|
Da Rovigo
La Svetlana, badante de fiducia
La vita la xe piena de sorprese. Cussì tante, che a ben pensarghe la realtà la xe più grande de la fantasia, siben che la fantasia la viaja in longo e in largo. E la te dà delusion ca te brusa più del fuogo.
Scoltè questa, che la pare inventà. A na fameja de Ravena, na diesena de ani fà, a darghe na man a starghe drìo a i du veci de casa, a se ga presentà na ragaza de la Moldavia de nome Svetlana, bela come no so dirve quanto: bionda e ben fata, oci celesti, soridente, gentile e premurosa.
Mai na olta che la se gabia lamentà, e mai che la se gabia profità. Senpre al so posto, la jera pronta a fare e servire, che te podivi domandarghe questo o quel piazere che ela la te lo faseva sùbito, e senpre col soriso in boca. Insuma, la jera na gran cara persona, e de ela a te te podivi fidare in tuto e par tuto, da farse benvolere da la fameja che la ospitava, ma cussì tanto i gheva dà tuta la so fiducia e anca el so afeto, da tratarla come na parenta o na amiga. Insuma la jera una de fameja. Questo, fin a Nadale. Quando che la Svetlana, par passare le feste a casa soa, la ga domandà el mese de le ferie e anca el pagamento de tute le so spetanze, par via che la ghea de le spese in Moldavia. E anca par rengraziare la fameja, la ga dito che la voléa farghe on regalo: na torta a la usanza moldava da magnare el dì de Nadale, in onore soo de éla. E za che la baucava, la ga dito se la podéa fàrsene una anca par ela, da magnare durante el viajo de ritorno. Che gnanca a domandarlo, i ga dito de sì.
E alora la Svetlana la ga fato le dó torte e po’, preparà la so valisa e insacà i schei, on baso a questo e on baso a st’altra, la ga dà sta torta e po’ la xe partìa, dassando i veci pieni de comozion e de làgreme ca ghe rigava el viso.
On paro de giornate dopo, ca jera Nadale, i ga tajà sta torta. Na sorpresa che de pi no se podéa. A xe vegnù fora na diesena de fagotini che sti veci i ga pensà èssare de i regaliti de la Svetlana. E alora vèrzi sti fagotini e drento i ga catà, in te uno, la colana de la vecia, in te nantro le bòcoe, in te nantro i tri anèi, e po’ la colanina de le putine, el bracialeto de so fiola, la colana co i rubini, la spila col diamante, el braciale del zènaro e parfin le varghete de i so veci: insuma, drento a la torta a ghe jera tuto l’oro de la fameja.
I xe restà tanto male, sta zente, che dal despiazere, gnanca no i xe ’ndà da i carabinieri a denunziare el fato. Ma la sorpresa più grande la ga abù la Svetlana, quando che in coriera la ga tacà a magnare la torta, che par quanto che la fusse bona, propio no la ghe ’ndava zo par el gargato.
[torna sopra]
|
