Da Roma, in diaeto de Este (PD)

Curiosità romane

El stesso Cesare se gheva procurà un tonsor spessiaisà in "riporti", che riussiva mascherarghe eà piassa

Rasòi a meza luna, prima de bronso, po' de fero, doparà da i romani par tajarse eà barba.

Se pensemo a i romani antichi, l'imagine che ne salta a eà mente xe una plebe che forniva legionari adestrà a soportare quaeunque sacrifissio che se ghe comandasse.
Patrizi austeri, a eà Catone. Senatori, sagi e incorutìbii. Insoma, visto queo che i xe stà boni far, zente sobria, dura, sensa frónsoi e vanità.
Anca mi eà pensava cussì. ’Desso però che go riciapà in man i autori antichi, spessialmente i satirici, so’ drio scoprire che 'sta reputassion pol ’ndar ben par i primi tre sècoei. Ma dal Tresento a.C. i contati senpre pi frequenti co i greci che gaveva ’bu el permesso de instaearse in un vero e propio quartier a eà "Boca de eà verità", co ’l tenpo, ga snervà i severi costumi de i antichi Padri Quiriti. Almanco ne ’e classe alte.
Uno de i esenpi famosi che no gavarìa mai pensà, xe eà vera e propia mania ciapà da facoltosi, par ’e aconciature de i caveji! I romani de i primi sècoei ’i portava siolti. Eà barba però, i se eà faseva, co rasòi a meza luna: prima de bronso, po' de fero. Dal Tresento, ga scominsià a aparir barbieri de strada, i tonsores (da cui vien: "tonsura", quea de i frati), che tajava a tuti i caveji curti, par praticità, sensa pretese. Ma a poco a poco, i siori i se ga cronpà veri professionisti de ’e aconciature a eà greca, che, co coghi e mèdeghi, xe deventà i s-ciavi pi cari. I borghesi, invesse, ’ndava da i tonsores; quei però che gheva... studià i ga ’vù sucesso, i ga messo sù botega al querto e creà na clienteea.
El popoein, invesse, continuava a servirse in strada e, par via de eà scarsèa, ’ncora caveji a eà unberta e, dó-tre volte l'ano al massimo.
’E boteghe su, co ’l tenpo xe deventà de i "saeon" dotà de s-ciaveti, i “circitores", aprendisti del mestier come i nostri: "Ragasso, spàssoa!" Ma purtropo, anca professionisti de qualcossa d'altro... Squasi tuti sti "Ateliè" jera punti de ritrovo, frequentà da clienti che univa l'ùtie e el dietévoe; da giovanoti veri gagà perditenpo; ciarlatani che vantava nove creme e profumi. I benpensanti tonava su sti anbienti, ritegnéndoi a rason, loghi de corussion de i costumi e de pèssima moraeità.
Seneca, par esenpio, disaprovava barbe e caveji slusenti de oji profumà de 'sti zerbinoti che faseva disperar i barbieri par eà caparbietà –sic! − de discùter eà sistemassion de ogni sìngoeo cavejo! 
’Na vera e propia mania de i patrissi, po’, jera quea de scónder... eà peata! El stesso Cesare, pagando parecio, se gheva procurà un tonsor spessiaisà in "riporti", che riussiva mascherarghe eà piassa, tirando sù e inrissoeando i ciufi laterài. El conplesso, po', eó portava fin a vietar a tuti... de vardarlo da l'alto.
Chi sguazava in ste manie jera i poeti satirici, sora de tuti Marsiàe. Tra i so epigrami, uno tol pa ’l sesto Marino, vanaglorioso, stagnoto dongiovani che se ategiava a zóvane. Ve eó tradugo in diaeto. (Tegnì presente che mi go studià indefessamente latin al liceo, da otobre... a otobre, tuti sinque i ani! Insoma, portè passiensa.) 
"Te spandi e spendi, Marino, par veear eà peeàda, faséndote tirar sù i pochi sgréndeni che te ghè su ’e rece. Ma, quel putanon del vento, par to desperassion, te ’i riporta in bando, e da novo, eà piassa te se svoda! ’Ndemo! Mèjo sarìa che te assetassi eà età! Gnente xe pi ridìcoeo de un peeà,che vol far el capeon!"

[torna sopra]