|
Da i Coli Euganei
Proverbi che vien da lontan
 | | Cavalo bianco e bela muger, dà senpre del pensier. |
Scrìvare su i proverbi no xe de serto na roba nova o, mèjo, na novità. Ma in sti dì me xe capità fra le man, furegando in te on vecio cassetin, de i proverbi antichi, veneti, dal Mileotosento e i me ga divertìo proprio tanto, anca parché la major parte i gera novi par mi, mai sentìi. Eco che me xe vegnù l’idea, invesse de tegnerli solo par mi, de fàrghei sentire a i amissi del nostro giornàe. Che la sia na bona idea? Mah! Provemo.
I primi i xe dedicà al vin:
- A trincare sensa misura, tanto tenpo no se dura.
- A la sera ciochi e a la matina bisi (alla sera ubriachi e alla mattina instupiditi, ottusi).
- Late e vin, tòssego fin.
- Chi beve col periolo, beve fin al colo; chi beve col bocal, no fa né ben né mal (chi beve col boccale, beve quanto gli pare).
- Dona zóvane e vin vecio.
- El vin a la matina l’è pionbo, a mezodì arzento e a la sera oro.
- Guardarse dal bo davanti, dal mulo dadrìo e da la dona da tute le bande.
- No se pol bévare e subiar.
- Bianco o negro méneme casa (il miscuglio di due vini produce facilmente ubriachezza).
- Dó déi de vin prima de la menestra, i xe pal medico na tenpesta.
- El vin el xe el late de i veci.
- Goto, moto e pan biscoto (par star ben).
- El vin guarisse da tuti i mali e l’aqua smarsisse i pali. Nel Vicentino si dice: l’aqua smarsisse i pali, la fa i òmeni zali, la fa sbiancar la pèle e la fa le done bele.
- No starte a métare in camin se la to boca no sa da vin.
- Vin de fiasco a la sera bon, a la matina guasto.
- Xe mèjo aqua intenta che aqua del Brenta (ogni vinello, pur allungato che sia, val meglio dell’acqua pura).
- Tanti pànpani, gnente ua (dove ci sono tanti pampini, ci saranno pochi grappoli d’uva).
- La pianta de pi onbre xe la vigna (“ombra” in dialetto è anche un bicchiere di vino).
- Se la vigna buta a marso no se inpina gnanca el fiasco, se la vigna buta in aprile, se inpina tini e anca el barile (se la vite germoglia in marzo non si riempie nemmeno il fiasco; se la vite germoglia in aprile, si riempiono tini e barile).
- A setenbre cominsia la giostra, ua, fighi e scagarela nostra.
E a sto punto femo na s-cianta de pausa, par dire che in casa nostra xe senpre sta usà tanti proverbi, scumissiando dal nono e po’ dal popà, da le zie, dal zio. La mama invesse de dirli ghe piaséa scoltarli. Uno che diséa el popà, par esenpio, gera questo: Luna in piè, marinaro sentà. Voléa dire che quando la luna xe drita in celo, fa bel tenpo.
Có mi ridéa massa da toseta, eco la sagessa del zio Gioanin: “Ridi manco, pìcola, parché il riso abbonda sulla bocca dello stolto”, e così via. Ognuno diséa i sui de proverbi.
Ma ’ndemo ’vanti co quei trovà su la racolta antica. Stavolta sensa temi, cussì a ocio.
- Loda la polenta, ma tiente el pan.
- Beato chel canpeto che ga siesa e fosseto (cioè è circondato da siepe e fosso).
- Mèjo on bon amigo che sento parenti.
- Amicissia riscaldà, poco dura e poco fa; saporita che la sia, no la xe più quela de pria.
- Amor no fa bójer la pignata.
- Tegnir du morusi, l’è come tegner on saco de pulzi.
- L’amore davanti ga el miele e dedrìo se ghe taca el fiele.
- Tosse, amor e panzeta, no le se sconde in qualunque sito le se meta.
- Omo studioso, magro moroso.
- El dolor de la vedova: quatro lagremete, quatro candelete, voltà el canton, passa el dolor.
- Chi danari non ha, amor non prende.
- Ogni bela scarpa, deventa na bruta savata.
- Cavalo bianco e bela muger, dà senpre del pensier.
- Fin che la dona granda la se inchina, la pìcola liga la fassina.
Varda ti, me vien da pensare che sto proverbio qua, me lo diseva la mama quando rivava a casa da scola, pianzendo e sangiutando parché i conpagni de scola i me toeva in giro parché gera la pi picenina de ’a classe. Gera el tenpo de le elementari e la maestra me gavéa messo su i primi banchi parché ghe vedesse mèjo. “Vien qua da mi e scóltame ben”, me consolava alora la mama, “doman te ghe disi ste paròe: − Fin che la granda se inchina, la pìcola liga la fassina. Parché mi go senpre fato i me lavuri e ben, fasendo pi svelta, pi in pressa de quei grandi.” E mi co ste paròe tornava serena e contenta de la statura picenina.
Ma a sto punto me par che basta cussì co i proverbi, anca se ghi ne gavarìa tantissimi da dire, antichi, veci, novi. Nò, cari, no xe pi tenpo de proverbi. La gente de ancò no i vol savérghene. Luri i tira fora da la scarsèa la so conpagnìa, i struca el boton e via…
Mi invesse me son proprio divertìa a posare sol fojo, ricamando ste pagine. Ma ghe xe on proverbio che dise: El tropo, storpia. E alora el resto ve lo contarò naltra volta.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ano novo, vita nova!
De solito, ste parole se le disemo quando finisse l’ano e taca quelo novo, quasi par desmentegare in pressia l’ano vecio e voltare pagina, auguràndose che el futuro el sia, almanco on poco, mèjo del passato.
de Mario Sileno Klein
Da Rovigo
El màdharo Desio
de Gianni Sparapan
Da Verona
L’afondamento de la Wilhelm Gustloff
de Mirco Castellani
Da Verona
Strassà o sassinà?
de Giacinta Dall’Ora
Da Verona
Nikolajewka e i fati del Don
de Lucia Beltrame Menini
|
