Da Lendinara (RO)

Nàssite

La festa più inportante de l’ano la xe a le porte…

A son vegnù inte sto centro comerciale pien de boteghe par zercare da sodisfare un desiderio ca me xe rivà…

Sto Bambinelo el xe vegnù al mondo par iluminare l’umanità sul sentiero pien de sassi ca porta verso el ben.

La festa più inportante de l’ano la xe a le porte e come senpre la zente se riduse a fare le corse, in zerca de l’ultimo regalo, de la decorazion originale par inpreziosire la tòla natalizia, del vestito, de la scarpa o de l’acessorio giusto par ravivare le solite quatro straze. La tentazion de darghe un tajo a tute ste abitudini che, par quanto le sia l’espression del nostro èssare “terreni” le ne stravia un fià da quelo ca xe el vero spirito de la celebrazion, la xe senpre più forte ogni ano ca passa. Ma ghe xe i parenti, i amighi e soratuto i putini da contentare; la socetà stessa la ne inpone regole a le quali xe inpossìbile sotrarse e un bon cristian el xe quelo ca riesse a inmedesimarse intel sentimento profondo de na nàssita cussì miracolosa.
Vegnendo a mi, gnanca sto ano a me son organizà par tenpo, forse par mancanza del medesimo o forse par scarsa bravura, fatostà ca son qua, stufa agra, inte sto centro comerciale pien de boteghe par zercare da sodisfare un desiderio ca me xe rivà par interposta persona. L’insegna de la "Toilette" la me invita a sodisfare un bisogno trategnù co’ ostinazion; decido ca xe mèjo aprofitàrghene prima da métarme in màchina par tornare a casa.
Come tuto el resto, anca qua l’anbiente el xe belissimo e ben tegnù; no’ ocore fare la cóa parchè no’ ghè nessuno, a parte na dona zóvane assè de nazionalità sudamericana, cunzà inte un modo più che equivoco, ca va verso uno de i tanti bagni. No’ gavarìa mai pensà de trovarme inte na situazion cussì delicata oltre che inbarazante! Difati ’pena che la sara la porta a sento versi strani, ràntoli e lamenti che su le prime i pole far pensare a esagerate conpricazion riguardo a zerte funzion corporali. A fago in pressia, pensando da ’ndar via el prima possibile par na forma de rispeto a la so “privacy” che forse la sarìa conpromessa da un eventuale incontro intel coridojo dove ca xe i lavandini, a robe finìe, anca s’a no’ se conossemo. A son su la porta quando ca sento el tonfo de qualcossa de pesante ca casca inte l’aqua, intel silenzio tonbale, a pochi metri dal bacan del viavai de i clienti. Dopo avere bussà senza otegnere risposta, un sospeto, anzi, na torva sicureza, me fa decìdare de ’ndare in zerca de aiuto par sta dona che però la ga za fato pèrdare le trace.
Pur avendo, poco dopo (dal personale incaricà), la conferma de la gravità del fato, senza tante publicità tuto pare tornare come prima. A continuo a ripètarme che s’a me fusse intajà in tenpo la facenda la gavarìa ciapà n’altra piega. ma sò anca quanto ca sarìa stà difìzile, par no’ dire inpossìbile, tentare in extremis da sbararghe la strada a un destin za segnà. Inutilmente a provo a mandar via da la testa zerti pensieri, penso a l’amore che na dona la dovarìa sentire fin dal primo frèmito de vita e a la soferenza ca conpagna zerte situazion, sielte o soportà. Penso a la solitudine, a tuto l’amore ca manca, a le conseguenze del vìvare senza valori. A xe cussì ca continua a ’ndare el mondo, co’ le so violenze, ingiustizie, diriti sbandierà solo a parole e la storia la se ripete, convinzéndone che el gènare umano forse no ’l canbiarà mai.
Torno verso la me casa carga del peso de amare fantasie su na creaturina senza colpe, ancora massa tènara par sopravìvare senza assistenza, e no’ me consola el pensiero ca xe mèjo no’ nàssare inte sto mondo cussì sbalià. A seguo idealmente i passi de na mama mancà e imàgino tuto el turbio de la so fresca età. A l’inproviso le luci le se smorza tute insieme e no’ go più voja de gnente. Ma, ancora na volta, no so’ bona da resìstare al bisogno, a la tentazion da crédare che el Sacro Bambinelo el sia vegnù al mondo par iluminare l’umanità sul sentiero pien de sassi ca porta verso el ben, inte un mondo senza miserie umane; ancora na volta, el sarà un augurio sincero e pien de speranza. Bon Nadale!

[torna sopra]