Da Tombazosana (VR)

A vendemare

Par le tre famejone de i Guerra de San Piero de Morubio, setenbre e otobre jera mesi de vendemia: quasi tuti i naséa a vendemare. Solo le mame jera a casa par preparar el magnare; on bel laoro par lore!
Mi, a me mama, ghe jutava in casa e gavéa l’incarico, a le oto e meza de matina, de portarghe la colazion ne i canpi.
Partéa in bicicleta co na sportona de paja piena de magnari: ghera polenta co ’l salado, formajo, un fiasco de vin e uno de late par i buteleti e tanto pan biscoto. Quando rivava mi co tuto sto bendedìo, lori i se lavava le man nel fosso del Canossin e, sentè a l’onbrìa, i magnava de gusto.
Na matina è capità che, a metà strada, co le rue de la bicicleta so’ nà inzima a un sasso grando che no avéa visto; mi, che era carga come un musso, ò perso l’equilibrio e so’ nà a fenire nel fosso. Par fortuna son stà brava a tegner salda la bici co la sporta tacà al manubrio; el magnare l’ò salvà, ma mi so’ nà soto aqua fin in cintura.
M’ò messo a sbrajar; lì vizin ghe staséa na veceta che la m’à jutà a vegner sù; la m’à portà a casa sua, me son lavà co un secio de aqua e a tuti i costi l’à volù darme na còtola par canbiarme. L’era un cotolon nero, longo, paréa na zìngala. Mi l’ò ringrazià e me son invià verso el canpo de vegne co la bicicleta par man. Quando son rivà, i jera tuti preocupè parché era passà massa tenpo da l’orario solito.
Quando i m’à visto co sto cotolon i s’à messo a rìdare come i mati. Mi son restà malè assè, go contà l’aventura e me opà Tano, inveze de farme corajo, el me n’à dito un putiferio; mi me son messa a piànzare, cussì chialtri i rìdéa ancora piassè.
Nonostante tuto, quando penso a chei tenpi, me se struca el cor e vorìa par un poco tornar indrìo; solo par un poco, ah!...

[torna sopra]