Da Verona

Par scherzo, ma sul serio!

Febraro, febrareto, curto e maledeto… De solito l’è on mese fredo e tristo assè. Forsi l’è par quela che i à pensà de ralegrarlo co ’l carnevale e le so màscare. Cussì, par no farne sentire le buganze e i diàoleti ciapè co ’l fredo, i ne stùzega a zercare ocasion par stare in alegrìa.
Difati… a son ’ncora qua drio rìdare par le vignete o freddure, come le se ciama dal bon, che fa on artista, on prete che el ne presenta el Vangelo par mezo de disegni che i ne fa crepar da rìdare, ma che dopo el spiega seriamente.
Sto personagio – on vecio (ma zóeno!) amico de scola de me fiola, fin dal tenpo del liceo − l’à senpre disegnà caricature de tuti, insegnanti conpresi, soratuto quando le lezion a scola jera più che stufaizze:
“Me piase – dise don Gioba − védar el mèzo goto pien, anziché quelo udo; anca questo l’è un modo par far capire le situazion. Gesù stesso el gavéa on caràtare alegro e on gran senso de provocazion umoristica.”
Noantri no capiremo mai bastanza quanto ben pol fare na ridada: l’è tuta salute.
“Don Gioba”, cussì ghe piase firmarse, el ga zinquatun’ani e l’è paroco de Moniga del Garda (BS-diocesi de Verona). Ogni setimana el pùblica na vigneta co el testo del vangelo de la domìnica e po’ el lo spiega. L’è el so modo speciale, tuto suo personale, par parlare de Gesù:
“Le vignete iè el linguagio che più me piase, fin da quando era pìcolo; mi era un buteleto timido da mati. M’à senpre piasùo védar el lato ironico de la vita. Anca a Gesù ghe piaséa doparare imàgini… el parlava in parabole e el gavéa on gran senso de la provocazion: insoma el faséa el serio… scherzando. La reson de i me disegni l’è questa. El Vangelo ne juta a guardare la vita, ridendo seriamente anca in mezo a i problemi.”
A sto punto ghe dimandemo a don Gioba quala l’è la vigneta che ghe piase de pi: “Amo la vignetta in cui ci sono tre pie donne con gli occhialini scuri in 3 D. Una chiede: − Cosa c’entrano questi occhialini – e l’altra risponde: − Perché è stato lui a dirci che sarebbe risorto in tre dì.”
La pol parere na boutade, na bojada, ma sta vigneta la vol provocarne a pensare a la Ressurezion come a calcossa de novo, de gnancora mai visto. Comunque, anca par don Gioba, la vita no l’è quela che se leze su i blog o che se vede a la publicità, ’ndo’ che ghè solo na bela fameja che fa sorisi… de plastica! Le fameje vere, quele che don Gioba l’incontra da pàroco, le va avanti tute, ci pi ci manco, incontro a la fadiga del vìvare. Ma se, a olte, la vita la deventa piassè dura, anca na vigneta la pol jutarne a sperare che la canbia in mèjo.
Ve confesso che mi go n’amirazion speciale par don Gioba; me lo rivedo girare par casa da studente, curioso de tuti chei trabìcoli de la mania de colezion che gavéa e go ’ncora in casa mia. In più, ve digo, in confidenza, che don Giovanni Berti el m’à fato on regalo grando assè, faséndome i disegni par el me ultimo libro in dialeto Fòle da sognare.
Disìme se l’è poco! Se volì savérghene de pi, digitè gioba.it

[torna sopra]