|
Editoriale
Festa de la Mama, sì, ma…
Se trata de na roba seria: na ricorenza civile celebrà in onore de la Mama,
ma poco de la maternità e del so valore sociale. Stemo ’tenti a no ridurla a na
abitudine o a on fato comerciale, dato che in Italia, nel 1956, la xe nata propio
in ocasion de la Fiera del Fiore de Bordighera.
A dire el vèro, a nobilitare sto evento ghe ga pensà, el 12 magio 1957, don Otello Migliosi, pàroco de Tordibetto, frazion de Assisi, che ghe ga visto ciaro nel festegiare la figura de la mama, in quanto la xe el peagno, el ponte che unisse tra de lore le diverse culture. Visto che magio xe el mese de la Mama del Signore, el ghe ga dà a la Festa anca on valore religioso oltre che culturale.
Vardando ben, dunque, calcossa no quadra in sta Festa del dì d’ancò. No ne convinze la cascata de boni sentimenti, de fiori, de basiperugina, de leterine, de poesie, de regài che farà pure la gioia de le nostre mame e de i comercianti che, co sti ciari de luna, i se indriza le coste.
No xe che le mame no se mèrita tuto questo, anzi, bisogna insìstare parché el suceda tuti i giorni, soratuto quando le magagne o le paturnie de l’età le rende “pesante” e se fa fadiga a starghe drio e magari se risolve el problema co’ na badante o trasferéndole so na “casa de riposo”, desmentegàndole on poco…
Alora, cossa xe che no va so sta Festa? Ne pare che la socetà moderna la sia curta de vista e, pur festegiando la figura de la Mama, la trascura de métare al primo posto la maternità. Colpa de la situazion economica, de la mancanza de lavoro, de on clima poco educativo de la TV che ne insegna che par stare ben bisogna avere questo, avere quelo e quel’altro e che ne fa deventare egoisti. Ma anca colpa de la politica che, anca se la ga fato bone legi par la maternità, no la
se preocupa de farle rispetare e de aplicarle, sostegnendo la fameja, soratuto quela dove na mama (e non “on mamo”) la mete al mondo de i fiòi.
Epure dal valore che viene dà a la maternità e a le nàssite dipende el futuro de l’umanità. Ogni dona, infati, in ogni angolo de la Terra, indipendentemente da la posizion sociale e da la cultura che la fa parte, la ga el potere de creare e de consegnare al mondo na nova vita.
A sto punto, nel festegiare la Mama, se no se ghe dà el giusto valore al patrimonio de la maternità, la xe na festa inconpleta, par no dire poco onesta e poco sincera. La vita e la responsabilità de la mama le se mèrita calcossa de pi de na data segnà so ’l calendario e za programà, te ’l mese de magio, par i ani a vegnere.
Parché la Festa de la Mama la sia veramente na festa, démoghe a la dona la libertà de èssare mama cussì come ela la sente de volerlo èssare, parché maternità vol dire fiducia ne le propie sensazion e ne l’ascolto de la so “chiamata speciale”, come la ga definìa Giovanni Paolo II ne la Mulieris dignitatem.
Se se ghemo sbalià, magari in bona fede, semo oncora in tenpo par farse perdonare: chi che pole che ’l ghe regala pure a la Mama on cristalo de Swarovski, o l’elegante trousse de Giorgio Armani, opure na borseta firmà Yves Saint Laurent, ma che da parte de tuti no manca mai par la Mama na brentana de amore e de riconossenza par la so maternità che ne ga dà la vita.
Auguri a tute le Mame del mondo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Festa de la Mama, sì, ma…
Se trata de na roba seria: na ricorenza civile celebrà in onore de la Mama,
ma poco de la maternità e del so valore sociale. Stemo ’tenti a no ridurla a na
abitudine o a on fato comerciale, dato che in Italia, nel 1956, la xe nata propio
in ocasion de la Fiera del Fiore de Bordighera.
de Mario Sileno Klein
Da Gavello (RO)
El paloncino
A ghe sarìa da rìdare se no la fusse da piànzare.
de Gianni Sparapan
Da Verona
Dài che ’ndemo al cine!
de Wanda Girardi Castellani
e Mirco Castellani
|
