Editoriale

Caro Nadale, quanti problemi!

Ano dopo ano, ritorna el momento de farse i auguri de serenità, de bontà, de giustizia, de fradelanza, de ugualianza, de pace so sta Tera, ma senpre ne toca védare che, al contrario, continua a créssare la gramegna de la cativeria, la preocupazion del vìvare, la paura de i atentati teroristici… de ultima generazion. “I casi sono due” diséa chel tale: o la storia la xe na cativa maestra, o i scolari i xe de i mussi patentà, inparentà co l’oco che magna e desméntega, ’bituà a insaorire de scaraboci el coaderno a righe de bela copia de la vita.
L’omo el vien al mondo pianzendo, el trìbola on pasto a vegner grando, el se sderena fin che ’l deventa vecio e, prima de tirar le lache, el se n’incorze che ’l ga sbalià tuto. E pensare che ’l sarìa nato par godere el dono de l’esistenza e inveze in crivelo ghe resta a la fine, sì e nò, coalche frégola dolza.
Bisogna pur pensare de inventarse calcossa parché no la sia senpre tenpesta.
Questo alora xe el momento pi adato par inpegnarse a versare le nostre pìcole bone azion te la musina del mondo. Forse le sarà frégole, la sarà moneda, ma se lo femo col cuore, magari de scondon e senza sonare le canpane, xe come se ghéssimo vendù la casa e i canpi par ’jutare qualchedun.
Eco, caro Nadale, te domandemo de insegnarne a fare chel poco che femo con umiltà, senza spetarse che qualchedun ne diga “bravi”. Cussì, no se contentaremo solo de domandarte de risòlvare i problemi del mondo, che proprio ’desso i xe veramente tanti, ma podaremo dire de avere fato calcossa anca noantri par miliorarlo.
Par questo, caro Nadale, intorno a ste parole, te vedi tante bele face, tanti sorisi de done e òmani che generosamente i ga dà el so pensiero, el so tenpo, la pazienza, la professionalità, i ricordi, la memoria, la cultura e calcossa altro, parché se possa oncora crédare in quei valori che, ano dopo ano, ne ga fato desiderare che possa rivare Nadale, co la so luce, la so bontà, la so verità. Par questo se disemo e ghe lo disemo a tuti:
Bon Nadale!

[torna sopra]