|
Editoriale
Mama, go sen!
L’alarme xe partìo; el problema de l’aqua riguarda tuti quanti, conpreso el pìcolo mondo indo’ ghè piantà le nostre raise. L’afare se fa serio: bisogna pensarghe oncò, par no piànzare doman.
 | | Femo calcossa parché le fontane no le se ridusa cussì! |
Sderenà par tute le corse fate in giro pa i canpi, fin che ’l sole no ’l va in catinora, ècoli córare da so mama, i nostri putini, in zerca de aqua:
“Mama, go sen!”
“Bruti demòscani, xe ora che vegnì casa: a si tuti moji negà. Tolive la caza lì sora ’l seciaro… stè ’tenti a no spàndare l’aqua che la vale òro!” ghe racomanda la mama.
Anca na volta ghe jera el problema de l’aqua. Magari non par le cause de oncò: el pozo no ’l ghe jera in tute le corte, bisognava nar tòrse l’aqua co i seci tacà al bigòlo, a la ponpa (el mato), al centro del paese. Par no dover fare tanti viaji, ocoréa tegnérsela da conto. Adesso, oncora de pi: la costa on ocio de la testa e in tanti posti la scomizia a calare o adiritura a mancare.
Questo de l’aqua, dunque, el xe on problema vecio: a xe on tòco che ghe xe sta situazion crìtica. Giorni fà, in spiaja a Rosolina, a go scoltà el discorso tra du òmeni ch’i se diséa:
“Gheto sentìo che a Roma no ghe xe pi aqua?” ga dito uno.
“E i giornài e telegiornài no i fa altro che straparlare del razionamento de l’aqua. I me fa propio rìdare!” ga dito st’altro.
“Parcossa xe che te vien da rìdare?” ga domandà el primo.
“Parcossa? Noantri l’aqua no la ghemo mai ’vùa al me paese e i giornài no ghe ne ga mai parlà. Pensa che ghe jera uno co ’l careto e na bota che ’l ’ndava tuti i giorni a tòre l’aqua te la fontana de on paese vizin e po’ el faséa el giro de le fameje par la distribuzion. Ancora oncò na autobote la va a tòre l’aqua. Par noaltri l’aqua corente el xe on sogno proibìo!” ga dito l’omo, prima de alzarse, pitosto intavanà, par nare verso l’aqua del mare. E lì xe finìo el discorso.
Quei che sa i dise che el pianeta Tera se sta “riscaldando” a na velocità mai sucessa ne i ultimi mile ani. Secondo la Nasa, i deserti deventa senpre pi grandi, le falde xe drio secarse: se no se intervien, tra on secolo la Tera la sarà meza morta e con ela i èsseri umani.
Anca secondo l’Onu, semo drio nare incontro a na situazion devastante, soratuto a causa del “sistema produtivo”. Pensè che par fare on chilo de cafè vien consumà 20 mila litri de aqua. Tuti i prodoti che utilizemo, a parte l’aqua che doparemo par bévare, cusinare e lavarse, i vien realizà co na quantità enorme de aqua. Par capirse, par na taza de tè, tra coltivazion, racolta, lavorazion e inscatolamento ghe vole 9 mila litri de aqua; par fare on paro de scarpe de corame a ghe vole 8 mila litri de aqua e 20 mila par na majeta de coton.
Questo ne fa capire che, se no metemo la testa a posto ‒ l’industria par prima, ‒ se profila on futuro disastroso par quei che vegnarà dopo de noantri.
Alora vien da domandarse se podemo fare calcossa nel nostro pìcolo. Giusto: dovemo doparare l’aqua con pi criterio. Anca ne i giorni de stofego de agosto, con “Lucifero” che ne brusava i corni, se uno ga fato na docia de manco, el ga dà el so contributo al problema generale de l’aqua.
Te on albergo de l’Alto Adige, go leto, in bagno, sto aviso par el cliente: “Gentile ospite, non puo immaginare quante tonnellate di asciugamani vengono lavati inutilmente negli alberghi di tutto il mondo. Resta a lei la scelta a contribuire: asciugamani a terra significa che sono da cambiare; gli altri riposti al loro posto, significa che vanno usati un’altra volta. In rispetto per la natura.”
Vol dire che el problema de l’aqua xe sentìo e che, volendo, tuti dovemo e podemo fare calcossa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Mama, go sen!
L’alarme xe partìo; el problema de l’aqua riguarda tuti quanti, conpreso el pìcolo mondo indo’ ghè piantà le nostre raise. L’afare se fa serio: bisogna pensarghe oncò, par no piànzare doman.
de Mario Sileno Klein
Da la Bassa Padovana
El canpanile de Urbana, on deposito de storia
El someja a ’na tore medioevale, ma i merli i ga 120 ani; in basso el ga piere romane e a metà via altre del 1300. Ste piere xe stà studià anca da l’Università de Padova
de Roberto Soliman
|
