Robe de Ciósa

“El Cristo” de San Doménego

El “Cristo de San Doménego”.

La cèsa e l’isola de San Doménego.

El Crocifisso scolpìo in legno
Dal 1812 se trove ne la cèsa de San Doménego a Ciósa un maestoso Crocefisso che tuti ciama “el Cristo”. A ze un’imagine gigantesca che misure in tuto in altessa 4,87 metri e in larghezza m 3,50, pesante press’a poco 180 chili. La cróse ze a forma de àlbaro co i brassi fini curvi e pieni de gropi. In sima se vede un pelican co sóto la scrita: “Mors Christi dura monstratur in ista figura, Jesus Nazarenus Rex Judeorum. Passio Domini”. L’imàgine del Cristo, in legno de salice coverto da ’na sotile tela de lino piturà a colori naturali, la xe internamente voda, forse per rèndare pi fàssile el trasporto. La testa ze pi del solito piegà su la spala destra. El viso esprime el strassio del Crocifisso. La corona de spine pare fata de un cordon solo, i cavéi vien zo fluenti e quasi simetrici. El corpo se distingue netamente da la testa per tuta ’na serie de particolari che fa pensare quasi che a sia stà creà da ’n’altra man. I brassi ze come stirà, le còstole ze esageratamente in rilievo, el ventre gonfio. I zenoci spòrse per 85 sentimetri, el femore ze acorcià.

La misteriosa origine del «Cristo»
Rare e poco atendibili ze le notissie sicure a riguardo de l’origine del “Cristo de San Doménego”, del quale se celebra la festa oni ano la doménega otava de Pasqua (’na volta deta “doménega in Albis). Fin a diversi ani fà per l’ocasion se fèva anche ’na procession per el Corso col “Cristo”, ’na cerimonia adesso abolìa e che se efetua solo ne le grande ocasion.
Su la storia del “Cristo” s’à imposto la legenda e se ne tramande adiritura dó version. La prima dise che el dissepolo oculto de Gesù, Nicodemo, dopo avere fissà ben el Maestro pendente da la croze, a s’èbia messo a l’opera per rapresentarlo scolpìo nel legno. Ma, sentendo che ghe mancava le fòrse al momento de ricavare dal legno i lineamenti de la testa, l’à invocà l’agiuto celeste e a s’à mezo indormensà. Co a s’à svegià, l’à visto la testa completamente scolpìa e l’à pensà che questa fusse opera de i ànzoli.
’Sta prima version la ze trasmessa anche per iscrito atraverso ’na incision in rame che se trove a i pìe del Crocifisso. La ne spieghe pure che l’imàgine ze stà da i confradèi de la Socetà del S. Sepolcro trasferìa a Iesi ne le Marche. La s’à animà di fronte a S. Pietro Martire (no a ze S. Pietro l’apostolo de Gesù) e l’à parlà co lu. Su preghiera del Santo, el “Cristo” ze stà trasportà su ’na nave in teritorio veneto. Ma, sorpresa da ’na burasca, la nave à fato naufragio: cossì el Crocifisso ze aprodà al porto de Ciósa e avistà da i Padri Domenicani, che co tanta venerassion l’à custodìo per secoli. La legenda contien un anacronismo, che qua no ze el caso de precisare. Quelo che se sa ze che el Crocifisso a ze restà a Iesi fin al 1479.
La seconda legenda ze contegnùa in t’un manoscrito del 1677. La ne informe come el “Cristo”, in epoca imprecisabile, ze stà trovà presso le palafite del ponte de San Doménego verso l’alba. A ze stà portà in Domo dove se pensava de custodirlo per sempre. Ma durante la note el simulacro a s’à trasferìo miracolosamente sul logo dove che a gera stà trovà, siché el vescovo l’à pensà che a volesse stare e avere el so domicilio presso la cèsa de i Padri Domenicani de San Doménego. La legenda dise anche che a sia opera de S. Luca evangelista, che ghe n’avarìa scolpìo in tuto quatro. A ze restà a Costantinopoli fin al 1453, fin a quando Maometo à conquistà la sità. I so soldài i avarìa butà in mare tuti i ogeti sacri che se troveva ne la cèsa. Per volere divino l’imàgine, galesando, ze arivà su le aque fin a Ciósa.
Le dó legende concorde sul fato del prodigioso aprodo, un particolare che ricore spesso in tante tradission del gènare. Ma i Domenicani a ’sto fato i ga credesto e i l’à trovà perfetamente espresso nel verseto 14 del salmo 75, inciso tante volte nel corso del tempo, come pure nel 1812 sul fronton de l’altare atuale: «Nel mare è la sua vita, e il suo sentiero nelle grandi acque, ma le tue vestigia non si conoscono.»

[torna sopra]