Da San Giorgio in Bosco (PD)

Persone e fati strani del me paese

Ghìimo i cavaljri e ’e formighe rosse ga tacà vegnirli magnare.

Cu i sonava-a-tenpo parché vegnéa ’vanti on bruto tenporàe, lu jera so 'a porta de 'a cesa a benedire…

Inte ’e me sòite escursion so ’l mèjo libro de storia e poesia che mi conossa: l'Antico Testamento, me capita spesso de ’ndarme rilèdare zherti passaji: "”Quando i figli di Dio si unirono alle figlie degli uomini ed esse partorirono figli, sulla Terra vi erano anche dei giganti..." (Gn, 6). "Enoc... poi scomparve perché Dio lo portò via con sé." (Gn, 5). E po' l'incontro de Ezechiele rente ’l canàe Chebar de Babilonia co ste coatro bestie voeante, secondo lu, co coatro astronave, secondo mi, contàe co cussì tanta precision che jera pi fàzhie descrìvarle che inventàrsee senzha ’a cultura tènica moderna, conpreso l'Essare che da coeste jera desmontà pa parlarghe (Ez 1); senzha parlare de chealtri profeti co ’e so storie. Po' ghe ze i testi sacri de sumeri, indiani, cinesi, maya, ecc. che, co ’a sienzha archeologica in progresso, i crea spunti pa far pensare che zherti zharvèi umani, anca rente de noaltri inte ’l spazhio-tenpo, gapia senpre bio poteri strani sui o vegnisti da altri mundi.
Difati, inte i ani de 'e me ricerche de costume in paese, me ze capità de sentirme contare da veci co poca voja de contare monade − òmani de cesa, che ghea inparà el mondo inte ’a pedo maniera: in goera – de 'e storie incredìbie co protagoniste racoante persone del posto. Ani dopo e co diverse scuse, go anca proà fàrmee contare da novo par védare de catarli in fàeo, ma gnente da fare! So’ vegnesto cussì saere del capean don Joani, del mago Nadain, de so sorèa: ’a striga Bepa Nadaina, e de ’a Malia S-cena d’i ciòi,

DON JOANI MARTINI l'è stà capean Sandordi coasi zhincoanta ani fin al ’57, cò l’è morto soto na màchina. No ’l ghea mai fato cariera fursi parché, a védarlo, el paréa on simil-prete: pìcoeo e trato al porocan, senpre co ’a tònega strazhonà; se ’l predicava, tanti ciapava sono. Ma pa ’l paese el jera prezhioso parché i me contava che ’l saéa parar-via ’a tenpesta, el saéa fare l'esorcista e chissà che altro. Cò ghe jera problemi de invasion de bestie nocive, de maedission vere o presunte inte ’e case (come che contarò pi ’vanti), tuti coréa ciamarlo e lu rivava in bicicreta co stòea e secéo e no 'l sbaliava on colpo. Par tuti jera normàe coéo che ’l fazéa e tuti ghe voea ben: grandi e tusiti. Cò l'è morto, tanti ga crià.
El primo a contarme (e a confermarme inte i ani) on fato vero de don Joani ze stà me pare cò jero ’ncora pìcoeo:
"Jera dal ’30. Ghìimo i cavaljri e ’e formighe rosse ga tacà vegnirli magnare. No se capìa da ’ndove che ’e rivasse e, par coante che te ghin copassi, ghin jera senpre de pi. ’Lora semo ’ndài ciamare don Joani pa far benedire sti cavaljri. Lu l'è rivà, el ga vardà e po 'l ga domandà: − Indove ’e mandìmui ste formighe, parché anca lore ’e ze creature del Signore.− Ciapài a 'a sprovista, no saìimo cossa dire, fin che me sorèa Maria, svelta: − Soto chel figaro là, tacà el leamaro. − Lu ’lora ga recità i so sequeri e dopo no 'l voéa gnente, ma on presente ghe 'o ghemo fato acetare; el ga beesto on par de onbre e in jornada ’e formighe jera sparìe.
In primavera de l'ano dopo, cò ’e piante ga tacà fiorire, ghemo visto che sto figaro el jera seco. Legne ghin ocoréa senpre e semo ’ndài pa cavarlo. Par proa me fradèo Àndoeo co na manazha de 'e sue el ghe ga dato on traton e ’a pianta se ga rabaltà parché soto ’a zhoca no ’a ghea pi raise: tute magnàe. Inte ’a busa che se ga verto, ghe jera na boà de formighe rosse che ’ndava ’torno da far paura e che no jera bone scanpare. ’Lora noaltri che de 'e creature del Signore, che fa dani no ne intaressava on'ostia, ghe ghemo trato meda secia de petrolio e ’e ghemo brusàe.”
Cu i sonava-a-tenpo parché vegnéa ’vanti on bruto tenporàe, senpre lu jera so 'a porta de 'a cesa a benedire in latin parché no tenpestasse e i me ga dito che gnanca co l'uragan del ’46, che ga rabaltà casuni e barchesse, coà no ghe ze stà né morti e gnanca tenpesta. I sètici dise che in paese ghe ze on microclima particoeare, ligà a ’a Brenta; pol darsi, ma mi sò che da coando che l'è morto lu, che mi ghea sete ani, altri preti ga benedìo el tenporàe, ma nissun de luri ze stà bon fermare ’a tenpesta cò ’a ga voesto vegnere.
De chealtri personaji, nominài sora, ghin parlo ’naltra volta.

[torna sopra]