|
Editoriale
Par na civiltà de l’amore
Amore de oncò, amore de ieri, amore ’pena passà, amore che ga da rivare, amore grande, esaltà, cantà, sognà, tradìo… amore de mama, de popà, amore senza limiti, altruista, co ’l solo scopo de fare del ben a persone che ghe ne ga de bisogno… El xe na parola che inpina la boca, ma ne la pratica?
 | | Ghe vole anca questo, ma el xe oncora poco. |
No passa giorno che a la radio, a la television, ne i convegni pùblici, ne i cine, al cafè, in uficio, in fàbrica, in fameja, par la strada, in treno… te senti discorsi legeri o profondi che parla de amore, fasendo capire che el xe na roba inportante, che senza amore no se pole vìvare, che solo l’amore pole salvare el mondo, la raza umana, l’anbiente, la Tera, el Creato…
Questo no ’l pole capitare par caso, vol dire che ghe xe el so bon motivo.
Sto mese ghe xe la ricorenza de San Valentino, la festa de chi se vol ben: dapartuto coresini disegnà su i telefonini, so le scàtole de ciocolatini, so i piati in tola e sora la torta al ristorante, so i veri de le màchine infrusinà de smog che fa da lavagna.
De sicuro, anca in sta ocasion, passaremo da l’espression afetuosa de sto nobile sentimento al sbrodolamento che poco ghe someja a l’amore vero. Ghemo l’inpression che, tra on baso e l’atro, no ghe sia mia el tenpo par pensare a na sintesi del sentimento fato de dedizion, de altruismo, de rinuncia par el ben de l’altro e senza domandare gnente.
Questo conferma che ghe xe poco amore e che ne la pi parte de i casi el xe deventà esibizion fisica, fato pi de parole, anca parché semo deventà esigenti e possessivi. “Ti te si mia e basta” se sente dire el pi de le volte; parole che xe fruto de insicureza e de poco conprendonio. Le parole d’amore in sto caso le xe crue e vode, parché la “propietà” la vegnarìa prima de l’altruismo, prima del dare senza pretèndare gnente in canbio.
Alora ga rason quei che dise che, de amore, ghe ne xe anca massa in giro par el mondo. Solo che gran parte no ’l xe vero amore, ma na question de intaresse personale che ghe someja pi a l’egoismo che a l’amore.
De conseguenza, oncò, de amore ghe ne xe poco, parché l’altruismo el xe difìssile, no ’l vien insegnà, e parché semo piassè portà a vardare i propi bisogni individuali pi che a miliorare o conpletare quei de i altri.
El vero amore che vien da na testa che ragiona e che pensa in grande, no ’l ghe someja par gnente a quelo de i moroseti, no ’l xe ossessivo, no ’l xe tragico, el vive de la sodisfazion de aver fato calcossa par i altri e quindi el xe on amore “gioioso”, infinito, lìbero de far girare emozion e pensieri, e no ’l ga gnente da scóndare.
Purtropo, tolto l’amore “evangelico” che provien da i insegnamenti de la religion, la socetà e la cultura de oncò le insegna ben poco in materia de afeti e de sentimenti ch’i xe quei che ne fa vìvare emozion positive, che ne dà la forza par alzarse la matina, che ne juta a fare el nostro loavoro, che ne rende contenti e sodisfà de quelo che semo e che femo.
La scola de la fameja verso i fiòi la xe pitosto poareta o adiritura gnanca la esiste, quando che magari ghe xe la crisi de copia. E gnente de mèjo, quando che l’amore el xe fato de Sms, de Internet, de esenpi televisivi che te mostra amori passionali, intorcolà, ingrejà de tragedie.
Par na civiltà de l’amore ghe vole ben altro!
Soratuto ghe xe necessità de l’“educazione all’amore”, fata de rispeto, responsabilità e libertà. Na educazion che insegna a svilupare tuto el ben che ognuno se porta drento.
Par fare questo bisogna pensare positivo e non védare tuto nero, tuto negativo, non pensare a on presente senza prospetive e senza speranze. No stemo mai desmentegarse che “nessun uomo è un’isola” e che bisogna dare gratis quelo che se dà.
Scrìvare e parlare de amore, dunque, fa ben propio se se vole avere na socetà de l’amore, el solo sentimento che quasi senpre salva la vita, rendéndola mentalmente eterna.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Par na civiltà de l’amore
Amore de oncò, amore de ieri, amore ’pena passà, amore che ga da rivare, amore grande, esaltà, cantà, sognà, tradìo… amore de mama, de popà, amore senza limiti, altruista, co ’l solo scopo de fare del ben a persone che ghe ne ga de bisogno… El xe na parola che inpina la boca, ma ne la pratica?
de Mario Sileno Klein
Ricorense stòriche
Antonio Pigafetta, un aventuriero amante del dialeto
Sinquesento ani fà, ’ntel 1519, partiva el primo giro del mondo in nave, al comando del portoghese Magellano, po’ sostituìo dal nòbile visentin che ga scrito in un misto italian-vèneto la relassion de l’inpresa.
de Giordano Dellai
Da Verona
Par scherzo, ma sul serio!
de Lucia Beltrame Menini
|
