|
Da Verona
Massa confusion
 | | El bufeto ’ndó ghera anca i ociài da vissin, quei da lontan, i fassoleti, un vaseto de fiori… |
Son a casa de la me amiga. L’è un tocheto che no la vedo parché l’è stà a l’ospedal, perciò, come la m’à telefonà che l’è vegnùa fora, me son pressipità qua da ela. L’è deperìa, bianca come na strassa e zo de taco: l’è da giugno che l’è tuto un va e vegni tra i reparti de chirurgìa e medicina par sercar de riméterla in pié.
Come la me vede la me se taca a brassocol e la pianze.
“Ciao, bela!” la me sopia inte la recia.
“Ciao, cara! Come te sèntito? Varda che se te vol sponsar vegno n’altra ’olta” ghe digo mi.
“Nò, nò, férmete un fiantin. No te sé quanto m’è mancà le nostre ciàciare in sti mesi de malatìa. Go da contàrtene de bele.”
“Signor te ringrassio! Vol dir che l’è invià a ciaparse, se la ga ’ója de parlar” penso.
Con la ’osse bassa la taca con sta storia nóa:
“Donca, son in ospedal, stao da prete, i ga da servirme in tuto, parché no posso alsarme dal leto e perciò go bisogno de assistensa continuata. De fianco go senpre una de le me quatro sorele o la mojer de me fradel. Le laora tute, ma istesso le riesse a turnarse par no lassarme mai da par mi. Quela che la stà a Atene la mola tuto, la vien qua e la me sta vissin tri giorni, uno drio l’altro, da la matina a la sera. I dotori e le infermiere i resta stùpidi davanti a na fameja cosita ùnita.”
“Ne la sfortuna te si anca fortunà” salto fora mi, che in giro de vedo de tuti i colori.
“Te ghè reson” la me dise ela, “anca se, a dir la verità, un neo el ghera in tuta sta giostra de done.”
“Cioè?” la interogo mi.
“Ogniuna la gavéa le so manìe. Donca, me serve el disinfetante par le mane e me riva l’Amuchina; canbia el turno e i me porta un gel speciale che el par che el fassa morir tuto fora che le persone; el turno dopo me cato un liquido che el spussa che el fa morir anca i cristiani. I dotori i me racomanda de ber tanto e le sinque àgate le me porta ogniuna n’aqua difarente; me mama la me manda du litri del so tè miracoloso tuti i giorni parché ela la le bée da 90 ani e la sta benon.
Me ocor le salviete detergenti par rinfrescarme e me riva quele al profumo de orchidea; canbia sorela e la me porta quele a la camelia parché le orchidèe le porta mal. Ela la ghe l’avéa come masso da sposa e difati la s’à separà. Me cugnà invesse la vol che dòpara quele neutre, sensa profumo, parché i è piassè sicure. Insoma le me ‘assistenti’ le rivàa con le so robe e le le depositàa sul bufeto, ’ndó ghera anca i ociài da vissin, quei da lontan, i fassoleti, un vaseto de fiori…”
“Marisi, l’era come un na botega de tuto a un euro!” salto fora mi.
“Ben, vien che i ga da netar a fondo la càmara, leti e comodini conpresi. L’adeta, vegnendo verso de mi e sghimando el me bufeto la s’à messo le mane ne i cavéi, la m’à vardà de traerso e el seto ’sa la ga avùo el corajo de dirme?”
“Cossa?”
“Cara siora, mi no ò mai visto un bufeto cosita intrigà; massa robe. Qua ghe manca solo la gabia col canarin!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che Nadale porlo èssare…
… coando se sente che da l’inizio de l’ano ghe xe stà quasi 5.000 morti
tra i “migranti”, scapà da la guera e da la fame, nel tentativo de rivare in Italia
e in Europa. Na strage de creature partìe soratuto da Siria, Irack, Somalia, Gambia,
Nigeria, ingiotìe da le aque del Mediteraneo, deventà on simitero senza crose.
de Mario Sileno Klein
Zente de Padova
Maria Lazzari
Na padovana nel “Giardin dei Giusti del mondo” de Noventana, ’pena fora Padova.
de Arturo Baggio
Da Verona
Massa confusion
de Giacinta Dall’ora
|
