Quatro Ciàcoe - Galileo galinaro, ladro e busiaro - Dissenbre 2014

Quatro Ciàcoe
Mensile de cultura e tradission vènete

de Vittorio Ingegneri Dinerio

Le storie de Dinerio

Galileo galinaro, ladro e busiaro

Rivà in frontiera de Chiasso co’ raquante steche de Malboro…

− Aristide, feme un ben, go bisogno de tacarme a vu par un strapon fin in cassa malatìe. Stamatina i m’à robà la màchina de me fiolo fin ca gero parchejà davanti al fornaro e so’ restà a piè de bruto. Go ’ncora un tremasso ’dosso ca no so’ bon de pacificarme.
− No stè gnanca parlare, ’Genio, go da ’nare in piassa pa’ i fati mii e ve molo zo propio denansi a i anbulatori e, s’a me disì, có vegno volta, ve togo sù fin casa.
− Sti ladri foresti ca xe rivà qua in barcon ’famài da Paesi distanti, sensa arte né parte e co’ poca voja de laorare, i cardéa catare la Mèrica qua da noaltri e sensa farse sù de màneghe ghe fa strada un fià de tuto. De bicecrete e motorini i fa man bassa ogni dì e intanto i studia el colpo grosso de sgranfignare na bela màchina da inbarcar de sfroso verso i paesi da gnonde ch’i xe vegnesti, fasendo tòchi de la targa a le svelte. E no insuniarse de molare in tabacarìa, incantà da i smelensi de na bela tosa al banco, el telefonin o i ociài, lassàndoli par on àtimo in calche posto, sinò i sparisse soto i oci.
− Ghe ’ndarala senpre drita, me domando mi. Gavemo da paìre ancora par tanto sti manigoldi ca vive de robarìe, de birbantade a man armà, de smercio de droghe mortali, o come paponi, de putanessi drio le strade?
− Secondo ti, barba, tuti sti imigrài xei un péso dabon pa ’l nostro Paese?
− No posso darghe torto a ’Genio, ma mi no la penso come lu. Pitosto, caro fiosso, cade che l’Europa ne juta a ciapare in man sta patata scotenta, dato che le nostre coste mediteranee xe na porta spalancà par tuti. De le volte me vien on strucon al core có vedo serte sène in television de sti desperà inbarcài su carete de tola ch’i riva sfinìi e a pochi metri da la costa i se buta in mare par èssare pi sicuri de farla franca, invesse pi de calchedun se nega. Ghe sbiro mi, quisti xe fati seri ca ocore métarghe on fren! Chissà ch’i lo capissa anca chi ne governa. E ’lora se in giro par l’Italia sti foresti fa malani, i roba, i ’salta noaltri vecioti in casa, par torne ste quatro palanche de pension o pa ranfarne la colanina al colo, come ghemo da conportarse se i lo fa par magnare? Pa ’l momemto risposte serie no ghe ne sento, anca s’a no credo che i sia tuti delinquenti. Có jero bocia mi, crédito ca no ghe fusse ladri? Ghe ne jera e come! Solo ca se vegnéa a saére da radioscarpa che uno jera fenìo a i stari parché el gavéa svodà ponari. E gnanca ’lora se tratava de bricuni farabuti, ma de sojeti ca ghe n’avéa na supa de trìboli e de scagabordi pa ’verse salvà la sghirba da i bonbardaminti, da le canonàe o da i rastrelaminti republichini. Co’ sto discorso te m’à fato vegnere inamente on serto Galileo ca staséa da le nostre parte, soranominà galinaro pa ’l so vissieto de ’nare de ganso. Mi me lo ricordo ben parché el vegnéa fora da na fameja de storari rente casa nostra. Lu gavéa calche ano pi de mi e fin da bocia el xe stà on malabiato trascurà da i brodi. Sicome a i sui ghe mancava el pan in tola pa sborfire, me pare ’ncora de védarlo, sto strasson naséa in volta tuto strafantà cofà on sìngano. L’à inprimà vestiti on fià a la manco pèso có ’l xe stà in vareso, ossia da quando el ga scumissià sgrafare calcossa in giro pa ’e corte de massarioti. No te digo có ’l xe deventà on quajoto, el se stimava pi de na vaca squinsi, ’vendo tacà presto a doniare. Medigo