|
Editoriale
Auguri che ’l sia on ano d’amore
… e par “amore” intendemo tuto quelo che xe possibile fare: de ben, de bon, de belo, de grande e de pìcolo, de utile a tuti, de aiuto a chi ga de bisogno, de sostegno par chi no ghe la fa da elo solo. No vedemo altra maniera par puntelare la casa de l’umanità e métare al coerto le tanpeline de la nostra vita.
Se insiste a parlare de pace, de armonia, de solidarietà… ma in pratica no se vede segnài che ne porta fora da le brècane senza stralossarse. Vardemo in casa nostra, te ’l nostro Paese: ogni giorno che passa se vede aumentare contrasti, barufe, scontri, discussion longhe come l’ano de la fame. E so questo ghe xe chi che ghe vive, ghe goadagna sora, ghe ne ’profita scrivendo e ciacolando da la matina a la sera.
Vedemo – parché i ne lo fa anca védare – che sto sberegare el sucede al Governo, a la Region, al Comune, a la partìa de balon, a i convegni, al comizio, ne le fàbriche, in uficio, in fameja… Mai che se diga: “queste sarìa le me idee, ma riconosso che anca quele de i altri ga la so parte de reson.” Continuemo a lamentarse de la crisi economica: mai che se decida de fare “volentieri” de i sacrifici. Se li faséssimo tuti, e non solo na parte de la popolazion, forse se podarìa nàrghene fora; ma preferimo brontolare e continuare a zercare colpe ne i altri, pitosto che inpegnarse in prima persona.
El canbiamento del mondo el scominzia dal canbio de mentalità che posso fare mi.
Eco parcossa dovemo métare la matassa de l’amore so ’l guìndolo e far sù gemi de filo par fare chela malia a feri – on drito, on roverso − che ne méta al riparo dal fredo de l’egoismo individuale. Cussì, ben infagotà de sani valori, podemo ofrire a i altri solo caldi gesti de amore, de gioia e de serenità: on soriso, na parola bona, on saludo, on consilio, na streta de man, on cafè insieme, on gnente che faga sentire manco solo on porocristo.
Xe stà dito che “l’amore può rendere bello anche ciò che sembra brutto”. Se ’l xe vèro!... Eco parcossa me mama apena che son nato e che la jera tentà de butarme via da quanto che jero bruto, no la lo ga fato: vandàndome co i so oci pieni de amore, la me ga tegnù, forse pensando: “bruto in fassa, belo in piazza”. Questo, a la fine, no ’l xe sucesso e me dispiase avere deluso me mama, parché a son restà quelo de senpre… però el so gesto d’amore la me lo ga trasmesso co l so late e co l’esenpio.
Me ricordo in chei ani de miseria, in tenpo de guera, quante persone vegnéa a magnare on piato de minestra o na feta de polenta e sardelon a casa nostra. Al dopodisnà, guài che manchesse el pegnato de vin so la stua, co na scorza de pomo o na sgussa de mandarin, parecià pa ’l vecioto, ormai deventà uno de fameja, che, dopo ’verse scaldà fora na s-cianta e bevù la so tazzeta de vin caldo, el naséa via felice e contento, intabarà fin a le rece.
La beleza de chei pìcoli gesti amorévoli desfava el giazo de le sgiàvare e scaldava el core de sta pora gente.
Da alora xe passà tanto tenpo, ma i problemi del bisogno de bona volontà, i xe senpre qua che i ne speta al varco: ocore inventarse na rivoluzion de pensiero, magari copiando la verità de la rivoluzion cristiana.
Dante Alighieri stesso, ne la Divina Comedia el ghe fa dire a Ulisse: “fatti non foste a viver come bruti ma per seguir virtute e conoscenza”. Se l’omo el zerca e el dòpara la verità, la bontà e la beleza messe insieme, el ga a so disposizion chela leva che pole roersare el mondo.
Quante brute robe, quante cativerie, quante malefate se podarìa evitare, se solo ghe déssimo bada a chela forza naturale che el Creatore ne ga regalà: l’amore, l’unico che pole salvarne da ogni tipo de crisi.
Con questa precisa convinzion, el nostro augurio xe quelo che ognuno possa inparare a volere e a volerse ben, se volemo tentare de vìvare ne la tera del ben, del bon e del belo.
Questo xe l’unico girotondo che pole canbiare el mondo, senza che ’l resta solo e senpre on sogno.
L’Editore e la Redassion augura a tuti
on 2017 de ripresa economica e voja de far ben.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri che ’l sia on ano d’amore
… e par “amore” intendemo tuto quelo che xe possibile fare: de ben, de bon, de belo, de grande e de pìcolo, de utile a tuti, de aiuto a chi ga de bisogno, de sostegno par chi no ghe la fa da elo solo. No vedemo altra maniera par puntelare la casa de l’umanità e métare al coerto le tanpeline de la nostra vita.
de Mario Sileno Klein
Da Vicenza
La Madona del Magnificat
de Ines Scarparolo
|
