Zente de Padova

Bernardino Tomitano

Bernardino Tomitano el xe nato a Padova nel 1517. No steme domandare el giorno e el mese parché no lo sò; no so’ riussìo a saverlo anca se go consultà libri e internet. El xe nato da na fameja originaria da Feltre, e questo xe quanto so’ riussìo a savere su de lu.
El ga frequentà l’Università de Padova ne i corsi de filosofia e medissina e el se ga laureà in tute dó ste dissipline nel 1535. Se fazì i conti el gaveva ’pena 18 ani.
Su sto personagio padovan podarìa doparare paroloni difìssii e citassion latine. Invesse vorìa contarve in modo sènplice cossa ch’el ga fato, chi ch’el xe stà. Posso dirve che el xe stà un letarato e filosofo. A un dato momento de la so vita el ga fato anca el medico.
Ma tornemo al prinsipio. Nel 1539 el xe stà incaricà dal Senato Veneto a lèzare l’“Organon” de Aristotele a la “Scuola di Logica” de l’Università de Padova. Incarico che el ga tegnù fin al 1563.
Nel stesso ano no ’l xe riussìo a otegnere la càtedra de “ordinaria filosofia” senpre a l’Università de Padova e, incavolà, el ga lassà la sità e el se ga trasferìo a Venezia, dove che, come a go dito, el ga praticà la profession de medico, e co sucesso.
Nel periodo che el xe stà a Padova el ga ’vudo raporti de amicissia co Sperone Speroni, Pietro Bembo, Jacopo Sadoleto, Paolo Giovio, Bernardo Navagero, Girolamo Fracastoro e Aldo Manuzio. I xe nomi de letarati o personagi de cultura. El ga anca fato parte de “l’Accademia degli Infiammati”. In sta academia se sercava el modo de scrìvare “compiutamente” in lingua italiana e in lingua veneta. La frequentassion e le discussion fate in sta academia le xe a la base de i so “Quattro libri della lingua thoscana”. El ga scrito anca de le dissertassion matematiche: nel 1550 el “Moisè-Geometria” co la quale el dimostra la giustessa del teorema intuìto dal profeta ebreo Moisè che dize “due rette possono avvicinarsi all’infinito senza mai unirsi” e nel 1551 la “Introductio Cosmographiae” che xe lession de geometria a fondamento de la cosmografia tolemaica.
Nel 1554 el ga vudo na rogna no da poco. El “Santo Uffizio Veneto” lo ga acusà de eresia par na òpara letararia messa in giro nel 1547 a so nome co ’l titolo “Espositione letterale del testo di Mattheo Evangelista” che gera la tradussion de la parafrasi de Erasmo da Rotterdam del Vangelo secondo Matteo. Bernardino Tomitano el xe riussìo a dimostrare co dó scriti che sta òpera no gera sua, che lu no ghe ne saveva gninte, ma fata da un “nobile signore N., con cui era assai famigliare”. I ghe ga credùo e i lo ga assolto. Però da chel momento el xe stà ’tento a no ’ndar fora “dal seminato”.
Go dito che nel 1563 el se ga trasferìo a Venezia insieme co la fameja e là el ga fato el medico, continuando a scrìvare libri. Tra le òpare più inportanti xe stà el “De morbo gallico” in dó libri e el carme “Thetis” fato in onore a Enrico III de Francia che nel 1573 el gera anca re de Polonia. El ga scrito anca la biografia de Astorre Baglioni, mai pubblicà.
Fra le robe che no so’ stà bon a savere sul nostro consitadin xe quando che el xe tornà a Padova dove che nel 1576 el xe morto.
Contà cussì, sto omo no ’l pararìa tanto inportante, ma invesse el xe stà un valente letarato, tanto che el Comune de Padova ghe ga intitolà la strada.

[torna sopra]