Da Verona

Pregar… con poesia

El libro se trova in libreria a Verona, opure ordinarlo a l’editore sul sito: www.bonaccorsoeditore.it

Me mama Wanda l’è stà una de le voçi più grandi de la poesia dialetale veneta. L’à scominçià a scrìvar poesie che l’andava ancora a scola, vestì co ’l grembialin rosa, e l’à continuà a scrìvar poesie fin che la ga ’vù fià de vìvar! Anca se in otant’ani l’à esplorà i temi più vari, le so poesie i è stà soratuto poesie d’amor. Quel bel amor semplice e “umano” che faséa sospirar Giulietta par Romeo e che l’è stà el motor, par secoli e secoli, de infiniti tra romansi, film, cansonete e opere d’arte. Ma Wanda l’à senpre sentì che esiste anca qualcosa de più grande de l’amor umano: qualcosa de eterno, de infinito… e alora ogni tanto la scrivéa preghiere. La le scrivéa e la se le tegneva sconte, parché i era na roba “sua”, l’èra el so amar Dio e el so sentirse amà da Lu. Le so poesie religiose le ò troà, sparse tra le so carte, quando ela l’era ancora viva. E alora ghe n’ò fato un libreto: pochi fói sensa pretese stampà con la stampante del computer. A me mama ga fato piasèr troar riunì quele so poesie, così ò insistì par fàrghene de le altre copie da darghe a amici e parenti. Parché tra quele poesie ghè de i veri capolavori.
Se un poeta el pol èssar ricordà anca solo par ’n’unica poesia, Wanda la podarìa èssar ricordà par una de queste. Nel giro de un ano el “libreto” l’è stà ristampà più òlte, ogni òlta milioràndolo e zontàndoghe poesie. Dopo, come ricordarì, nel setenbre 2017 ghè stà la fine. Inaspetada. Da un giorno a l’altro. L’era ’na domìnica e mi son ’ndà ne la so “casa de riposo”, armà come al solito de carte e computer par laorar con ela a qualche articolo. Rivà in càmara l’ò troà co i oci persi. Persi nel gnente. El corpo el ghèra, ma la mente no… no la ghèra più. Sparì! E nel giro de pochi giorni, come un motor che finisse la bensina, anca el corpo el s’à fermà. Al funeral el so grande amigo prete, Don Mario Gonzo, invesse de far la predica classica l’à tirà fora el libreto, proprio “quel” libreto, e l’à leto poesie. Le più adate. L’è stà ’na roba grande… parché cusì ancora ’na òlta el ga dà la voçe, faséndone sentir che l’èra ancora viva ne le so poesie, e che se ghè un paradiso l’è de sicuro lì, parché la so fede l’era grande.
Cusì fin da alora me son ripromesso de trasformar quel libreto stampà con la stampante in un libro vero, fato ben, da vèndar in libreria. Par ela. Par mi. Par tuti quei che ga el dirito e el dover de conóssarla. Ghè volù tenpo. Parché ò messo insieme 55 poesie riunì in çinque capitoli: Preghiere, Maria, Cristo, Cese e “Considerassioni”. Ghè stà, dopo, da decìdar la copertina, el titolo, l’introdussion… e troar le imàgini da métar insieme a le poesie. Par le foto alora son partì con la màchina fotografica in çerca de i capitèi de la Lessinia. Grassie anca a l’editor Bonaccorso, che el s’à ciapà personalmente a cór el progeto, el risultato l’è stà un libro veramente belo. La prima parte la contien 16 poesie tra preghiere e riflessioni su la ricerca de Dio. Se scopre la fiducia che la gavéa in Lu: ne “La grande opera” el mal, el dolor e la disgrassia i è i colpi de un martel che scolpisse el diamante. A la fine el risultato el sarà splendido, ma prima bisogna soportar con fiducia le martelade.
Dopo inissia 11 poesie dedicà a la Madona. Wanda l’à senpre visto in Maria ’na mama e ’na dòna, come ela… come ela e come tute le mame e le dòne del mondo. Indicativa la poesia: Marie, dove Maria la vien riconossù in tute le mame che à patì e che ancora patisse, vejando in silensio un fiól morto massa presto. Comovente la bela Sanmartin de lumini: davanti a la statua de la Madona ghè pien de candele, davanti al Cristo in croçe nò… El “Butin” in brasso a Maria el dise: “Mama, ci èlo quel’omo che no ga gnanca un lumin?” e alora Maria durante la note pian a pian la sposta tuti i lumini soto al Crocefisso, tegnéndose par ela solo la luce del so amor. Dopo vien sié poesie dedicà al Cristo. Par Wanda Gesù l’era ’n amigo, ’n amigo che anca se no te ’l vedi te sè che ’l ghè. L’amigo “Quel più vero”, quel che à portà la Croçe par insegnarne che ’na Croçe se pòl portarla. Proseguimo con 9 poesie dedicà a le cesete. Wanda la sentiva l’Infinito più facilmente in ’na pòra ceseta romanica piutosto che in ’na grande catedral. Così troémo anca A san Giovani in Vale (vedi Q.C. 5/2017), ’na poesia che me mama l’à senpre amà. Se conclude con 13 poesie su argomenti vari, ma senpre ligà a la fede… Ghè Amo la vita, che se pol considerar el so testamento spiritual, e ghè l’incisiva Parchè?: de sicuro l’ultima poesia che l’à scrito. Pregar… con poesia el ne farà scoprir ’na Wanda diversa da quela che conossemo, el ne farà penetrar nel segreto de la so anima, un’anima che adesso (come scrivéa el so amigo Gianni Faè) l’è nel “Ciaro grando”.

AMO LA VITA

Amo la vita
l’è tuta ’na scoperta... l’è un stupor
da quando le persiane le tamisa
el primo sol sfaciato... el primo canto
a quando el dì nel fogo el va a morir.

Amo e me incanta tuta la natura
da le çime più alte al bao par tera.

Amo quel Dio che sempre trasparisse
da le assioni de l'omo e in quel che l'è.

Amo ci me vól ben, ci no' me ama.
Amo l'amor, quel dolçe e quel'amaro.

Amo el dolor che sta drio de ogni gioia
levegàndose a pian nel mar del tempo
come la véra soto a ’na fontana.

Amo i me sogni, cine de ogni note,
che no' ga fine mai oltre el risveio
e amo la çertessa de la morte
parché dopo el mister de quela porta
amo pensar a ’n mondo ancora mèjo!
Wanda Girardi Castellani

[torna sopra]