Da la Bassa Padovana

El canpanile de Urbana, on deposito de storia
El someja a ’na tore medioevale, ma i merli i ga 120 ani; in basso el ga piere romane e a metà via altre del 1300. Ste piere xe stà studià anca da l’Università de Padova

La meridiana co le Ore Canoniche de la Regola de S. Benedetto e lapidi del 1300.

La piera col “cavalin” o con l’”agnelo”.

Se ve càpita de passare par Urbana, a on zerto punto del paese, cressù come tuti coéi de canpagna drio ’na strada, a vedarì el canpanile de la parochiale che se distingue par i merli in zima. Ma se ve fermè e desmontè da la màchina, a podì, giràndoghe atorno, rèndarve conto che chi che ga fato sto canpanile el gavéa gusto e coalche conossenza de la storia, e che i preti del Coatrozento, coando che i ga demolìo e ricostruìo la cesa, i ga conservà le piere vece par farle métare in te ’sto canpanile. I merli el ghe li ga zontà don Tito Dalla Valle, in te ’l 1896, parché a ghe piaséa le mura de Montagnana, e alora no ’l ga badà a spese, modificando anca la faciata de la cesa par farla somejare a coela del duomo de ’stà cità.
Ma le robe pi interessanti le se cata a la base, e le xe coasi tute piere de trachite de i Coli Euganei, con inscrizion e grafiti o con lavorazion che fa capire che le gavéa coalche funzion in te ’na cesa antica, o adiritura le podarìa vegnere da coalche casa romana abandonà, dato che el paese el ga chel’origine lì.
Le xe piere che parla. Come coela verso el sagrato, tacà a la porta d’entrata del canpanile, che la ga inciso: A.D. MCXXXX IND (Anno Domini 1140 INDizione), e la xe incavà coasi la fusse stà utililizà par incastrarghe ’na trave de ’na cesa antica. Verso la strada, a ’na alteza de tri metri, n’altra piera la porta l’incision in caràtere romano: CING H, e se capisse che la jera on’architrave de ’na porta de ’na casa romana, utilizà dopo ne la prima cesa, senz’altro prima del 1000.
Dedrìo, verso la canònica, in canton a ghe xe ’na piera in trachite co on cavalin grafìo. Pi in alto, verso el sagrato a ghe xe ’na meridiana con le Ore Canoniche de la Regola de san Benedeto (la giornata spartìa in periodi de tre ore ogniuno, coando se fermava el laoro par pregare e far marenda). Altre dó lapidi inscrite nel 1300 dal nodaro Aldigerius, le dise de vardare l’opera de inalzamento fata da mastro Pastega muraro e da so neodo Antonio, e senz’altro anca coeste le jera so la cesa antica, rialzà nel 1300 apunto.
Verso el 1750, purtropo, a xe stà tolta dal canpanile de Urbana, ’na lapide de Lucio Flaviano Adrasto, on liberto romano, rafigurà in te ’sta lapide che la xe stà portà al Museo Maffei de Verona dal conte Silvestri de Rovigo.
Altre piere incastrà le xe lissie, ma pare coasi che anca coeste le voja parlare e contare la storia del paese e de coanta gente che le ga visto nare in cesa par scoltare le messe, par i batezi, comunion, créseme, matrimoni e anca par tanti funerài.
Coando che don Salvatore Calore (paroco de Urbana dal 1924 al 1964), el ga finìo la costruzion de la cesa atuale, el voléa desfare anca el canpanile par farlo novo, ma par fortuna el xe restà senza schei, e cossì a ne xe restà sto deposito de storia locale, studià anca da i archeologi de l’Università de Padova!

[torna sopra]