|
Editoriale
Sta’ ’tenta, cara dona…
Xe ben che te diga ’ncora na volta quelo che penso e soratuto te racomando de… star sù co la recia, parché le moine e la confession che l’omo te farà l’8 de marzo, no le xe propio sincere, anca se fate a base de mimosa, al lume de candela e biceri de champagne.
A pare propio che sto mese de marzo el sia quelo giusto par dire pan al pan e vin al vin: la Giornata Internazionale della Donna, de solito ciamà Festa della Donna, la xe na ricorenza che dovarìa ricordare sia le conquiste sociali, politiche e economiche de le done e sia le discriminizion e le violenze che ancora le patisse in tante parte del mondo.
On poco a la volta, però, la Festa della donna la ga perso el significato originario de lota e de protesta, deventando na festa de tipo comerciale: le done ghe ne aprofita par torse na giornata o na sera de libertà da passare co le amiche, e i òmani i svoda negozi par cronpare regalini e fiori zali par lore.
Eco, de questo e de altro vorìa parlarte, cara la me dona, par védare se te riessi a desgatejarte fora da sto ingrejamento de usanze e de conceti de oncò, che i fa pi male che ben a la vita de tuti i giorni, parché man man che passa i ani, se ga visto che la Festa de la Dona la mete a posto ben poco.
Alora, dato che el momento el xe delicato, a taco co ’l ricordarte che có se vole fare strada e magari fare strada insieme a l’omo, no se pole mia ’verghe massa canarine par la testa. Par carità: a jera ora che l’omo el te molesse la caveza, ma me pare che a te te si messa a córare on fià massa forte, co la scusa che, ’bàndonà le còtole, te te senti a caval de le braghe.
A te capisso: ti te disi che oramai te riessi a cavàrtela da sola, ma sta’ ’tenta, parché ghe vole poco a nare a ramengo: anca ti de le volte a no te si mia farina da fare ostie.
Ti a te lo sè che te si necessaria: par l’omo, la fameja, la socetà civile, el mondo del laoro, la politica, el volontariato, l’arte, la sienza… Te si come l’aria che respiremo, le stajon che no ghe xe pi, el mèjo giardin ’torno casa… Te na parola sola, la confusion de i ruoli tra omo e dona la xe granda, ma el mondo intiero el ga bisogno de ti, cara la me dona! De ti, senza tante canarine par la testa, co le braghe o co la còtola, vestìa o senza veli però al posto e al momento justo, e no par mostrare le to grazie davanti a l’ocio boaro del Grande Fratello. Ghe vole na s-cianta de retegno!
Guai al mondo che te te meti in mente de alzare la cresta! Te ghè da rèndarte conto che ti te vali in quanto dona e no in base a quelo che te si rivà a fare al posto de l’omo.
Xe pur vero che, almanco qua in Ocidente, la vita de la dona la xe canbià: la ga on laoro fora casa; economicamente la xe pi indipendente; la pole far de manco de sposarse e restare single; la pole parfin vìvare la so sessualità senza catarse… conpromessa; la lege ghe consente de decìdare se e quando deventare mama… Ma par avere questo, la ga pagà el dazio: la ga perso un poca de la so spontaneità, la xe costreta a èssare senpre pinpante, a mostrare che la xe bona de fare la dona de casa e anca de fora casa, senpre bela, senpre zóvane, a la moda, sinpàtica, dolze, morbinosa, materna… Insoma la xe senpre drento te chela gabia che par sècoli la ga tegnù l’omo.
Sicome te vojo ben, te racomando la prudenza; ricòrdate che l’omo no ’l xe onipotente e che el riscato de la to dignità el ga da passare senpre traverso l’amore e el rispeto. E fa de tuto parché el lo inpara anca l’omo. Varda ’vanti, vòjeghe ben a la to libertà, purché no la te porta in òrbita massa distante dal pianeta de la to vita, e se te sfiora on sentimento de maternità, ciàpelo al volo, parché quela te poi vantare de poderla fare ti e solamente ti!
E ti, caro omo, ricòrdate che el to futuro e quelo de l’universo i passa senpre e solo traverso la dona!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Sta’ ’tenta, cara dona…
Xe ben che te diga ’ncora na volta quelo che penso e soratuto te racomando de… star sù co la recia, parché le moine e la confession che l’omo te farà l’8 de marzo, no le xe propio sincere, anca se fate a base de mimosa, al lume de candela e biceri de champagne.
de Mario Sileno Klein
Da Verona
Emilio Salgàri
e la maledission de fameja
de Mirco Castellani
|
