|
Da Verona
La testa de la Strapparava
Cronaca nera veronese (d’altri tempi)
 | | El canale Camuzzoni a Verona, teatro de le macabre scoperte. |
“Ieri ò destrigà la cantina. Ghera de tuto! Mancava poco che saltasse fòra anca la testa de la Strapparava!” ’Na frase cusì se pol sentirla solo a Verona… e solo da ’n veronese DOC che gabia almanco la me età.
Ma ci èrela ’sta Strapparava? E cosa ghe c’entra la so testa?
Par capir ’sto strano modo de dir (che però ormai ’l sta sparendo) bisogna far un salto indrìo de quasi setant’ani. La matina del 7 Majo 1949 el giornal “L’Arena” el riporta ’na notissia macabra: ne l’aqua del canal Camuzzoni, vissin a la centrale elètrica de Borgo Roma, la sera prima è stà pescà ’na valisa de carton con dentro el corpo de ’na dona tajà a tòchi. Ci la sia, no se lo sa: manca la testa e manca i brassi. L’era dal genar del 1900 che a Verona no sucedéa ’n omicidio cusì cruento, cioè dal caso de la Isolina Canuti (ve ne parlarò la prossima òlta).
Tri giorni dopo el canal el restituisse un saco con dentro i brassi e cusì, da çerti particolari, se riesse a dar un nome al poro corpo martorià: l’è quel de Guglielmina Strapparava, dità “Memi”, 52 ani, nata a Udine ma residente da senpre in çità, afitacàmere, dona gentile e benvolù da tuti. Le indagini le se orienta subito sul so convivente: Alessandro Marchese, 47 ani, un ex maressial dela republicheta de Salò, un tipo violento e poco racomandabile. L’omo subito arestà e interogà el dise de no’ saver gnente, tuto però fa pensar che ’l colpevole el sia proprio lu, ma serve de le prove… bisogna troar la testa: l’è inportante par el riconossimento definitivo. Se draga el canal, se scava in giro, se le próa tute, vien parfin ciamà i “sensitivi” a çercar col “pendolin”… però la testa no’ la salta fòra (e no’ la saltarà fòra mai).
Intanto, a forsa de interogatori, Alessandro Marchese el cede, e finalmente el confessa: sì, l’è stà proprio lu in un momento de gelosia… ma a tajarla a tòchi l’è stà Stefano Denaro. Denaro fermà e interogà el casca da le nuvole, ma l’amete che la “Memi” ogni tanto la vegnéa a çercarlo par sfogarse e contarghe de come el so omo el le maltratasse. Gnanca a dirlo che tuta la storia la vien seguì avidamente da i giornài. A l’epoca no ghera mia le riviste scandalistiche de ancò e la storia de la “donna tagliata a pezzi” la stigava la curiosità morbosa de la gente.
Comunque, anca se s’èrimo nel ’49 (e no ghera mia i C.S.I.) la polissia la laorava ben anca alora e le prove a carico del convivente le se fa senpre più ciare e precise. El 7 April del ’51 finalmente inissia el processo e (stranamente par la Giustissia italiana) tri giorni dopo l’è za belo che finì. Marchese el vien riconossù unico colpevole e el se bèca trent’ani de preson. E la ghè ’ndà anca ben, parché in Italia i avéa ’pena abolì la pena de morte. Denaro el vien scagionà da tuto: tirarlo in bal l’era stà solo l’ultima stupida cativeria del vero asassin.
E la Strapparava? L’è sepelì nel çimitero monumentale de Verona... e l’è ancora sensa testa. Avìo vardà ben in cantina?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Bastarìa manco violenza
Xe qua l’Ano Novo: tenpo de auguri, prevision e promesse. Come senpre le xe tante le robe che se vorìa védare canbià e realizà: tra tute, credo che se vorìa manco violenza, in casa, in fameja, in strada, in television… Insoma, che ghe sia na s-cianta piassè de pace e de armonia.
de Mario Sileno Klein
Ciàcole visentine
El “Don Camillo de La Longa”
A vinti ani da la so sconparsa, el Comune de Schiavon ga publicà la storia de don Marco Gasparini (1913-1997), pàroco de Longa de Schiavon ’nte ani difìssili de la resistensa e del dopoguera.
de Giordano Dellai
Da Verona
La testa de la Strapparava
Cronaca nera veronese (d’altri tempi)
de Mirco Castellani
|
