|
Editoriale
I mèjo i ne scapa via
Na volta a faséino de tuto par tegnérseli streti: artisti, poeti, inventori, sienziati, canpioni sportivi, insoma le mèjo teste che gavéino in casa, che oncò vien ciamà “cervelli”. Se no lo faséa l’autorità, ghe pensava qualche “mecenate” inamorà de l’arte e de la bela figura che ’l faséa, jutando sti òmeni e ste done “speciali”. E oncò?
 | | Anca se l’Italia l’è el pi bel Paese del mondo… ne toca nare via… in zerca de fortuna. |
Oncò no la xe pi cussì. Chi ga i nùmari giusti par farlo el va in zerca de fortuna in altri Paesi de l’Europa, de la Mèrica, l’Australia, el Canadà… Senpre distante da la so tera, da la so Italia, dal so Veneto.
Questo, a causa de la crisi economica, che no ghe permete ch’i possa catare laoro in casa nostra, dove ch’i vive. Ma i tosi de oncò i ga anca altre mire, i ga orizonti piassè larghi rispeto a quei de le generazion de solo mezo secolo fà; la so casa no xe pi el paese, la sità, la region, la nazion: la so casa xe el mondo. I xe senpre de pi i zóvani che lassa l’Italia e va a l’èstaro in zerca de na ocupazion coalsìasi, anca provisoria.
I xe animà anca da spirito de aventura, dal bisogno de sentirse indipendenti, de inparare nantra lingua, de conóssare altri modi de vìvare e de pensare, magari sofegando la nostalgia de casa, de i magnari preparà da so mama, de i amici lassà in patria.
Ma ghe xe soratuto chi emigra par necessità: qua ghe xe poco laoro par tuti, spece par chi zerca la so realizazion personale. Eco ’lora che lassa el nostro Paese: ricercatori (tra i mèjo al mondo), tecnici, professionisti, insegnanti che ga titoli alti de studio e che qua no i cata na sistemazion che risponda a la formazion ricevùa. Conseguenza? Scapare a l’èstaro, dove i cata subito laoro e i vien anca aprezà.
El fenomeno de l’emigrazion e de l’imigrazion no la xe pi na novità: lo vedemo tuti i giorni, ma par quei che riva qua da noantri se trata par de pi de pora zente, ridota a la fame, distruta da la guera. Quela de i nostri “cervelli” la xe nantra roba. Lori i sa de avere na preparazion de on zerto valore che pole permétarghe svilupo, cariera, schei… Se questa la xe “fortuna”, i ga el dirito de narghe incontro, anca parché el mondo se ga slargà, no ’l ga i confini de na volta.
Tra l’altro, qua a casa nostra stemo vivendo on bruto momento storico: a semo talmente pieni de debiti da fare scareze; la politica la ga le man ligà da i intaressi sul debito pùblico. La coerta (le risorse), tìrela da na parte, tìrela da chel’altra, no xe che la se slonga: senpre pìcola la resta. La ricerca no la pole fare de pi, anca parché… par gnente l’orbo no ’l canta. E ’lora, non tuti, ma bona parte de i nostri “piccoli geni” i scapa in pressia.
Quei che resta in Italia i xe altretanto bravi e corajosi e i dà el so contributo parché el Paese no ’l sprofonda ne la busa fonda de i debiti, in parte fati anca par preparare i “cervelli” che xe nà a zercar fortuna in altri Paesi. Finché questi i resta a l’èstaro, el nostro Paese no ’l ghe ne ga nessun guadagno.
La stessa roba ghe toca a i genitori che se ga cavà el pan da la boca par mantegnerli fin ch’i studiava e quando, deventando veci, i ghe ne gavarìa de bisogno, ghe pol capitare… chi s’è visto, s’è visto! I ga senpre dito che on pare mantien sete fiòi, ma sete fiòi no mantiene on pare!
El Rapporto Italiani nel mondo 2017, publicà da Migrantes, el dise che cresse la percentuale de i italiani a l’èstaro. A parte i pensionati che se trasferisse ne i Paesi caldi e pi convenienti, quela de i zóvani italiani che emigra in zerca de laoro la xe ormai na marea che no se ferma pi e la rapresenta on grave dano al nostro Paese, non solo economico.
Pecà che la madrepàtria la faga poco o gnente par tegnerse qua i so “cervelli”. E altretanto pecà che pochi de sti “talenti” i torna casa par dimostrare riconossenza verso sta madrepàtria, anca se el pi de le volte la xe stà na maregna pi che na mare!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
I mèjo i ne scapa via
Na volta a faséino de tuto par tegnérseli streti: artisti, poeti, inventori, sienziati, canpioni sportivi, insoma le mèjo teste che gavéino in casa, che oncò vien ciamà “cervelli”. Se no lo faséa l’autorità, ghe pensava qualche “mecenate” inamorà de l’arte e de la bela figura che ’l faséa, jutando sti òmeni e ste done “speciali”. E oncò?
de Mario Sileno Klein
|
