Da Legnago (VR)

La fòla de i du pessi

Sia me nona Rosi che me zzia Ine le ne ’a contava sta fòla…

’Na matina i parte co la nigossa a spale e i va pescare.

Anca ’sta fòla, sia me nona Rosi che me zzia Ine, le la contava coando de inverno se naséa so le stale a far filò o a desgarbujare le panoce de polenta. Coando le compagne de laóro le ghe diséa: “Che fòla contèo stasera?”, sicome che le fòle le scumizia sempre con “’NA OLTA GHE JÈRA”, alora una de le dó, (par pausa e intanto le ghe pensava sù) la scumiziava cossì: “’Na olta no ghe jèra… adesso ghe son… ghè morto la vaca… e ghè restà el paron!...” e tuti se metéa rìdare. E eco che una de le tante fòle le scumiziava ruzare in te ’l zarvelo. Ècola:
’Na olta ghe jèra du fradèi; i so genitori, morendo, no i gavéa lassà gnente parché no i gavéa gnente, cossì tra de lori i naséa d’acordo. Laóro no ghe ne jèra da nissuna parte e bisognava magnare. On giorno uno de i du el ga dito:
“E se nemo pescare, invezze de star chì a vardarse no l’è mia mèjo?! Almanco, se ciapemo calcossa… magnemo!”
Chel’altro, d’acordo, el ga risposto de sì. ’Na matina i parte co la nigossa a spale e i va pescare. No i fa gnanca in tempo métare in tel fosso la nigossa che capita la guardia.
“’Sa fèo? Savìo che no bisogna mia pescare chì? Nè ’ia, senò ve taco la contravizzion!”
I du fradèi jè nà ’ia senza parlare e cossì a la sera jè nà in ’èto senza zzèna. Jè stà calmi par on par de giorni ma, dopo, uno de i du el dise:
“Che nemo pescare? Nemo ’ia so l’ora del disnare, cossì la goardia la narà pur magnare e po’ fare el so pisolin!”
“Bela idea!” ga risposto chel’altro e jè partìi par nar pescare, ma jè nà in te nantro posto. No i fa in tempo de métar zo la nigossa che… eco!, spunta la goardia.
“Oncora vualtri? No bisogna mia pescare in te ’sto fosso chì, nè ’ia subito senò ve taco la contravizzion!”
Anca chela olta jè partìi senza dir gnente. A la sera jè nà in ’èto co la panza uda e co le buele che brontolava, ma… i s’à dito:
“Stasera l’è cossì, ma spetemo che se calma le aque, ghe nemo a sera scuro, mèjo senza luna… el narà pure in ’èto, an?!”
“Bela idea, come ghinti fato no pensarghe prima?!”
Verso mezanote de ’na sera senza luna, i se parecia co la so nigossa e contenti de la trovata i parte convinti. I riva in te nantro fosso, i se comoda ben, i mete zo la nigossa e el pesse el va drento a s-ciapi. I se sfrégola le man come par dire “ghe l’émo fata!” , ma… i vede distante che vien ’vanti el ciareto de la goardia. ’Lora jè scapà co ’l so pesse a gambe levà e jè nà scóndarse in tel cimitero ma, corendo, da la pressia i ga perso du pessi fora dal cancelo.
“Coremo, coremo… par du pessi! Lassémoli lì, coremo drento in pressia senò la goardia la ne ciapa!” i s’à dito e jè nà sentàrse in te ’na lapide poco distante dal cancelo. So la lapide gh’èra on lumin impizzà e uno ’l ga dito:
“L’è mèjo che se li spartemo e ognuno se li cusina come ’l vole” e i s’à messo contare i pessi: “Du mi e du ti, du mi e du ti, du mi e du ti…”
In chel mentre che i conta el pesse, passa du morosi, i sente parlare drento el cimitero, i se ferma e i sente: “Du mi e du ti, du mi e du ti, du mi e du ti!...”
El moroso el ga dito: “Me digo che l’è el Signore e el diàolo che se sparte le anime!” e jè restà oncora lì a ’scoltare: “Du mi e du ti, du mi e du ti, du mi e…” I tase ’na s-cianta ma coèl che ghe vegnéa i du pessi el ga reclamà, disendo:
“E i du pessi che me vien a mi, gnente?”
“Stò pensando a come go da fare par dàrteli!” ga dito so fradelo.
“Senti… l’è mèjo che nemo tórse chei du che ghè fóra dal cancelo, cossita nemo pari!”
I du morosi, convinti che ’l fusse el Signore e el diàolo che i se spartéa le anime, i ga ciapà paura, jè scapà ’ia de corsa a tuto balin e jè nà tirarse sù la petorina so la prima ostarìa che i ga catà.

[torna sopra]