|
Da Verona
Calseti desconpagnè
 | Ghe digo se la ghe dà na passadina ai travi sospesi del saloto con la spassaora ‘telescòpica’.
|
Cato dal caso la me amiga sul Liston. La me abrassa, la me basa, la me strapega dentro un bar, al caldin, davanti a na ciocolata broenta. La me par un fiantin sbatùa e ghe domando come la stà.
“’Desso no ghè maleto” la me risponde “ma ò ciapà na sassinada con le pulissìe de i Morti. A la fine la casa l’era bela lustra e mi conpletamente derenà.”
“Marisi,” salto fora mi, “feto i mestieri de grosso anca a i Morti!”
“Par fortuna” la me ribate de paca “senò gavaréa rimesso un mucio de euro de regài.”
No capisso el colegamento. La vardo ben: la ga i oci fora da le òrbite e no sò mia se l’è par via del truco o parché l’è fora de testa.
“Cossa te intèndito?” me informo mi.
“Che anca staolta l’è colpa del me omo che no ’l ghe bada a massipar e sfrajar schèi a tuta maneta.”
Par mi l’è deventà mata. Qua bison ciarir la facenda prima de ciamar el 118. Fao par vèrzar boca e seitar l’intervista, ma no ghe n’è de bisogno parché la taca a contarme ela.
“Donca, za a i primi de novenbre penso a cossa posso regalar par Nadal e decido che a me marì ghe conprarò 15 para de calseti de tuti i segnati, dato che, quando ò fato el canbio de stajon, me son catà che el ghe l’avéa quasi tuti desconpagnè. El s’avéa reduto con un calseto curto griso, un altro verdo, un altro ancora pana, uno de longhi maron, uno curto e uno longo blu, tri de neri, ma che no se podéa conbinar parché uno l’era longo, uno curto e el terso de lana, da montagna, du de longhi bianchi, ma uno ‘tècnico’ da moto e quel’altro senpre bianco ma da ginàstica... Mi ò sercà dedrìo la lavatrice, ò rumà inte i so calti, ò controlà dentro tute le so scarpe, i mocassini, i stialeti, i sàndali, i sòcoli, le savate e parfin le infradito. Ma gnente da far. L’era un mistero. Alora me son pensà de ciamarme na dona che la me aiutesse a rebaltar la casa par védar se ghe ne saltàa fora almanco qualchedun de quel fraco che mancàa a l’apelo. Avemo laorà par na stimana come dó scalmanè, udando armaroni, mòbili e scansìe, destacando quadri, alsando tapeti, spostando vasi sul pogiolo, dispiegando nissói, tovaje, sugamani… Avemo perso un giorno intiero a scalumar el sgabussin ’ndo el ga tuti i so atressi, dopo averlo mandà fora de casa con na scusa par no avérghelo tra i pié in quel delicato momento. Insoma ‘il mistero rimaneva’.”
“Gavìo i fantasmi che gira par casa robando calseti?” ghe scherso sù mi.
“Bela” la ritaca ela “varda che semai i roba nissói. Eto mai visto un fantasma co i calseti?”
Son veramente preucupà. La vede parfin i fantasmi descalsi. Insoma, bison nàrghene fora.
“Ma” ghe buto lì con prudensa, parché i dise che co i mati ghe ocor un certo sèsto, “come èla nà a finir?”
“Vuto saver come l’è nà a finir?” la ritaca ela fulminàndome con n’ocià.
“Sì, me godaréa saverlo” ghe rispondo con el tono de un agneleto che sbègola par no inervosirla.
“Donca, roersemo la casa come un... calseto. Prima de liquidar la dona ghe digo se la ghe dà na passadina ai travi sospesi del saloto con la spassaora ‘telescòpica’. De pólvar no la d’à cata sù gnanca na nina, ma in conpenso à tacà a pióvar calseti a buso e tuti desconpagnè. Meto me marì soto interogatorio e ghe vien in mente che st’istà, fin che mi s’era in montagna, lu l’avéa dormìo sul divano con la finestra verta…”
“E ’sa vol dir...” ghe domando mi.
“Che era vegnùo dentro in saloto un pipistrel e che lu, par diverse sere, l’avéa sercà de pararlo fora, tiràndoghe drio i calseti che el gavéa a man!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Da Rovigo
La Svetlana, badante de fiducia
de Gianni Sparapan
Da Verona
Calseti desconpagnè
de Giacinta Dall’Ora
|
