Da Verona

Strassà o sassinà?

La polo celeste el me l’à macià de bianco…

El giacheton de pèle el l’à brusà in tri posti drio inpissar sto camin…

Cato la me amiga par caso dal Còi (Coin, dito da so cusina de me mama), inte ’l reparto de le robe da omo.
“Ciao, bela!” la me siga, pingolando la testa da dedrìo un scafal.
“Sito de spese par to marì?” ghe domando.
“Te l’è dita giusta” la me risponde, “son invià a sercarghe qualcossa da vestir parché oramai no ’l ga più gnente.”
“Marisi, alo strassà l’abiliamento tuto inte un colpo?” ghe ribato mi.
La me varda con du oci da mata, la me strapega fin a le poltronsine denansi a i ‘camerini de prova’, la me fa sentar zo e la taca…
“Praticamente el me omo nel giro de un pochi de mesi el s’à reduto inudo. Quando el laoràa in banca i vestiti i ghe duràa ani. El fruàa le màneghe de le giachete e el caval de le braghe, stando sentà a la scrivanìa ma a pian a pian. Da quando l’è in pension l’è na val che se brusa. Le uniche robe che se salva i è quele da nar a córer parché el dòpara solo i piè.”
“Cioè?” voi saver mi.
“’Desso te conto” la me dise ela de paca. “Donca, st’istà ghe regalo na polo de qualità e de marca, celeste come i so oci. La ghe piase da mati che no ’l vede l’ora de métersela intorno. Na matina el se lustra, el se rifila la so barbeta sbriciolata (senpre secondo so cusina de me mama) e el va al Cìrcolo. A disnar el me telèfona che no ’l vien mia a casa parché el ga da far. Par fàrtela curta, el vien de ’olta a le oto de sera, el core a canbiarse e el se senta a tola par senar.
Sto autuno el se cronpa un par de scarpe – le scarpe i è la so passion − che le costa na cifra, ma i è na smaraveja. El se le mete el dì dopo par nar a far el sòlito gireto con i so amici. Da lì e qualche ora el riva a casa, el se ’nfila le savate e el se piassa davanti a la television.”
“E alora?” salto fora mi che no capisso più gnente.
“Tasi e ’scolta” la me comanda ela e la va avanti con st’altra storia. “Par Nadal, tra le altre, el se tol un giacheton de pèle che el fa un figuron. Nemo a Messa, ne fermemo fora da cesa a far un pochi de auguri, passemo a saludar me mama, fradéi, sorele, cugnè, neodi, sie… e tuti i ghe fa i conplimenti par quel ‘capo spalla’ che el par un buteloto. Tornemo a casa, mi me canbio parché go da star drio a teje e pignate, lu el ga da pareciar…”
“Senti, belessa” la interonpo mi, “mi no go mia tenpo da pèrdar: vuto spiegarme sì o nò parché to marì l’è inudo e ti te ghè da rifarghe el guardaroba?”
“Parché, cara” la me risponde ela “la polo celeste el me l’à macià de bianco, dato che l’à inpiturà i muri del Cìrcolo. Le scarpe nóe el l’à sassinè a nar a canpi con i so amici dopo na stimana de aqua e el paletò de pèle el l’à brusà in tri posti drio inpissar el camin!”

[torna sopra]