Da Verona

Nikolajewka e i fati del Don

La marcia de ripiegamento de i alpini del 17 genaro 1943, su ordine del generale Gabriele Nasci.

La colona de i alpini, dopo la batalia de Nikolajewka.

Otobre 2000. Lucia Beltrame con Mario Rigoni Stern, a Asiago, per la prefazion a Ta-pum, Lettere dal fronte.

El mese de genaro, solo a nominarlo, me fa giazzare el core; subito el me pensiero el marcia pi svelto de la luce e el riva drito in te on posto ancora pi fredo de nome e de fato: “Nikolajewka o Nikolaevka” con la so batalia. Solo a parlàrghene go la peldoca alta du dièi e in te l’anima provo la sensazion de on drama che no fenisse pi. Me se giazza infin le parole in tel scanaruzzo, co on gnoco in gola che no va pi né sù né zo. Sta data storica de la Seconda Guera Mondiale, “26 gennaio 1943”, la dise tuto: se trata de l’azion militare de i alpini italiani de la Division Tridentina (8- 9.000 òmeni) che riesse a tirarse fora da l’“accerchiamento nemico e dall’annientamento completo”. Faséa parte de la Tridentina i batalioni Vestone, Verona, Valchiese e Tirano, po’ s’à unìo le forze de i batalioni Edolo e Valcamonica. I òmeni de la Tridentina, inpegnè sul fronte orientale, guidè dal gen. Luigi Reverberi, i è riussìi a vèrzarse na brecia co’ on solo caro armato tedesco ancora utilizabile e cussì a scapare a l’“accerchiamento”, come vien ricordà ne la motivazion de la medaja d’oro conferìa al generale Riverberi:
“Alla testa di un manipolo di animosi, balza su un carro armato e si lancia leoninamente, nella furia della rabbiosa reazione nemica, sull'ostacolo, incitando con la voce e il gesto la colonna che, elettrizzata dall'esempio eroico, lo segue entusiasticamente a valanga coronando con una fulgida vittoria il successo della giornata ed il felice compimento del movimento. Esempio luminoso di generosa offerta, eletta coscienza di capo, eroico valore di soldato.”
In sta batalia le perdite italiane iè stè gigantesche, ma istesso i alpini i ghe l’à fata a rivare a la località de Shebekino el 31 de genar 1943, tiràndose fora da la tenaja de i Russi.
I nùmari ne spiega mèjo le robe: el 17 de genar del 1943, quando è scominzià la ritirata de l’ARMIR, el Corpo Alpino Italiano el gavéa 61.155 soldè. Dopo la batalia de Nikolajewka, i òmeni che è vegnù fora da la “sacca” i era 13.420, oltre a 7.500 feriti e congelati. Insoma è restè là, in mezo a la neve, 40.000 òmeni, despersi o fati prigionieri, smistè ne i vari canpi, e, tra questi, quelo pi tristo de Rada, vizin a Tambow. Solo na percentuale minima de sti prigionieri, a partire dal 1945, i è riussìi a tornare in Italia, a casa.
Tra i alpini che à partecipà a la batalia de Nikolajewka vien ricordà i nomi de Giulio Bedeschi, don Carlo Gnocchi (capelan militare), Mario Rigoni Stern e Nuto Revelli.
Ancó Nikolajewka no la esiste pi, parché l’è stà assorbìa dal Comune de Livenka, ma mi, nel me pensiero, dedico con riconossenza e amore on giavasco de girasoli a tuti quei alpini, soterè da la neve ne i fati del Don.

[torna sopra]