|
Da la Marca
Residuati de guera
 | | Locandina de ’na mostra sul riciclo de i residuati. |
In ocasion del primo centenario da la fine de quela che i contemporanei i ciamava "Guerra Europea", ne la Marca Trevisana che xe stada el teatro final del conflito se ga tegnùo tante manifestassion co rievocassion storiche, comemorassion ufìciali, rassegne su aspeti particolari de quel periodo, come la sanità e la posta militare, la censura o le canson de trincea. Tra le inissiative pi originali ghe xe sicuramente le dó mostre organizàe a Treviso e Mojan col titolo de "Dalle bombe alle bambole - Frammenti di guerra e di morte per strumenti di pace e di lavoro", alestìa dal Gruppo Folcloristico Trevigiano al Museo Etnografico "Case Piavone" e "Dai campi di battaglia ai campi coltivati - il recupero dei residuati della Grande Guerra nella Marca Trevigiana" messa in piè dal Gruppo Ricerca Storica Istituto Astor che ga tegnùo banco par diversi mesi.
Le mostre le ga documentà esaurientemente, co reperti e publicassion fotografiche l'intensa atività de riutilizo de i residuati che in parte la continua ancora parché bisogna ricordar che ne l'ultimo ano de guera se ga confrontà su le rive del Piave pi de dó milioni de soldài de sete eserciti difarenti, che ga lassà sul teren ’na quantità incredibile de armamenti e atressature, che recuperanti e contadini ga çercà de trasformar in arnesi e ogeti de uso civil. Se ga visto cussì robe curiosissime come coverci de gavetini trasformài in gratariole da formajo, bonbe de aereo adatàe par funsionar da conpressori, cune par putèi ricavàe da cassete de munission, bracialeti e colane otegnùe da le corone in rame de granate, tajapan e tajafoje co la lama de bajonete e de siàbole, portacandele fati co i fondèi de bonbe, portaçénare che in origine jera bonbe a man SIPE. Le bonbe le xe diventàe anca fermaporte, fermacarte, soase de quadri, portafoto e portatovajòi, portafiori e portapene mentre che i elmeti i ga avùo ’na sorte diversa: queli italiani, lisieri e rotondi, i vegnéa de preferenza tramutài in scaldini o portabronse par le móneghe che scaldava i leti de le case contadine; queli tedeschi, pi squadrài e robusti, i vegnéa doparài come caìni ne le malghe de la Pedemontana o par covèrzar la somità de qualche meda de fen e far sgrondar la piova; i "capèi da much” come che i vegnéa ciamài da i montanari i podéa vegner fissài a un palo o a un mànego e usài par spàndar su i canpi el pissaroto o l’aqua da springar. I elmeti inglesi, inveçe, avendo la forma de ’na squela, i jera fàçili da schinsar, trasformàndoli in piati da cusina solidi e resistentissimi.
I residuati che ga stimolà de pi la fantasia de i recuperanti e de i artigiani i xe stài de çerto i bòssoli de picolo-medio calibro, in rame e oton, come che ga ben evidensià le dó mostre; fabricài in rame e oton i jera façili da incìdar o da lavorar a fredo e par questo za in trincea i nostri soldài i gavéa inparà a farghe de i grafiti co la ponta de la bajoneta opur co un ciodo, in gènare disegni geometrici o el nome del proprietario o la data par ricavar de i souvenir da portarse casa.
Finìa la guera se ga dedicà a la lavorassion de i bòssoli, che jera veramente disponibili in abondansa, anca le boteghe artigiane, che podendo lavorar a caldo le xe riussìe a produr ogeti veramente artistici, decorài a sbalso co motivi de fantasia, come fiori, fruti, foje e figure de osèi o de pessi. Fra le dó guere se ga creà cussì un novo gusto estetico e se ga svilupà un tipo de bòssolo ornamental in stile liberty, rastremà come le vece bosse de Coca Cola, che xe ancora richiestissimo e che vien pagà a bon presso ne i mercatini.
El motivo ornamental pi difuso el xe la foja de l'èdara co i so festoni a spiral che pararìa derivà sia da la tradission liturgica che tien ’sto senpreverde come sìnbolo de la vita eterna che da quela clàssica che decorava le cope e i vasi vinari co l'édara ligada al culto de Bacco.
Sarìa anca da zontar che in area trevisana xe documentà da fin dal Sieçento l'usansa de ornar le sece da vin co file de fojete de èdara in rame che no le jera solo che decorative ma le gavéa anca la funsion pràtica de segnar el livelo del liquido contegnùo.
I bòssoli decorài i servìa par tegner i fiori su i altari de le cese e su le tonbe de i çimiteri oltre che ne le case e chi no xe pi tanto zóvane ricordarà sicuramente de avérghene visto anca ne le boteghe de i fioristi.
A la lavorassion artistica de i bòssoli se ga dedicà dopo la guera anca i çìngani de la tribù de i "Calderash" che ga tocà el vertice de l'arte decorativa, introdusendo de i motivi ornamentali stilizài e sinuosi derivài da l'influsso de i Paesi orientali che le so carovane traversava su e zo par l'Europa e che ricorda tanto anca i disegni ricamài da le so done che un tenpo, soratuto in Spagna, le jera famose par i so lavori de ago e de filo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Festa de la Mama, sì, ma…
Se trata de na roba seria: na ricorenza civile celebrà in onore de la Mama,
ma poco de la maternità e del so valore sociale. Stemo ’tenti a no ridurla a na
abitudine o a on fato comerciale, dato che in Italia, nel 1956, la xe nata propio
in ocasion de la Fiera del Fiore de Bordighera.
de Mario Sileno Klein
Da Gavello (RO)
El paloncino
A ghe sarìa da rìdare se no la fusse da piànzare.
de Gianni Sparapan
Da Verona
Dài che ’ndemo al cine!
de Wanda Girardi Castellani
e Mirco Castellani
|