che ’vanti catare quela justa da maridare el ghe n’avarà passà pa ’l so colin da brodi almanco na senquantena. Ciò, el la voléa fresca al late e miele e po’ el se lavava la boca in giro co’ quei de la so leva che par lu la fémana mèjo ca ghe fusse la jera quela de i altri. Infati ghe piaséa assè farghe la tira a le sposete de mèsa vigogna, quele ca gavéa sposà on papussa, sinò a le bigarele ca se ghéa tolto on panpalugo par moroso. Però sto inbussoladore el s’à lassà inbaucare da na limèga al late e fiele: altroché al late e miele! La jera on cauterio de belessa, longa e s-ciava, co’ ’pena on fià de petorina spanìa sol davanti, ma piolìa dadrìo, insoma na pevarina seca cofà na caràbola, na stimaciona che in banda a lu i faséa l’articolo “il”. Però la jera fiola ùgnola de zente ca gavéa del suo e, cognossendo le so idee furbastre, sicuramente lu la ga sposà par l’intaresse. Prova ghe ne sia che ’l xe ’ndà stare da capelan in casa co’ i sui de la mojere, pa’ no ’verghe pensieri nel métare suso la pignata e soratuto pa’ poder mèjo tèndare i so loschi bàgoli, s’intende no pi da ladro de polame, ma da contrabandiero. Intanto a jèrimo rivà a i ultimi giorni de spaga del 1943, drento e fora da i refuji, tuti co ’l sangue in scarsela par via de le cuche ca sonava có i sentìa ronzare in lontanansa s-ciapi de bonbardieri o magri inspirità da i bengala e da le caramele ca ne descartossava Pipo ogni note. Pènsate ca mancava poco a l’8 setenbre, data de l’armistissio de l’utima guera, quando go visto co’ i me oci soto mezodì on reoplan maledìo rivare a bassa quota, metraliare e massare me pora amia Carmela che la vegnéa sù da la ranpa co ’l cariolon cargo de la bugà, ’pena rasentà in canale. ’Vanti la ritirata de l’armada tedesca ghe n’è sucesse de tuti i stufi. Na sera a l’inbrunire xe capità in corte da noantri on uficiale tedesco montà sora na carossela, conpagnà dal so tirapiè. I ga molà la moto soto el pertegale, i xe nà in stala, i s’à tolto du bo da timon e i li ga tacà a on caro dove i se gavéa cargà on casson de patate, on saco de fasòi sechi e la vecia màchina da cùsare, quela che me nona se rangiava a taconare le braghe de fustagno de me nono o a reoltarghe coli e daman de le so camise de fanela. Da la pressa de scanpare i cruchi se ga desmentegà de tòrse sù la moto e no i s’à pi visti. Chel sacramen de Galileo no ’l s’à intardigà a scóndarla t’on pajaro fin ca fusse passà la borana. Dopo on paro de ani, có jèrimo za stà libarà da i mericani l’à tirà fora sto trabìcolo rùzene, el se l’à messo in órdane e l’à tacà viajare come turista descantà, cargando so mojere in carossela. Le palanche no ghe mancava pa’ i so tràfeghi loschi, ma lu mirava sotoventovìa a portare drento da la Svissara sigarete de sfroso, che da noantri le faséa gola dopo na guera persa ca mancava de tuto. Fato sta che on bel dì, vegnendo volta rivà in frontiera de Chiasso co’ raquante steche de Malboro sconte t’on sacheto soto le ganbe de so mojere, le guardie, ispessionando el cariolo, i s’à inacorto del fagoto e i ga dimandà cossa ca ghe jera drento. E sto finton co ’l so muso roto ga risposto che ’l gavéa cronpà de le spezanele pa’ i polastri. Ma ormai desquerta la scondagna el s’à sentìo co’ le buele in man, però no ’l s’à perso d’ànemo, el se l’à cavà, inventando che lu spargujava sto mangime drento el serajo del polame, sperando che incuriosìo da sto magnar foresto, el tachesse sbecotare. La so sparada cussì bufona ghe l’à fata passare lissa.
− Barba, te si propio un posso de cavatine storiche, ma de quele spassose!

[torna sopra]

Archivio

2022