|
Da Vicenza
La Madona del Magnificat
 | | Madonna del Magnificat, afresco de Battista da Vicenza (secolo XV), te la Penitenzieria del Santuario de la Madona de la Misericordia de Monte Berico (Vicenza). |
Qualo dono pol èssarghe de pi grando de quelo de na vita picinina che sbocia, a testimoniansa de l'amore del celo par niantre creature? E mi, che son drìo vìvare propio in sto periodo le emossion pi bele, spetando ca me riva un altro nevodeto, me intenerisso, comossa e piena de speransa, davanti a l'afresco de la “Madonna del Magnificat” de Monte Berico.
Sta sacra imàgine, de cm 150 x 127, realizà fra ’l 1428 e el 1433 dal pitore Battista da Vicenza, la xe stà catà solo tel 1932, durante de i laòri te la ceseta gòtica (quela a fianco de la Basilica), costruìa poco dopo de la seconda aparission de Maria a Vincenza Pasini. Ancora ’desso sta beìssima "Madonna del Parto" o "dell'Attesa", pol èssare amirà te la Penitensieria de la Basilica. El quadro mostra la Vergine sentà sora on trono de marmo decorà, co na tònega rossa (colore de la vita) e on manto del color del celo che la roveja fin a i pìe, lassando parò descoverto e ben visìbile el gnaro santo indove xe drìo cònpiarse el miràcolo de la vita. El significato de tuto sta in sto particolare; difati, tiràndoghe par sora del disegno dó striche diagonali, se pol védare che ’l centro esato de la figura xe propio la gaja de la Madona. Maria la ga so ’l viso na espression de dolcessa particolare e tel stesso tenpo de riflession.
El nome "Madonna del Magnificat", col quale a Vicensa xe conossuda sta imàgine, xe dovudo al fato che Maria la tien verto su i zenoci on libro che ghin riporta el primo verso: "Magnificat anima mea Dominum et exultavit..." E sicome l'Hymnus Sanctae Mariae xe senpre stà, fin dal Medio Evo, cantà te le celebrassion de la quarta stimana de l'Avento, eco che l'Artista ne fa capire che la gravidansa xe za sul finire e che Nadale xe drìo rivare. Na particolarità: dadrìo de la Madona, de pincolòn dal sofito, casca na tenda rossa co visìbile qualche decorassion in oro. Ma no ghe xe i angeleti a tegnerla sù, come in altre rafigurassion mariane. La Vergine xe sola, come spesso vien lassà sole tante mame che porta ’vanti, magari tra le tribolassion de la guera o de la miseria, na gravidansa.
Dal XIII sècolo e fin a la Controriforma, jera tante le copie de spusi che comissionava a i pitori ste "Madonna dell'Attesa", par domandarghe a la Mama Celeste la grassia de ’ver na creatura o assistensa durante ’l parto, o par ringrassiarla de na gravidansa felicemente portà a conclusion. Pi tardi, xe ’ndà via via sparindo sto gènare de òpare, parché no paréa bon che la Madona vegnesse mostrà come na dona sènplice, na mama a tuti i efeti e se ga preferìo rafigurarla pitosto come na Regina.
Par fortuna i nostri frati de Monte, dopo de ’ver recuperà sto beìssimo afresco, i ga sercà de tegnérghine da conto in maniera particolare, propio parché ’l continoasse a èssare sìnbolo de speransa par chele mame che, co fede e trepidassion, afida lore stesse e la so creatura a l'amore de Maria Santissima.
Altri dó dipinti co la Vergine che speta, se pol catare a Malo, te la cesa de Santa Libera, e a San Vito di Leguzzano. Senpre so ’l giornaleto de Radio Oreb, go leto che le Edizioni Paoline stanparà presto on santin co na preghiera, scrita ’posta par le mame, a la nostra "Madonna del Magnificat".
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri che ’l sia on ano d’amore
… e par “amore” intendemo tuto quelo che xe possibile fare: de ben, de bon, de belo, de grande e de pìcolo, de utile a tuti, de aiuto a chi ga de bisogno, de sostegno par chi no ghe la fa da elo solo. No vedemo altra maniera par puntelare la casa de l’umanità e métare al coerto le tanpeline de la nostra vita.
de Mario Sileno Klein
Da Vicenza
La Madona del Magnificat
de Ines Scarparolo
|
