Quatro Ciàcoe - La Togna e Filipeto - Dissenbre 2014

Quatro Ciàcoe
Mensile de cultura e tradission vènete

de Antonio Maraschin

El raconto del mese, in visentin

La Togna e Filipeto

… no la gavéa pi catà la cioca con i pulsinèi fin che ela jera in càneva.

Lu, pìcolo e magro incandìo, el pesava ’pena qualche eto sora i trenta chili. El savéa fare solo un mistiero: menare la cariola.
La Togna no la gavéa le fòrse par urtare la cariola, ma la gavéa inparà fin da pìcola, a nare in bicicleta, na bicicleta da omo, pescà a na sagra de paese. Ma la lo faséa in un modo strano: la man sinistra tegnéa el manubrio e la destra tegnéa la sela. La pedalava con dó ganbasse rosse e grosse ’fà du mas-ceti da late. Le ganbe, causa la bicicleta col palo, le mostrava fin le mudande che, par fortuna, le ghe rivava al zanocio. La jera na dona forte, mai non la gavèa ’vudo gnanca un rafredore, solo da putela, la tosse canina. La Togna però la gavéa un bruto vissio: la bestemava come un turco e non la voléa savérghene né de santi né de madone. Rento le porte de la cesa la ghe jera nà, par forsa, solo quando la ga sposà Filipeto. A i so tenpi la jera un scàndalo par tuto el paese.
Chi lo gavaria dito? Quando la ga distirà i ossi, al so funerale drio la bara a piè, caminava solo el prete col canpanaro. Par ela diséa su qualche rechie solo don Prosdocimo, che mai la gavèa vista in cesa, e no i lo gavéa gnanca ciamà par darghe i oji santi.
Quando xe mancà Filipeto, morto pi par le fadighe che par un vero male, drio la so bara portà a spale, ghe jera tuto el paese e l’Assion Catòlica ghe gavéa oferta anca la bela ghirlanda. Quando par le strade del paese xe passà el so funerale, tute le porte jera sarà e òmini, done e tusiti, tuti drio la bara, gnanca la fusse na procession, e tuti jera convinti de conpagnare al simitero non un omo del quale gnanca i conosséa la vosse, ma poco manco de un santo e la canpana da morto la ga sonà tanto a lungo da pensare che tuto el paese fusse colpìo da na gran disgrassia, tanto che, anca se jera alto el sole, no te sentivi zolare na mosca.
De casa, na mèsa barchessa, i stava a mèsa costa e na mura separava la corte e la casa da la strada. Drio chela mura jera nato un figaro salbego che Cristo gavarìa maledìo perché no ’l faséa fruti. Ma chela strada non avendo quasi mai gnanca un passejero, na volta che un poro vecio che nava con la sporta par carità, el se gavéa fermà par spàndare aqua, non lo gavesse mai fato! La ghe xe corsa drio, smenando la scoa e, ostiando, la lo minaciava de denunsiarlo a i carabinieri.
Filipeto, con un saco de sorgo vegnéa zo in paese dal munaro. La cariola, che la gavéa inparà da la parona a sigare, la misurava la strada, nando de qua e de là, fasendo suare sete camise a chi la urtava. Có ’l rivava in corte, tanto sfinìo da rabaltarse, el dovéa rèndare conto a la mojere che proprio alora la vegnéa da la staleta o dal punaro dove la palpava le galine par savere quanti uvi le gavesse da fare quel giorno. Na volta però la gavéa sigà fin a sentirla zo in paese, perché no la gavéa pi catà la cioca con i pulsinèi fin che ela jera in càneva.
El pi de le volte, Filipeto rivà in corte, anca ciamàndola par savere dove svodare el saco, inbriaga, la ghe sbraitava drio, acusàndolo de aver bevù meso vesolo, quando lu, poro can, el vin gnanca lo sajava, e la ghe sigava drio “poro can” o “poro sanbelo”.
La casa che la Togna gavéa eredità da i so veci, la se conponéa de du stansuni, uno sora chealtro. In cusina un gran fogolaro e na tola che gavéa za paerso na ganba e tuto el dì rento no ghe stava che luri du, sbraitando ela e muto lu.
Tusiti no i jera vegnù al mondo e fursi el Signore ben el gavéa visto come non i podesse èssere mantegnù e educà da chele dó pore figure. In tola, se no le jera patate, verze o siole con mèsa feta de coessa, non mancava un fiasco inpajà de vin moro recioto; ben inteso senpre par man de ela. Lu, se ghe nava par traverso un bocon, el dovéa torse un goto de aqua dal seciaro.
El solaro de la càmara jera pien de busi tanto che na volta ela ghe gavéa infilà na ganba, tirando infurià quatro besteme, e Filipeto jera nà in prestio de tole par stropare i busi. Non parlemo de l’inverno o se par disgrassia pioveva: du veci pitari e siè bussoloti de conserva “Muti” jera pronti drio el muro.
La corte jera in pontara e par quelo senpre con tante punte de sassi che spuntava aposta par intrabucarte.
A la càmara de sora te navi su par na scala posà al muro e quela non jera solo na camera ma anca un granaro. El leto matrimoniale, con i pajuni de scartossi che lu ogni matina dovéa ramenare, sofegando par la pólvare, da na parte el se gavéa sbassà tanto da posarse sul solaro. Jera la parte dove dormìa ela. Non la faséa tenpo de butarse, tanto in freta la ronchisava come na canpana rota. Lu el se ramenava par ore intiere a contare i cupi discoerti. Quando però, stufo e sfinìo, el ciapava sono, ’lora la jera na vera disgrassia. El rodolava sul leto fin a catarse ’dosso de ela. Alora se scaenava el finimondo: la ghe molava a tuta forsa na peà e du scufioti par voltarghe sùito dopo el culo pa tornare a ronchisare.
Questa jera la storia de la Togna e de Filipeto, ma, par fortuna, de altri tenpi.

[torna sopra]

Archivio

2022