|
Editoriale
Ano novo, vita nova!
De solito, ste parole se le disemo quando finisse l’ano e taca quelo novo, quasi par desmentegare in pressia l’ano vecio e voltare pagina, auguràndose che el futuro el sia, almanco on poco, mèjo del passato.
Ano novo, vita nova la se lo dise anca Quatro Ciàcoe e la se lo àugura de vero cuore, parché fasendo la spèra (come se faséa na volta co i ovi da métare soto la cioca) de i ùltimi du ani, el 2014 e el 2015, a xe da métarse le man so i caviji.
El disastro econòmico che se vede in giro ga colpìo anca la cooperativa “Editoriale Padova” che dal 1986, tra alti e bassi, la ga tegnù in piè la baraca, stanpando Quatro Ciàcoe, e la ga sostegnù, difeso e divulgà l’idea che col nostro dialeto, o lingua vèneta, se pole oncora mostrare la nostra vera identità.
Con la fine del 2015 l’“Editoriale Padova” la ga finìo de vìvare e, prima de l’ultimo respiro, par nostro tramite, la ringrazia tuti quei che generosamente ga dà fin a la fine el so contributo, e la esprime el so ramàrico parché, senza el sostegno de la Regione Veneto (che xe mancà te i ultimi du ani) le Associazioni di Veneti nel Mondo no le ricevarà pi la rivista.
Par tuti i nostri letori abonati no canbiarà gnente, parché l’amore e la bona volontà de i colaboratori de la rivista, sparsi in tuto el Veneto, ga comosso le anime bone de la Tipolitografia ARTE STAMPA de i F.lli Corradin Editori de Urbana (PD), che le ga deciso de “adotare” la nostra creatura.
Cussì sto bel sogno che ga ormai conpìo 33 ani de vita el pole continuare. De questo semo tanto contenti, anca parché, fin ’desso, col nostro dialeto no ghemo mai fato del male a nissun; quindi: “male non fare, paura non avere”.
Da subito, xe inportante che: colaboratori, letori, clienti de la publicità e… postini, on poco paromo, tuti femo calcossa parché l’augurio de BON ANO NOVO no ’l se ridusa a na sola tradizion e basta, ma el sia l’inpegno concreto che ga da premiare l’iniziativa de Arte Stampa, a dimostrazion che “insieme si può fare”.
[torna sopra]
|
