Da Rovigo

El màdharo Desio

Desio, paron del ponaro…

A Desio a ghe intaressa solo quele bianche…

Par chi ca no lo sa, el màdharo l’è el mas-cio de le ànare. Par la più parte i ghe dise che l’è na ànara muta, de quele ca pare che no le parla, ma inveze le parla ecóme, slongando el so colo longo e grosso e supiando co tuta la gola. A ghe xe varie qualità de ànare mute: quele tute bianche, quele nere e col pèto bianco, e anca quele scure e macià, de on colore tra el maron scuro e el maron ciaro. Ma se le fémene le xe chiete e bone ca ghe basta na pàciara piena de aqua o anca on fosso pien de pavarina par snanararse, el mas-cio inveze l’è senpre inroscà, pronto a difèndare fémene e teritorio, indrizando le pene sora la testa e gunfiando tra oci e bèco tute le so vessighe increspà e rosse, che le pare na màscara.
Ma se ti a te le lievi da pìcole, le ànare le se afeziona, le te fa conpagnìa e le te tien drìo par tuta l’ara. E questo a lo pole dire la Natalìa de Crespin che i gheva regalà na cubia de anarete, la fémena tuta bianca e el màdharo, tra el maron ciaro e scuro.
Sichè ste dó bestiole, che le vegneva ciamà Sofìa e Desio, le xe stà tanto fortunà, lìbare de podere andare de qua e de là, par tuto el giardin. E de note le se ponarava drento na casseta tacà a la porta. Ma quando che le vedeva la Natalìa o Floriano andare e vegnere drento e fuora dal porton, lore le ghe tegneva drìo come du cagnolini.
Fin che na olta, Floriano, vegnendo fora dal garage co la màchina, el ga fato na manovra in retromarcia, senza che ’l podesse védare le dó bestiole, co na roda de drìo el ga tolto sota la Sofia, morta sol colpo.
El màdharo el paréa desperà e col bèco el continuava a bàtare so ’l corpo destirà de la so fémena, come a tirarla suso. E alora Floriano el ga dà la bestiola morta a la fameja darente, parchè i la magnasse che lu no ’l gheva corajo, e el mas-cio, che ’l paréa fora de lu, el lo ga portà da so cugnà Lucio, che ’l ga la corte piena de polame. E lì, sta bestiola, avilìa par avere perso la so conpagnìa e anca par avere canbià casa e paron, el xe stà racoante giornate da lu solo, cucià soto la passaja de la confina.
Ma dopo on tòco de tenpo, el cunta Lucio, el se ga ’bituà a sta nuova realtà, on fià a la olta ciapando confidenza co le altre bestie de la corte, foravìa del galo che ’l ghe becava in testa par mandarlo via.
Solo che sta confidenza la xe deventà anca massa confidenziale. Parchè Desio che no ’l ga più paura de gnissun, el ga tacà a fare el sparonzon del nuovo ponaro. Co sta particolarità che quando che ’l vede na gaìna bianca, lu el ghe salta ’dosso e po’ la sistema. No ghe intaressa le gaìne rosse o de altro colore: solo quele bianche, a ghe piase. E sicome che el galo el fa presto a fare el so dovere de galo, Desio, anca par la conformazion del so afare, che par chi ca no lo sa l’è fato come na trivela, e ghe vole tenpo a invidarlo e anca a desvidarlo, el ghe mete tanto più tenpo del galo a contentare le gaìne. Sichè le gaìne, quele bianche intendo, le dassa el galo da lu solo, par conpagnarse co Desio. E Desio l’è cussì contento de la nuova conpagnìa che ’l va co lore anca drento la casseta par fedare.
Ma el discorso l’è ancora più grande, parchè a Desio a ghe ’tira cussì tanto el bianco, che anca el galo, bianco de pena, na olta l’è sta messo soto, no sò co qualo risultato. Anca a on gato bianco el màdharo el ga corso drìo, solo che sto gato el se ga messo in salvo, e più no ’l ghè ’ndà drento el ponaro de Desio.

[torna sopra]