|
Da i Coli Euganei
Ridemo, gente!
 | | L’atore Ettore Petrolini ne la comedia musicale “Gastone” (1924). |
Che bei che gera i proverbi de na volta e quanti ghe ne vegneva diti a casa nostra. Adesso che sento el fredo farse ’vanti, me penso a quéo che diséa: “A genaro, tuti i gati i va in gataro” e st’altro: “La strigheta, tute le feste tira a caseta” e ancora: “Dopo Nadàe, ogni dì xe Carnevàe”. Questo no xe che ’l me diga tanto, parché de Carnevàe no xe che mi gabia tanti ricordi, anca parché on tenpo no se faséa tanti bagurdi.
Se gera on ano fredo, se staseva tuti arente al fogolaro e par tegnerne boni a turno i grandi ne contava le storie de i so tinpi, opure i ne faséa de i indovinèi, e se i gera de bon umore, i ne cantava anca qualche canta. La pi famosa la gera quea de nono Giacomo che fin da picenini el cantava a noaltri tri fradèi e el ne cunava so i so zenoci e po’ el scumissiava:
“Borobonbòn e che frizeva el pesse, e co le so ciape el lo rostìa. Ghi n’è petà na giossa so le braghesse, alora Boronbonbòn se manedava a frìdare el pesse, Borobonbòn Borobonbòn. La casa è granda, la parona è bela, disighe che la vègna fora co na mortadèla. La casa è granda, la parona è fina, disighe che la vègna fora co on sacheto de farina, Borobonbòn Borobonbòn.” No la finìa de certo lì la filastroca; noantri se stava lì a scoltare el nono incantà, a oci spalancà e no se gera mai stufi de scoltarlo e se continuava a fàrghea ripètere. “Basta − diseva qualcun − che el nono xe stufo.” Ma el nono no se stufava mai parché el ne voéa on saco de ben.
Có rivava Carnevàe po’ rivava ogni ano davanti a la porta de casa on toso, cantando na canta che se ripetéa ogni ano. Che cantava el gera on toso alto, pàido e co na spece de jacheta tuta taconà. Al nono che ghe piaseva domandarghe da dove che ’l gera e che laoro che ’l faséa, el gavéa risposto che ’l gera da on paese on poco pi lontan dal nostro, che ’l gavéa fato la canpagna de le biétole in Francia, ma al momento el gera sensa schei e el gavéa fame. Intanto el scumissiava a cantare: “Carnevàe xe rivà, la Quarésima ghe va drio, e xe qua la primavera, siora parona bona sera, e xe qua el Torototela e xe qua el Torototà, co tri quarti de camisa e el gilè tuto sbregà. Parona la varda so ’l cassetin, se la cata on salamin, se on salamin el ghe xe massa, la ghe fassa la metà, on pocheta de farina, e el sachetin xe preparà. E nosèe no ghin voemo parché ghemo i denti ciari, ma la carne de i becari e i salami ben insacà. Tajè on salado sensa pensarghe sora, parché tacà a la pèrtega ghe ne xe ancora. E xe qua el Torototela, e xe qua el Torototà, co tri quarti de camisa e el gilè tuto sbregà…” Có rivava qualcun co la mancia opure na sèssola de farina, lu el ringrassiava, fasendo anca on mezo soriso e el ’ndaséa via col so sachetin de farina in spala, caminando de tranbalon. E intanto noantri el se seguìa co i oci, sercando de ricordare la so canta de Carnevàe par inpararla a memoria e po’ cantarla có gera el caso.
Serto che alora se ne inparava a memoria tante robe. Me ricordo on programa che se scoltava a la radio, me pare che ’l se ciamasse la “Bisarca”: i faseva de chele batute proprio da rìdare a crepapele. Me pare che i fusse in du che cantava: Febo Conti e Liliana Feldmann. Mi li scoltava co atension e inparava a memoria e po’ cantava, fasendo rìdare chi che me scoltava. Alora vedemo come che gera sta filastroca de la radio: “Militari, borghesi e ragazze, noi cantiam per le strade e le piazze, e cantando ogni guaio ci passa, siamo Febo, Liliana e grancassa. E con questa sinfonia, noi andiamo a incominciar. Una storia in poesia, vi vogliamo raccontar…” E seguìa la storiela senpre alegra e ridanciana. Vedemo se me ne ricordo qualcuna: “On toso se gera inamorà de una che se ciamava Renata e tuto el dì e anca de note, sentà soto la so finestra el ripetéa: − Se Renata me soride, son contento, se Renata vien a la finestra, son contentissimo. − E, sicome che gera fredo e la Renata no se faséa védare, serenata ogi, serenata domani, el ga inventà la Serenata. Ma in ultima dal fredo l’è morto de broncopolmonite.” E qua ghe gera na bòta de grancassa par invitare quei che scoltava a la risata.
E po’ ghe gera la batuta: “Siore e siuri mi go on nipotino che ga la memoria cussì elastica, che so pare se ga fato le tirache (o mèjo le bretelle).” E questa de Petrolini: “Na fameja gavèa on toseto che se ciamava Gastone, ma i gera cussì poariti che so mama lo ciamava TONE par sparagnare el GAS.”
Ma intanto quei de la radio i continuava disendo: “Siamo qui, in questa pubblica piazza, un po’ per celia, un po’ per non morir di fame. Vènghino, vènghino, siori…” Dopo aver fato e cantà la so storiela, có la gera verso la fine: “E guardino le guadie, servino le serve, notino i notai, ammirino gli ammiragli. Il nostro discorsetto, sarebbe, per così dire, terminato, e pirolino e uno e pirolino e due e pirolino e tre…” Finìmola qua sta storieta parché la sarìa anca massa longa.
Comunque go sercà in tel libro de la mente e no pensava gnanca mi de ricordarme ste storiete che ne faséa rìdare tanti, tanti ani fà. Chissà mai se qualcun che scoltava la radio pi de na trentina de ani fà, se ricorda ancora ste robe. Alora se ridéa co poco e, dise el proverbio che ’l riso fa bon sangue e mi son d’acordo che bisognarìa rìdare de pi.
Qualcun me dirà che de sti tinpi ne resta poco da rìdare, ma ciapemo chel poco e fémola na bea ridada. Che beo xe vìvare senpre inmusonà? “Muso duro e bareta fracà” i diséa i nostri veci a quei che no ridéa mai. Adesso i la ga quasi tuti la bareta fracà. I te passa arente e par che gnanca i te veda. Ridemo, gente, se se pol. “Ridi fin che puoi” diséa me nono, “che ’l tribolar no manca mai.”
On dì go leto so le létare al Diretore in tel nostro Quatro Ciàcoe, che ghe xe poco de alegro in te i nostri racunti. Che la sia cussì? E alora scoltè questa qua: “On mato va a l’ospedàe e dopo qualche dì el ghe scive a so mama, disendoghe: Cara mama, oggi mi hanno fatto i raggi, domani mi faranno i cerchioni, e per domenica spero di tornare a casa in bicicletta.”
A la prossima e, intanto, eviva l’alegrìa!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri che ’l sia on ano d’amore
… e par “amore” intendemo tuto quelo che xe possibile fare: de ben, de bon, de belo, de grande e de pìcolo, de utile a tuti, de aiuto a chi ga de bisogno, de sostegno par chi no ghe la fa da elo solo. No vedemo altra maniera par puntelare la casa de l’umanità e métare al coerto le tanpeline de la nostra vita.
de Mario Sileno Klein
Da Vicenza
La Madona del Magnificat
de Ines Scarparolo
|
