|
Da San Stèfano de Zimela (VR)
Altri scherzi e scherzeti
 | | Co’ i putini pìcoli se ghe ciapava in man la manina e… |
In te ’l nùmaro de giugno a go racontà de i scherzi e scherzeti che se ghe faséa ’na ’olta a i toseti. Sicome che el spazio el jera poco, ’desso ve ne digo ancora de i altri.
Soto Carnevale a se mandava dal feramenta un boceta a cronpare el stanpo par fare le frìtole. Par ci che no lo savesse, la pasta de le frìtole la se buta a scuciarà drento l’ojo bolente!
Se un toseto el se faséa un tajeto su un déo, fasendo la facia preocupà se ghe lo lavava e dopo se ghe lo bendava, racomandàndoghe de tegnere ben ligà la garza che senò a ghe sarìa vegnù fora tute le buele. Se el bocia el jera particolarmente ronpiscàtole, se ghe diséa de fare el brao che senò a vegnéa la marmàcola a portarlo ’ia (la marmàcola la jera un terìbile mostro imaginario, che ’l se scondéa in te ’l scuro del seciaro o del granaro).
Quando che ghe jera in casa de i laori, se mandava el toseto dal casolin a tore zinque franchi de onto de gonbio (l’onto de gonbio la xe semplicemente la voja de laorare…). Se un toso, vardando le passarete che sbecolava le frégole de pan in te la corte, el domandava come che se fasa a ciaparle, co’ la massima serietà se ghe diséa che par ciaparle bastava métarghe un gran de sale grosso soto la coa. Se el bocia el jera disubidiente, se ghe ’nava vizzin e, moèndoghe un pugno davanti al naso, a se ghe diséa co’ la vozze seria e minaciosa: lo védito chesto? E quando che el bocia el faséa la facia preocupà, se ghe mostrava chel’altro pugno, che ’l se gavéa tegnù sconto dedrìo la schena, diséndoghe, ridendo: a l’è el fradelo de chesto!
Se el toseto el domandava da magnare, par torlo in giro se ghe diséa: Gheto fame? Se te ghè fame, magna Nane (Giovanni)… e, se te ghe sé, va’ a Albarè (ad Albaredo passa il fiume Adige), e se te ghe sono, métete le braghe de to nono!
Co’ i putini pìcoli se ghe ciapava in man la manina e, carezzàndola, se ghe diséa: Manina bela / to sorela / indo’ sito stà / da to mama / da to popà / cossa te gai dà / vin, pan, late / gate! gate! gate! e, disendo cussì, a se ghe faséa le garìzzole che cussita el putin el ridéa. O senò se ghe ciapava la manina verta e, scominziando dal deéto piassé pìcolo, se diséa: déo, deolin / questo va par aqua / questo va par vin / questo porta la fugazza e, rivà par ultimo sul déo pi grosso, lo se ciapava con tuta la man e se diséa… e questo el magna tuto!
Dopo ghe jera anca dó filastroche che le se recitava, fasendo saltelare el putin su i zenoci: Tutù tutù musseta / la mama vien da messa / co’ le tetine piene / da dare ai so putini / i so putini no gh’in vol / tuti zo par el parol! O senò: Cavallino Ciò ciò ciò / un bel giorno se ne andò / se ne andò a Parigi / a trovare re Luigi / re Luigi lo premiò / cavallino Ciò ciò ciò. A l’ultima strofa se slargava un pocheto i zenoci e el putin, ben tegnù par i brazzeti, credendo de cascare el gavéa un sguizzo de spaento che dopo invezze el se metéa a rìdare e el voléa che el zugheto el vegnesse fato ancora.
Le xe tute pagine de un vìvare che no ghe xe pi, scancelà da i mile canbiamenti che i se ga incalcà massa in pressia e che a noantri “diversamente giovani” i ne fa scorlare sconsolài la testa.
El mondo de ’desso èlo mèjo o èlo pezzo de chelo de la nostra gioventù? Mah, disemo anca noantri, come el Manzoni: “Ai posteri l’ardua sentenza!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che fadiga co sti fiòi!
Tra genitori e fiòi dovarìa èssarghe on raporto de amore da parte de i primi e de gratitudine da parte de i secondi. Qualche volta sucede propio questo, ma ne la pi parte de i casi la storia xe difarente: inconprension, contrasti e ràdeghi pericolosi.
de Mario Sileno Klein
Da Verona
Pregar… con poesia
de Mirco Castellani
|
