|
Da Arzergrande (PD)
Na ventada de novo
L’inissio de l’ano el ga senpre qualcossa de particoeare. I mesi fredi de l’inverno i ne porta a rancurarse, a tegnere da conto de pi el nostro corpo, par no subire i maeani stajonài.
No me piase tanto l’inverno e se un poco eò tegno in considerassion xe soeo parché el xe eà porta che se vèrze so’ eà primavera. Ma, comunque sia, che l’inverno me piasa o no, l’inissio de l’ano el xe come na ventada de novo. In tanti i buta via ’e robe vece, anca fora da eà finestra, vardando ben che soto no ghe sia nessun. Questo par queo che riguarda ’e robe materiài.
Però so sto dì se fa el pieno anca de boni propositi, de voja che ’e robe canbia, de bona volontà par sercare de éssarghe in tuti i sensi. E no poe no vegnerme in mente i inissi de i me ani da toseto, vissùi so sta casa che me ga visto nàssare.
Ogni ano che rivava me dava come l’inpression de ricomissiare da capo eà me zóvane vita. Sentivo come na moea che me scatava dentro e me portava el pensiero a despojarse de ’e robe vece e a rivestirse de nove.
Oncò el me desiderio de novo forse el xe pi forte de prima e me piasarìa tanto che fusse proprio vero che se podesse, so sto dì del primo de l’ano, sarare na porta e vèrzarghene ’n’altra e trovare tute ’e bone intension del mondo riunìe a discòrare so come fare parché torna a fiorire chel’àlbaro che se ciama speranza. “Massa beo par éssare vero.” Eò so, ma me piase oncora crédare che ghe sia senpre na man a eà quae tacarse quando se core el ri-scio de cascare.
Me piase, soratuto so sto dì, considerare che tuto poe éssare, parché se xe possìbie ’e assion cative, parché no poe éssare vero che sia possìbie anca quée bone? Sarò forse un sognadore ma ’e xe tute robe che se poe fare a partire col darghe un novo indirisso al pensiero e a eà strada che ’l ’ndarà a fare. L’inissio de l’ano, a ben vardare, el xe un dì come ’n altro, ma el contiene eà responsabiità de scomissiare col piè giusto par fare in modo che, percorendo i mesi, no se strajùssa so qualche cagnato in fora…
Tanti auguri a tuti. Bon ano e bona continuità de vita.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri che ’l sia on ano d’amore
… e par “amore” intendemo tuto quelo che xe possibile fare: de ben, de bon, de belo, de grande e de pìcolo, de utile a tuti, de aiuto a chi ga de bisogno, de sostegno par chi no ghe la fa da elo solo. No vedemo altra maniera par puntelare la casa de l’umanità e métare al coerto le tanpeline de la nostra vita.
de Mario Sileno Klein
Da Vicenza
La Madona del Magnificat
de Ines Scarparolo
|
