Da Adria (RO)

Le nostre palanche

Palanchine, vintini, colonbine e AM-lire i è deventà roba da colession.

Parlare de palanche adesso ch’a ghemo i euro, a pare de tornare a i tenpi de Barbasucon Suchela. Epure quìi del mi andare i à doprà palanche, vintini e colonbine, oltre che le lire, ch’a ghe ciamàmavino franchi. La doménega, quando ch’a portava ancora le braghe curte, mi pare el me dava la mi manceta na volta a la setimana. Mi, a i dì de festa, dopo la “messa del fanciullo”, quela de le oto e mèsa, andaseva drito in via Pignara dove mi padre el gheva la so botega de biciclete. A chi tenpi la doménega matina tute le boteghe le jera verte fin a mezzogiorno, sia quele ch’a vendeva chelcossa che quele artigiane. Rivà su la porta, come che mi padre el me vedeva el saltava sù co l’aria de torme in berta:
“Oh, jeto chi? Com’ela? Sensa tuta? A ne te ga mina voja de lavorare stamatina?” E mi, vardàndolo co na serta aria de conpatimento:
“Ma valà, papà, l’è doménega anquò.”
“Ah, adesso ò capìo: Buffalmacco a Calandrino gioca un tiro molto fino e sor Pampurio è arcicontento d’esser qui per sfollamento… (le gera filastroche del Corriere dei Piccoli, per farme capire che ’l saveva quelo ch’a volevo) Toh, valà, vien chi: eco la to manceta, va’ pure a torte el to giornalin.” E po’ el me ciapava pa ’l viso e se dàvino na sfregadina de naso contro naso, meténdose a ridere tuti dó. E mi dopo andavo drito da Pésse, a l’edìcola sul ponte de Castelo par torme el Corriere dei Piccoli de chela setimana, indove apunto catavo Buffalmacco, sor Pampurio, Bibì e Bobò e Martin Muma più leggero di una piuma. E con poche palanche me passavo el resto de la matina a lèzere le aventure d’i mi eroi preferiti.
Quando po’ rivava el dopodisnà, verso le dó e mèsa, se ’ndava tuti a dutrina in cesa vecia. Raquanti s-ciapi de banchine, uno p’r ogni classe, i ne spetava insieme a la mestra de dutrina e a Gildo, ’n omo che, a nantri piocari, el ne pareva ansian, ma el sarà rivà si o no a quarant’ani, che ’l faseva na spece de sorveliante. Fenì la dutrina, ciapà la benedission in cesa granda, i ne daseva un bilieto de ridussion p’r andare al cinema Ferrini, inte la piasseta tacà a la piassa granda, cussì, anca qua, co poche palanchine podìvino gòderse Tomìche, Ridolini, Sarlò e conpagnìa. Ma prima d’andare in teatro tuti i se pressipitava da la Stela par torse qualche golosesso da smagnussare intanto che la pelìcola l’andava avanti: brustoline, carate, pumi col melasso, bagige, fava luìna e d’inverno anca castagne aroste. Tuta roba ch’a se conprava senpre co le sòlite quatro palachine: solo dopo la guera a s’à scuminsià a pagare co i franchi americani, le famose am-lire, parchè i pressi i jera andà parecio in sù.
Qualchidun pensarà: “Tenpi felissi, quìi là che co du schei te te cavavi le to voje” sensa pensare che par le scarsele gh’jera spesso telarine al posto d’i franchi e tuti i jera bituà a no slargare da ninsuna parte. A vedìvino muceti de palanche solo quando ch’a zugàvino a piceto, parchè essendo in diese, dódese, ognuno inpilava la so palanchina prima de ’ndare a tirare par védare chi ch’andava più vissin par bàtere el balin par primo. Più avanti, a i tenpi de la scuola media, par torse chelcossa par rónpar l’aria a le diese e mèsa, inte l’intervalo, ghe voleva za le sinque o le diese lire.
Ani dopo, quando ch’emo scuminsià a ’ndare in bar o a torse le prime sigarete a ghe voleva i sinquanta e i sento franchi; quando po’ semo entrà inte ’l mondo del lavoro ’emo visto i mile, i sinquemila e i diesemila franchi, grandi ch’i pareva d’i nissòi. Più tardi, man man ch’i perdeva valore, i schei i deventava senpre più pìculi, anca parchè i gheva da stare inte ’l portafolio, fin che a un serto punto (ma questa no l’è più storia!), par stare tuti in conpagnìa in Europa, i è sparì dal tuto par farghe posto a i euro. E le palanchine, i vintini, le colonbine i è deventà roba da colession.

[torna sopra]