|
Da la Bassa Veronese
Lucio Maestrello
 | | L’ing. Lucio Maestrello con, a sinistra, la cognà Erica, e, a destra, i amici Teresa e Arnaldo Buratto. |
On fiolo de la Bassa Veronese a la NASA (National Aeronautics and Space
Administration), l’Ente par le Atività Spaziali e Aeronautiche.
L’è propio vera: se sa indo’ che se nasse, ma no se sa indo’ che se more. Sto proverbio l’è stà rispetà anca in sto caso de Lucio Maestrello che l’è nato a Legnago (Verona) el 4 de marzo 1928, da Ernesto Maestrello e da Elvira Bertelè, e l’è morto in Florida (USA), a Ormond Beach, el 25 de setenbre 2016.
L’è stà el primo nato de sié fiói: Lucio, Giancarlo, Gianpietro, Luciana, Maria Pia e Francesco. La fameja de Lucio, ’ncora butin, la s’à trasferìa a San Pietro di Morubio. Del so stare in sto paese della Bassa, ne dà conferma, oltre che i so parenti, na so testimonianza, scrita in tel me “Don Luigi Mozzambani”. Lucio Maestrello el scrivéa:
“Neuport News - Virginia, USA, 10 maggio 2003
I miei primi ricordi incominciano dal periodo dell’asilo, quando don Luigi veniva nel pomeriggio a salutare bambini e bambine. In quel periodo, avrò avuto cinque o sei anni, ricordo che appoggiava la mano sulla mia testa come una carezza. Più tardi frequentavo la canonica per giocare con il nipote Guido. Chiedevamo i soldi per comperare la carta velina per fare gli aquiloni. Ho partecipato al servizio della S. Messa come chierichetto e, come tutti i giovani, combinavamo delle birichinate. Don Luigi Mozzambani era sempre indulgente, umile e paziente con noi.”
In te i ani de quando l’è ’ndà a scola, savemo che l’à studià in tel colejo salesian de “Don Bosco” e dopo l’à frequentà l’Istituto “Galileo Ferraris”. A l’etá de 22 ani, Lucio l’à incontrà el so primo amore, Caterina, che alora la gavéa 17 ani. Ela, da Londra, l’era capità in vilegiatura a Carisolo (TN), in Val Rendena, co’ la so fameja. Cussì, poco dopo, Lucio l’è ’ndà a stare de casa a Londra par stare vizzin a la Caterina e anca par continuare i so studi sora la fisica e l’ingegneria a l’Imperial College de Londra.
Dopo sete ani che iè stà morosi, sti du butèi i s’à sposà el 30 de novenbre del 1958 e i s’à trasferìi in Canada, ’ndo’ che Lucio, brao e inteligente come che l’era, l’è stà invità a frequentare l’Università de Toronto. Ma quanti sacrifici che l’à dovùo conbàtare: lu no ’l gavéa mia schei da torse na màchina e no se sa quanta strada a pié l’abia fato par nare da casa al logo de i so studi.
Là l’à incontrà el famoso prof. Herb Ribner, cussì, dopo tanto laorar e studiar insieme, l’è deventà un suo estimato collega e po’ on so caro amico par tuta la vita. In chel periodo là, che i à laorà insieme, Lucio l’à podù finire el so Master e dopo el s’à anca guadagnà el Dotorato a l’Università de Southampton in Acustica e Fluidodinamica.
Dopo la fine de la seconda guera mondiale, quando ghè stà la guera freda tra i Stati Uniti d'America e aleati de la NATO, e l'Unione Sovietica, el dotor Lucio Maestrello co’ so mojer Caterina e i fiói che intanto iè nati, i s’à trasferìo a Seattle, in tel stato de Washington. Lì Lucio el s’à messo insieme a on s-ciapo de sienziati europei che i laorava in tel laboratorio de ricerca sientìfica de la famosa casa de aeroplani BOEING, laorando assè in sto centro de studio e de ricerca par sienziati de tuto el mondo.
In tel 1970, quando ghera in movimento el programa spaziale americano, Lucio Maestrello el s’à spostà co’ la fameja a Hampton, in Virginia, par laorar al Centro de Ricerca Langley de la NASA. Qua l’è stà selto a far parte del comitato par el primo volo de la navesela spaziale, fondà da el Presidente de i Stati Uniti de alora, Richard Nixon.
Par tute ste conquiste e sti meriti, Lucio l’à ricevù on gran riconossimento, quelo de la “Fluid Thompson Fellowship” da l’Istituto de Tecnologia de la California, e la medaja par la “Eccezionale Realizzazione Scientifica” (che riguardava el sistema par ridure le vibrazion rumorose de l’aereo) da la NASA.
Par farghe onore a la so prestigiosa cariera, el dot. Maestrello l’è stà parfin invità da l’Università de Cambridge a tegnere on seminario sora la “Dinamica non lineare, caos e controllo della turbolenza”.
Dopo la pension, a l’età de 75 ani, Lucio e so mojer Caterina iè ’ndè a stare de casa (ultimo sanmartin) a Ormond Beach in Florida, cussì da stare piassè vizzini a so fiola piassè pìcola, Andria, e a la so fameja. Chialtri fiói iè tuti quanti laureè in medicina e i se ciama: Margherita, Christopher e Steven, che i ga regalà ben diese neodi.
Insoma quela de Lucio l’è stà na vita intiera, vissùa con fede e sostegnùa da i valori morali, nel ricordo de le parole de San Giovanni Bosco: “Se na persona la vol fare del ben, la deve aveghe corajo, èssere pronta a fare sacrifici, èssere tènara co’ tuti quanti e mai tratare nissuni con indifarenza.”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri che ’l sia on ano d’amore
… e par “amore” intendemo tuto quelo che xe possibile fare: de ben, de bon, de belo, de grande e de pìcolo, de utile a tuti, de aiuto a chi ga de bisogno, de sostegno par chi no ghe la fa da elo solo. No vedemo altra maniera par puntelare la casa de l’umanità e métare al coerto le tanpeline de la nostra vita.
de Mario Sileno Klein
Da Vicenza
La Madona del Magnificat
de Ines Scarparolo
|
