|
Zente de Padova
Maria Lazzari
Na padovana nel “Giardin dei Giusti del mondo” de Noventana, ’pena fora Padova.
 | | Eco el volto “ritrovato” de Maria Lazzari, Giusto tra le nazioni. |
Na padovana nel “Giardin dei Giusti del mondo” de Noventana, ’pena fora Padova.
Maria Lazzari xe nata a Padova el 24 agosto 1903. Sposà co Giulio Pinori, la ga vudo na fiola de nome Giuliana. La fazeva l’inpiegata, durante l’ultima guera. La gera segretaria de l’avocato Umberto Merlin, noto antifassista e deputato. La stava qua a Padova in via Marsala, 12.
Dopo l’armistissio de l’8 setenbre del 1943, e el Re gera scanpà da Roma, chela parte de l’Italia che no gera stà ocupà da i Inglesi e da i Mericani xe stà ocupà da i tedeschi. Su sto teritorio italian che gera pressapoco l’Alta Italia se gheva formà la Repubblica Sociale Italiana de i fassisti.
I soldài italiani scanpà da ’e retate de i fassisti e da i tedeschi, i renitenti a la leva de i fassisti i se ga rifugià in montagna o ne le canpagne o i se ga sconti ne le sità. Sti tozi ga formà le prime squadre partigiane.
La fameja de Maria Lazzari gera senpre stà antifassista e in chel tenpo la se gheva dà da fare ne la lota partigiana, salvando tanti soldài sbandài, militari inglesi e mericani e smistando armi e rifornimenti pa i partigiani che gera in montagna. La so casa de via Marsala xe stà el rifugio de tanta zente ebrea che po’ vegneva smistà in Svizzera o portà fin Chioggia par farli scanpare via mare.
Tra l’altro va ricordà la storia de Clotilde Levi Minzi de 78 ani, ebrea, sconta in casa Lazzari par diversi mesi fintanto che so fiola da Ferrara la xe vegnù tòrsela. Anca el fiolo de Clotilde, Marcello Levi Minzi xe stà sconto in casa Lazzari, ma el xe stà ciapà su na retata nel febraro 1940 e portà nel canpo de Auschwitz, dove che el xe morto.
I fassisti i saveva come che la fameja Lazzari la ’a pensasse e particolarmente Maria la gera soto tiro. Schedà a l’uficio politico de la Questura de Padova za a la fine del 1943, ne la primavera del ’44 la Maria la xe stà arestà e interogà al comando de le SS de via Diaz. I tedeschi no xe riussìi a ’vere de le prove e la xe ’ndà finire a i Paolotti, dove che la xe restà par circa na setimana.
Ma ormai la gera tegnù de ocio e el 16 setenbre 1944 la xe stà caturà insieme a so sorela Parisina parché un disgrassià ghe ga fato la spia e ga contà a le autorità fassiste che la gaveva ’jutà un ebreo.
Le xe stà liberàe subito, ma dopo qualche giorno le xe stà ancora arestàe. Parisina la xe stà mandà al lager de Bolzano e Maria prima la xe stà mandà nel penitensiario venessian de Santa Maria Maggiore e dopo ne le carceri del Coroneo a Trieste.
El 10 genaro del 1945 Maria la xe stà deportà nel lager de Ravensbrück a 90 chilometri da Berlino dove che la ze restà fin a metà aprile. Ze stà durante sto viagio in Germania che Maria la ze riussìa a butare fora dal caro bestiame, dove che la gera stà sarà, na létara par so sorèa Parisina dove che la ghe contava le so peripessìe, létara che ze stà rancurà da na persona che no se ga mai savudo chi che la fusse e che la ga fata rivare a la so fameja.
Verso la seconda metà de aprile 1945 le trupe russe gera drio rivare vissin Berlino e alora le autorità tedesche le ga dà l’ordine de trasferire i prigionieri del lager verso Bergen-Belsen. Ga vudo inissio la marcia a piè de chei puareti za sassinài da ’e privassion e da la fame e la xe stà na roba terìbie. Maria Lazzari, ridota a i estremi, no ga resistìo a tanta fadiga e la xe morta. Morta par èssarse rivoltà contro i soprusi de na ditatura, morta par aver lotà contro la prepotensa, morta par ’ver ’jutà la zente ebrea che sercava de salvarse da i forni a gas, morta par ’ver ’jutà i nostri tozi che reagiva e scanpava in montagna. Morta pa’ la libertà.
Finìa la guera, i ghe ga riconossùa la so partecipassion a la guera partigiana ne la Brigata Franco Sabatucci con el grado de capitano. Pa le so benemerense ne l’aiuto a i ebrei xe stà inserìo el so nome nel Giardin de i Giusti a Noventana. Alcune scole xe stà dedicà al so nome. El Comune de Padova ghe ga dedicà na strada: la Passeggiata Maria Lazzari.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che Nadale porlo èssare…
… coando se sente che da l’inizio de l’ano ghe xe stà quasi 5.000 morti
tra i “migranti”, scapà da la guera e da la fame, nel tentativo de rivare in Italia
e in Europa. Na strage de creature partìe soratuto da Siria, Irack, Somalia, Gambia,
Nigeria, ingiotìe da le aque del Mediteraneo, deventà on simitero senza crose.
de Mario Sileno Klein
Zente de Padova
Maria Lazzari
Na padovana nel “Giardin dei Giusti del mondo” de Noventana, ’pena fora Padova.
de Arturo Baggio
Da Verona
Massa confusion
de Giacinta Dall’ora
|
