Da Adria (RO)

Có se punciava i calsiti

Ciapemo na camisa: ghe vegneva rifati colo e polsini…

I calsiti usualmente i jera fati in casa co lana o coton, lavorando co quatro feri e ’l canolo.

Adesso se parla de crisi, de disocupassion, de povertà, de tenpi duri e tristi, ma el più de le volte chi che ghe ne parla no ’l ga l’età par savere cossa che sia stà ste robe ani indrìo, quando mi e quìi de la mi età portava le braghe curte anca in Genaro. Jera i tenpi che prima de butar via na roba da vestire la doveva passare da na generassion a st’altra, da i più grandi a i più pìculi.
Ciapemo na camisa, na camisa bona de quele del padre o del nono, a piassere, intendo na camisa de quele da festa, de popelin, de pèle d’ovo, de fanela, de tela bona, lassando pèrdere quele da siuri de seda e de lin. A un serto punto el colo e i polsi i scuminsiava a fruarse. In prinsipio le done de casa le rimediava ciapando dentro la parte slesia co na cusidura che faseva sparire in qualche modo chel fià de magnà che butava fora i peleti. Dopo, la camisa passava, metemo, al fiolo più grande: scurta le màneghe, strìnzela na s-cianta, co i tòchi vansà fa sù un colo novo e la jera bela che pronta. Dal fiolo più grande passava a ’n antro più pìcolo, voltando e rivoltando la stofa a ogni passajo fin che la jera propio tuta de slésia come na telarina. Solo a sto punto, quando proprio no gh’jera più gninte da salvare, la deventava strasson par furbire in giro.
El stesso sistema funsionava par braghe, giachete e paltò. Un vestito novo a i boceta e a le putine el ghe tocava, se l’andava ben, solo in ocasion de la crésema e de la prima comunion. Par le scarpe la podeva andare un fià mèjo parchè i piè no i jera fassilmente adatàbili a scarpe vece e magari sformà da fetoni de misura superiore: le se portava solà e rissolà, anca dó o tre volte, fin che la tomara tegneva, ma có ghe molava anca quela o el piè cresseva, cadeva torne de nove.
El sparagno jera na necessità par la quasi totalità de la zente e la virtù, nove volte su diese esclusiva de le done de casa − da mi jera un caso ecessionale parchè mi nono, fin che l’è stà bon, l’à fato el sarto – quela de rangiarse co filo, ago, disiale e màchina da cusire drio strasse vece, faséndole deventar robe nove. Tute le done de casa saveva rangiarse, solo quele che le gheva ’vù poca scuola da sarta mandava in giro i so òmeni e i so fiòi co i tacun inte ’l culo e int’i zenoci.
Anca par la biancherìa da soto valeva el stesso sistema del taja e cusi, fin che la roba deventava strassete bone solo par fare i pissoti pa’ i bocia in fasse. Ma i capi de vestiario che più de st’altri dipendeva dal manegio de le done i jera i calsiti: curti, a mesa ganba, lunghi fin a le angonaje. Usualmente i jera fati in casa co lana o coton, lavorando co quatro feri e ’l canolo. Andava tuto lisso fin ch’a se tratava de la ganba; rivà al piè bisognava créssere e calare i punti par fare el calcagno, la soleta e ’l scapùssolo, e ghe voleva na serta pratica che s’inparava fin da fiole. Na volta fati sti calsiti e scumincià a portare, i se sporcava, e ’lora làvali, stìrali (o anca no), fin che i scuminsiava a molarghe qualche punto. E alora gucia e filo e stropa el buso. Po’ a un fiù a la volta partiva i calcagni: ciapa lana o filo che ghe somejasse a l’originale e fa i calcagni novi. Se no se catava coton o lana de colore adato, se cacionava sù co quel ch’a se gaveva; no la jera massa na bela roba, ma insuma chi ’ndava a vardare drento inte le scarpe? Podeva darsi che dal gareto sbrissesse fora righe difarenti, ma…, chi vol vardare varda!
El problema de le tinte difarenti no l’esisteva par le solete e scapussoi, parchè quìi i jera senpre sconti dentro inte la scarpa. E se d’istà uno el gheva i sàndali? Solussion sènplice: o l’esponeva al pùblico ludibrio i so fetoni arcobaleno o sinò l’andava descalso, chè la pele l’è tuta conpagna!

[torna sopra]