Da San Stefano de Zimela (VR)

Frignòcole, crogni e altro

Tiro de la màrmora con la frignòcola.

Altra modalità de tiro de la màrmora.

Ne le so Cronache dialettali de setenbre de l’ano passà e de febraro de sto ano el prof. Cortelazzo parla del “gesto di colpire un oggetto facendo una molla con l’indice puntato sul pollice” e che el so nome in te ’l Veneto el sarìa poco conossùo. In te ’l me paese, ma anca in te ’l Veronese, el se ciama frignòcola1, solo che da noantri a se dòpara el déo medio, cussitaché se ghe dà pi as-cio (molla) e la bòta la fa pi male quandoché la se ghe dà dedrìo a le rece de i tosi.
La frignòcola la se doparava quandoché noantri boce a zugàino a s-ciapi par le strade co’ le màrmore che a i me tenpi a le jera de teracrèa cota e colorà. Dopo a xe rivà chele de véro tute bele e sluseganti. A faséino i castèi e dopo a ghe tiràino colpendo el marmoron (biglia un po’ più grossa) proprio co’ ’na bela frignòcola. Me ricordo ancora ’desso che quandoché a scóla el maestro, spiegando geografia, el parlava de le Cascate de marmore a me insognava a oci verti un fiume de bilie colorate che le vegnéa zò s-ciocando par rivare fin in te le nostre scarsele.
La frignòcola servéa anca par mandare avanti i cuercioleti quandoché a faséino le gare del Giroditalia disegnà col gesso sul zélese o segnà partera co’ un caucio, o anca quando che faséino partìe de calcio, su un canpo senpre disegnà partera. Ogni squadra la gavéa i so cuercioleti del stesso colore e chelo che faséa da balon el jera piturà de moro.
Da noantri el “colpo dato con le nocche della mano” el se ciama crogno. Par fare piassè male se tiene un poco in fora dal pugno la noca del déo medio.
’Ste storie de frignòcole e de crogni a le me fa vegnere in mente che quando che a jera bocia (che no ghe jera mia el telefono azuro, anzi, no ghe jera gnanca el telefono) e che se el maestro el te daséa de le bele sbachetà su i déi o el prete el te tirava le rece, magari anca giràndole un poco, a no te naséi mia a contàrghelo a to mama parché la t’in dava altretante, diséndote: “Se i te ga dà, calcossa te ghè conbinà!” Se invezze te le ciapavi, barufando co’ calche to amico, silenzio assoluto in casa senò te gh’in ciapavi altretante al grido: “Se te staséi a casa tua a no te capitava gnente.” Un toso che el fusse corso, pianzendo, a ciamare so mama dopo averle ciapà, el vegnéa ciamà bochèo e el vegnéa tratà da viliaco.
In fameja no ghe jera mia el Manuale per l’educazione dei figli; ghe jera invezze l’Educazione manuale dei figli, che quandoché a no bastava mia le man a intervegnéa el batipani, el mànego de la spazzaora o la cinghia de le braghe. Terìbili le jera le frustà dà su le ganbe nude co’ la vis-cia, che le pi dolorose le jera chele molà co chela de sànguana. Tuto se basava sul fato che valéa la regola che le piante le se indrizza bel fin che le xe pìcole!
Ghe xe vari nomi par definire le bòte. Presenpio el crogno el se ghe dà de strissio su la zuca mentreché el cogno l’è un pugno dà direto su la facia. Dopo ghe xe le gamele, le barete, i scufioti, i sberloni, i s-ciafoni, le castagne. Ma se dise anche che uno el ga ciapà un bel rùspio de bòte, ’na passada de ossi o de bresole, de le bele sverdegà sul gropon, de le scarpà o peà sul dedrìo…
Par finire… sul nùmaro de setenbre a se nomina anca el grunbiale. Da noantri quandoché uno el se marida e el va a stare da so mojere, in casa co’ la suocera, se dise che l’è nà a stare a grunbiale… e no xe che el sia un gran bel conplimento!

[torna sopra]