
Ma don Giuseppe, dedicàndose massa a i altri, rancurando le soferenze de tuti, no ’l curava el so fisico che ’l naséa senpre pi indeboléndose par male al cuore e a i polmoni e a altre conplicazion. On serio intervento e ricoveri in terapia intensiva e in riabilitazion i lo ga portà a la morte el 29 novenbre del 2005, in ospedale a Este.
Al so funerale, in te la cesa de Casale de Scodosia, paese indo’ ca l’è nato, a ga partecipà pi de 3.000 fedeli, da tuta Italia, che in parte i ga seguìo la messa so ’l schermo gigante in te ’na sala parochiale. La triste cerimonia la xe stà tegnùa da mons. Antonio Mattiazzo, vescovo de Padova, con ’na otantina de preti che i ga concelebrà.
Don Giuseppe el riposa, par ’so volontà, in te la freda tera del pìcolo cimitero de San Salvaro, paese che el ga servìo par 38 ani. La so tonba la xe senpre piena de fiori freschi e, in te na balarina, a ghe xe senpre preghiere e messagi, par don Giuseppe, che el pàroco de ’desso, don Adriano Vigolo, el rancura e el manda, insieme a le testimonianze de guarigion, o de fati inspiegàbili ligà senpre a don Giuseppe, al Vescovo par scomiziare la “Causa” par la beatificazion!

[torna sopra]