Devossion popolare

I oceti de la Madona

Quando i òmani segava el fen, ghe capitava davanti un sbaro de oceti de la Madona…

Me vien a la memoria el tajo del masàdego verso la fine del mese…

Tuti sa che sto mese da sècoli el xe dedicà a la devossion mariana: el rosario, el Fioreto davanti a i capitèi de na volta, co tante cansoncine a la Madona che se perdeva ne l’aria de la sera.
La primavera sgionfa de fiori e de colori, el tepore profumà da la verta stajon, quela de i campi d’altri tempi, che ne impeniva i polmoni de ossigeno e de contentesse mai più trovà. E sensa contare quelo che ga fato ne i secoli, sempre a sto propòsito, la poesia e la prosa, par mezo de le pene favolose de i poeti e de i scritori de ogni generassion e lingua: na valanga de parole che se trasforma in pètali de rosa a cascata.
Par quelo che riguarda invesse, la me modesta colaborassion a sto mensile, dovarìa parlare de na qualche ceseta despersa, invesse che de capitèi, par restare nel tema mariano de sto mese, anca se go sempre paura de fare un dopion, na ripetission. A sto proposito, le ripetission xe sempre stà el spaurachio de i preti che gaveva na streja de santi e de feste che tornava sul calendario de i giorni tuti i santi ani, e diventava difìssile no ripètare le stesse parole, le stesse considerassion. In più, quando se tratava de i santi, ghe gera de meso anche la cronistoria de la so vita, co i fati e le òpere più importanti che i gaveva fato, magari de i miràcoli e no se podeva andare a la leziera.
Me zio prete che xe stà pàroco par na vita in un paese del Vicentin, me ga fato védare un libro dove ghe gera publicà – a servissio del clero – le prèdiche za fate par tute le ocasion e tute le feste de l’ano liturgico. Na mana par i pàroci che no gaveva el tempo par prepararse e tante volte gnanche la voja. Al bisogno no i doveva far altro che imparare la prèdica a memoria o scrìvarsela su de i foli, par no farghe védare el libro a i fedeli, e lèzarla come se la fosse stà farina del so saco. Secondo i esperti in materia, xe proprio da sto fato che xe nata la considerassion canònica che precisa: “Ogni santo ga la so festa e la so predica, sempre la stessa par pura necessità.” I preti la doparava par difèndarse da le osservassion a puntarolo, del farmacista o del notaro del paese, pasqualini che, par caso, gaveva scoltà la stessa predica la Pasqua prima.
Chi scrive e vol caminare su i giorni e i mesi del calendario core el stesso pericolo de continuo, e la ripetission sul stesso argomento, diventa sempre fastidiosa par chi leze e par chi scolta. E alora de cossa parlarò in sto mese benedeto, mentre quasi tuti ricordarà la Madona col so rosario, el so Fioreto ’torno a i capitèi? Me vien a la memoria el tajo del masàdego verso la fine del mese che, par la zente de i campi del me tempo, el gera un racolto sospirà e importante quasi come quelo del formento. Se tratava del magnare ùnico par le bestie da lavoro e da stala. Segare el masàdego gera un lavoro pesante come altri de quei tempi e de quei giorni, quando tuto se faseva a brassi, ma fato al tepore gioioso de na primavera spalancà, el diventava anche na orassion.
Un lavoro che gaveva le so règole rispetà da tuti, come na sorte de liturgìa che vegneva da la esperiensa e da la tradission. Segare el masàdego de matina bonora quando l’erba gaveva ancora l’aguasso de la note, portava ben par el racolto e par le bestie. Se pensava che l’umidità de la rugiada, o de l’aguasso che xe la stessa roba, el vegnesse assorbìo da l’erba secà al sole, co tute le so vitamine e i so nutrimenti che gera pressiosi par le bestie. In altre parole l’erba bagnà da l’aguasso e secà al sole, gera più nutriente e sicura de quela tajà quando la gera suta da l’aguasso. Na teorìa che no ga sbusiarà del tuto gnanche i sapienti moderni credo, ma no so’ sicuro, e che ga durà par sècoli ne le campagne. Me nono me ga spiegà sto fato tante volte, l’aguasso che seca co l’erba tajà, ghe lassa dentro el so nutrimento par le bestie, qualo no sò dìrvelo.
Ma quando i òmani segava el fen in fila come le formighe, a schina curva par arcare el falsin, gera cussì tante le erbe e i fiori che i se trovava da tajare, che quando ghe capitava davanti un sbaro de oceti de la Madona (de i fioreti celesti che gaveva sto nome parché i ghe somejava al colore de i oci che solitamente i pitori ghe regalava a la Madona), i se ricordava del mese e de la Madona e i mormorava un’Ave Maria. Me nono e me papà lo ga fato tante volte, in presensa mia, sicuramente par darme l’esempio, se gavesse continuà a fare el so lavoro. Cosa che no se ga verificà par na infinità de motivi, primo fra tuti l’avansare del progresso che ga fato de i campi na tera da fàbrica.
Me ricordo serti trami o tere da pàscolo che in sto mese gera un tapeto de fiori e de margherite e, quando le se destirava al sole co la forca, le diventava na cascata de profumi e de colori in facia al sole, l’ocio del Signore. Se no xe na orassion questa, no sò quale altra possa starghe a la pari.

[torna sopra]