Robe de Ciósa

Zoghi da spiagia

A. Brombo (1893-1962), Piccole vele, ojo su tavola, 1941.

Zogo a fare castelli sulla sabbia.

Tempo d’istà, tempo da spiagia! Almanco per nualtri ciosòti che avemo la fortuna de avere la spiagia de Sotomarina a dó passi da casa.
Imaginemo de andare indrìo co ’l tempo (come nel cosideto flash-back de i film) fin a rivare a i ani ’50-’60 del secolo passà, quando tanti nostri letori forse no gera ancora nati. A chel tempo per nualtri fiòi l’unico logo de divertimento de l’istà gera alora la spiagia. E in spiagia ghe stèvimo da la matina a la sera. El problema gera come impiegare tuto ’sto tempo! La fantasia alora no ne mancheva e se ingegnàvimo a inventare sempre zoghi novi. Ma i tre che pi ne tegniva impegnà gera: el zogo de la bandiera, el zogo de la pista e el zogo de i castei.
Premetemo che bandiera corisponde a l’italian “aquilone”. Se lo fasèvimo nualtri: carta velina colorata, cola fata co la farina de fiore, canete messe in crose e incolà una co l’altra, filo involtolà nel rochelo e, apena se incorzévimo che scomissiava e supiare un poco de vento, alé!, se moleva el filo e la bandiera andava sù, tanto sù che quasi no la se vedeva pi. Alora ghe mandèvimo de i… “sms” fati co un tòco de carta piegà tante volte e sbusà in mezo e andévimo a gara a chi riussiva a molare la bandiera pi in alto.
E la pista? La gera un’òpara d’arte! Galerìe, dossi, curve, sotopassagi, ponti, rampe… Un percorso de guera! E nualtri uno a la volta co la nostra baleta de teracota serchèvimo de no andare fora pista, spinzéndola co i dó déi de la man che scateva come ’na mola… Vinseva oviamente chi riussiva a fare un serto numero de percorsi sensa mai andare fora pista.
E dopo i castèi, altra òpara de ingenieria… Li fasèvimo in riva al mare co la sabia bagnà, fasendola sgiossare poco a la volta co la man fata a impirioto…
E per finire ghe zontarìa a ’sti zoghi dó che credo decisamente d’origine ciosòta: uno gera el ziogo a buso patàfia. Se zogheva a fare o a non fare un buso co la créa. Se pareciava ’na sorta de scodela de crea e la se lancieva per tera co forsa. La pression serte volte faseva saltare el fondo e se sigheva buso! Altre volte invesse el buso no se faseva e cossì la gera patàfia. Ze restà ancora vivo el deto: fare patàfia cioè falire, sbaliare.
Altro ziogo sempre da fiòi gera ciamà el vulcano. Se fèva un monteselo de sabia sbusà a l’interno co un mànego da scoa come se a fusse un camin, se butava da soto carta in abondansa e po’ ghe se dèva fogo. A pareva proprio un vulcano co ’l so cratere fumante…
A chel tempo ne basteva poco per divertirse, se no altro perché i gera zoghi de produssione propria!...

[torna sopra]