Ciàcole visentine

El “Don Camillo de La Longa”
A vinti ani da la so sconparsa, el Comune de Schiavon ga publicà la storia de don Marco Gasparini (1913-1997), pàroco de Longa de Schiavon ’nte ani difìssili de la resistensa e del dopoguera.

El zòvane don Marco Gasparini.

Foto del dedrìo de la copertina.

I lo ciamava el “Don Camillo de la Longa” parché co ’l famoso personajo saltà fora da la pena de Guareschi el gaveva in comune no solo, qualche volta, có propio propio bisognava, le man in movimento, ma anca e soratuto l’inteligensa, la generosità e ’l màssimo inpegno par rancurare calcossa de bon par i so parochiani, sia dal punto de vista spirituale che materiale. Ma ’l so nome vero gera don Marco Gasparini, prima capelan dal 1944 al 1946 e po’ dal 1946 al 1989 pàroco a Longa, ’ndove che ’l xe mancà el sèdese de agosto 1997. El libro, scrito dal sotoscrito, 176 pàgine, publicàe da Studio GnG de Sandrigo, el xe stà presentà ’nte la cesa de Longa el 22 dissenbre scorso e ’l xe a disposission del Comune de Schiavon, al quale se se pole rivòlgere par ’vere na copia.
Un prete de canpagna che ’nte i ùltimi quìndase mesi de guera ’l xe stà bon de vardare ’nte le balote de i oci todeschi e fassisti, che in vila Cabianca a Longa i tigneva corsi de spionajo, ma anca capi de le fòrse aleate e de la resistensa, che no i ghe vegnesse la tentassion de bonbardare ’l paese o far altri dani, provocando rapresaje su la pèle de i so paesani. Un omo tuto de un tòco, fondamentalmente un omo vero, che ga tignùo co na man sola tuto ’l paese, guidàndolo ’nte i difìssili ani dal dopoguera al benèssere materiale de i ani Otanta.
Don Marco gera nato ’l 2 de febraro, festa de la Candelora, del 1913 da na fameja contadina che viveva a Mirabella de Breganze, ma che lo ga fato nàssere ’nte la casa vecia de Fara, ’nte la dorsale in colina che sovrasta el torente Cion (Chiavon) Bianco. Dopo regolari studi al seminario de Vicensa, el xe stà ordinà prete ’l 22 majo 1937 ’nte la catedrale bèrica, po’ ’l xe stà mandà a fare el capelan a Campiglia, S. Piero in Gu (PD) e Bonaldo (VR), prima de rivare a Longa, senpre come capelan, ’ntel zenaro 1944.
A Longa don Marco el faseva tuto lu, parché el pàroco, don Vincenzo Pastorello, che sarìa morto ’ntel lujo 1945, el gera blocà a leto par na paràlisi. In chei mesi lì don Marco ’l xe stà in prima linea fora e rento Longa. In primo logo parché el xe corso sùito al capezzale de quatro so parenti Gasparini (tra cui un zio e un primo cugin) barbaramente assassinài el 20 novenbre 1944 ’nte la so casa natale a Fara da un grupo de camise nere in quea che da i stòrici xe stà definìa “la strage dei Gasparini”, de la quale don Marco ga redato un resoconto detajà, po’ consegnà a le autorità giudissiarie e relijose.
Po’, el 27 aprile 1945, giorno in cui i todeschi i xe scapà via da Longa, sgonberando la vila Cabianca, el xe riussìo, no se sa come, a farse dare el tesoro de la sinagoga de Firense, amontante in ben 35 casse portà via da i todeschi, che ga conservà in canònica par na setimana, prima de consegnarlo in curia vescovile a Vicensa, che lo ga recapità a i legìtimi propietari toscani. Anca solo par questo don Marco el meriterìa un monumento par aver risolto na question che, dito par inciso, xe costà la vita a i pi famosi capi partigiani visentini Giovanni Carli, Giacomo Chilesotti e Attilio Andreetto, coài a Sandrigo l’istesso 27 aprile propio fin che i stava ’ndando a Longa a contratare co i todeschi par farse dare ’ndrìo el tesoro.
Anca ’nte i restanti ani a Longa don Marco ga demostrà corajo, passion, fede, devossion, volontà e core, tanto core, e na gran voja de laorare, trasmetendo sti valori a pi de na generassion de longhesi, che ’desso, sìndaco Mirella Cogo in testa, co sto libro lo ringrassia par ’ver cussì ben oparà par el so grege de fedeli.

[torna sopra]