|
Da Gavello (RO)
Veci parlari
A ghe jera, na olta, in te ’l parlare, parole e modi de dire che da tenpo più no se usa, tanto che oramai i se ga desperso del tuto.
Se on putin el coréa da na parte a l’altra come el vento, a ghe podéa vegnere fora “na panocèa in te na angonaja”, che la sarìa on gunfiore in mezo a le ganbe.
Se uno el ghea ciapà la gata (on gran rafredore) el podéa supiarse el naso fin da rosegarse le snarise.
E d’istà, có se ’ndava a mièdare el formento, a se jera inbronbà dal sudore che ’l ne calava dal gropon del colo fin al curiolo de le culate.
Espression bele tanto, da lassarte incantà:
“S’a lo brinco, a ghe ondo el simioto”; “el ghea spira in te le brancaje del piè”; “l’è indrìo come la quinta ganba del musso”; “mi a ne go vuoja de ati, e manco ancora de ciacizi” (mi no soporto moìne o lusinghe de gnissun tipo); “quela lì, par catare na merda, la roessa on loamaro!”
Laorare a ghe ne jera tanto par tuti, come laoro, intendo,
no par i schei.
Na pora védova de la Bassa, slangorìa dal laoro e da i fiòi, no la ghea gnanca el tenpo de dire le orazion prima de métarse a dormire.
E alora, alzando i oci al quadro del Signore sora la testiera del leto, la ghe diséa:
“Mi e Vu, a se ghemo za capìo” e po’ la cascava in te ’l profondo sono.
Adesso, par fare on esenpio, gnissun più parla de carne bèfa. Mi a me aricordo che na olta, on dì a la setimana, a se meteva sù na s-cianta de carne bèfa par fare el desfrito e cunzare le pastassute.
E mi a go spetà ani par capire com’ela che la se ciamava bèfa, sta carne inscatolà, uso la Simental de adesso.
E alora a vegno a savere che in te ’l finire de la gôera i Mericani i magnava le so scatolete de carne.
E so ’l coerceto, a se vedéa scrito “beef”.
E cussì, co la carne bèfa, tante altre parole le xe sparìe insieme co la zente che le usava.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che Nadale porlo èssare…
… coando se sente che da l’inizio de l’ano ghe xe stà quasi 5.000 morti
tra i “migranti”, scapà da la guera e da la fame, nel tentativo de rivare in Italia
e in Europa. Na strage de creature partìe soratuto da Siria, Irack, Somalia, Gambia,
Nigeria, ingiotìe da le aque del Mediteraneo, deventà on simitero senza crose.
de Mario Sileno Klein
Zente de Padova
Maria Lazzari
Na padovana nel “Giardin dei Giusti del mondo” de Noventana, ’pena fora Padova.
de Arturo Baggio
Da Verona
Massa confusion
de Giacinta Dall’ora
|
