Da la Lessinia Centrale (VR)

El prete de le bànbole

La partecipassion de la fàbrica de Lugo a la XX Mostra Mercato Nazionale dell'Artigianato de Firenze del 20 magio 1956.

El prete don Luigi Bodini, trato da la pitrice Annamaria Grisi, da la foto su ’l n. 49 de dicenbre 1952 de “Oggi”.

Coesto l'è don Luigi Bodini, el prete de le bànbole.

La Valpantena, da na sincoantina de ani, l’è deventà na val piena de inissiative, nate pìcole ’n te coalche buso de casa o de pòrtego o de garage, se calchedun ghe l’avéa. E da lì, è nato: laboratori artigiani che s’à fato industrie grosse e conossùe nel mondo. Ma come èi partìi ’sti laboratori?
Uno de i primi, se non ’l primo, disémo ’n par la sostansa e la costansa, coesto l’è stà: “La fabbrica delle Bambole”. A Lugo de la Valpantena, nel 1943, nel bel mèso de la goera, è rivà ’nte ’sto paese, paese de gente tanto cristiana, poareti par la poca tera che ghè da laorar, lì è rivà ’l paroco novo: don Luigi Bodini. ’Sto prete ’l gavéa 35 ani, l’éra nato a Caldiero, un comune de Verona; ’l vegnéa da Ferrara del Monte Baldo, ’n paeseto de montagna. Là l’éra stà pàroco par sié ani. ’Sto prete, pien de fede e de bona volontà, l’à tacà subito a darse da far, par le tante butele che no’ le ghéa da laorar e ghe tocàa nar a l’estero con tuti i ris-ci, par la fede e par la lontanansa. Cossì pian pian, l’è stà bon de portar laoro par le butele e anca par le done sposè che ghéa grossi problemi, par via de i so òmeni ’n goera o sensa laoro. Cossì l’à catà la strada de far vegnér a Lugo le stofe da ramendar de la fàbrica tessile del Tiberghien, che la gavéa ’l stabilimento a San Michele Extra de Verona. El laoro ’l vegna fato ne i locali de la parochia, soto i oci atenti de don Luigi. Ma ’sto laoro l’è nà a fenirse, par motivi del lanificio. Cossì nel 1950, ’l prete ’l s’à catà a ripartir da zero.
Coel’ano lì, l’éra l’ano Santo, e, ci podéa, i naséa a Roma par ’l Giubileo. Anca don Luigi con ’n pochi de so parochiani, l’è nà a Roma. Nel viajo de ritorno ’l s’à catà, sul treno, con ’n venditor de bànbole e, parla che te parla, l’à fato tuto ’l possibile par saer tuto coel che ghe voléa par far ’n laboratorio de bànbole. La so idea, l’è sta ciapà par bona da i so paesani, cossì, ’sto bon prete, l’è partìo a la serca del coel venditor, e, pian pian con le butele de Lugo e coalche omo par i laori pesanti l’à fato partir: la fabrica de le bànbole, col nome: “M.A.B.E.L.”, Manifattura Artistica Bambole Eleganti Lugo. Tuto andàa avanti con passion e braura, e le bànbole i éra bele, e ’n giro i de parlàa, e no’ solo a Verona, ma anca coà e là par l’Italia. Cossì è maurà anca l’articolo su la rivista “Oggi” (n. 49, del dicenbre 1952). Dopo ’sto articolo e la presensa de la fabrica a la XX Mostra Mercato Nazionale dell’Artiginato di Firenze, del 20 maggio 1956, la fàbrica la ricevéa ordini anca da l’estero, e l’è rivà a dover far na selta, de sgrandarse, modernisarse o serar del tuto o coasi. Ma ’nte ’sti ani, che va dal 1950 al 1960, diverse fameje de Lugo, goardando cossa à fato don Bodini, con la so bona volontà, tanta passion e ténderghe al laoro, a i clienti e tegner ben ’n pié la fàbrica, in diversi i è partìi: ci con i marmi, ci con i sassi da masenar, far granulati, ci a far mangime par le galine e i polastri, altri a far braghe, vestiti, altri ancora alevamenti de varie bestie e ’l laoro no ’l mancàa.
Cossì Lugo l’è deventà ’n paese, mi credo, unico. Anca parché ’ste fàbriche, adesso iè conossùe nel mondo: come la Carrera, Mangimi Veronesi, ma ghe n’è almanco nantra diesina che s’à fato conóssare e le esporta nel mondo. E par far i machinari de le fàbriche e tegnerli funsionanti, ghe vol le oficine, cossì è nato anca le oficine e ’l paese l’è deventà, ’n paese speciale.
Merito de Don Luigi? Sì, digo mi, ma anca de i so boni parochiani che i credéa e i crede ’n Dio, ma anca ne le propie fòrse. Don Luigi Bodini, l’è morto de morte ’nprovisa ’l 21 genar 1963, giorno de Sant’Agnese, patrona de la gioventù feminile. A coel tenpo, de la morte del prete de le banbole, mi s’éra su i 18 ani, e tante domìniche naséa a Lugo, nel dopo mesodì, a passar la festa con amici, e me piaséa scoltar i discorsi de la gente, i grandi, a rigoardo de don Luigi che l’éra morto da poco. Tanti i diséa: “L’è stà ’n gran omo.” Altri i diséa: “L’à ’npiantà Lugo.” E na òlta ò sentì na dona, su con l’età, dir: “L’è stà tuto ’n disegno del Spirito Santo.”
Par mi, a coéi tenpi, l’éra ’n discorso massa grando. Adesso, me piase pensar che la podaréa èssare anca vèra ’sta bela afermassion. Par scrivere coel che saréa giusto saver, de ’sto gran prete, ghe voréa ’n libro… grosso assè! ’Ntanto, se contentemo de ricordarlo.

[torna sopra]