|
Dal Basso Venezian
Lavarse?
E chi se lavava in chei tenpi? Ah, sì… le man, la facia. Ma de le man, sol che la ponta de i déi e de la facia, ’pena ’pena i oci. No se spiegarìa, senò, come so la fronte, vissin a i cavéi, so le rece e in mezo a le brancaje de le man, se ignarasse la rufa. “Làvate chea rufa!” te te sentìi dir da to mare e da to pare. No te ghe badài propio tanto finché i te lo diséa lori, ma có ’l te lo diséa on foresto, te paréa de stranio. Mi vegnéa rosso come on pito par la vargogna. Voléa dir che la rufa jera deventà cussì ruspia da somejarghe a la scragna. Capitava de le ocasion che te gavéi da lavarte par forsa, come quando se dovéa ’ndar a coalche festa o dal mèdego. E, ’lora, in mezo al vigneto d’istà, in stala d’inverno, co na secia de aqua calda, te tacài a russare. So ’l colo, so i cómi, soto i brassi. In mezo a le ganbe, po’, vegnéa via tanti de chei petoéti che no finìa pi. No parlemo de i piè, paréa de gratare formajo. Có se lavàimo in stala, ne tocava tegnerse vizin ’a forca. ’Pena che vedéimo na vaca alzare ’a coa, ghe dàimo na sponciada co i bràncoi e quea se tegnéa i bisogni drento finché finìimo de lavarse. ’Lora bisognava spessegare. Imainarse! Có le pissava, la paréa na cascata. Schici dapartuto. Coalche ecession se podéa farla se vedéimo che ’l culo se verzìa par fare na boassa dureta. ’Lora sercàimo de indovinar dove che la podéa cascar e metéimo soto na forcà de paja. Na olta che jera drio lavarme, go tacà a sigare: “Mare, porta ’nantra secia de aqua!” Na vaca la gavéa molà dó-tre peade par netarse na òngia dal leàme. On tòco el jera pionbà drento in te ’a secia che me lavava.
Coalche olta doperàimo el saon. El paréa on tòco de piera maron, fruà so i cantoni. Lo faséimo noantri in casa co la soda caustica e i scarti de le vache copàe de contrabando. Vegnéa fora de chei tòchi bislachi co i ossi mal desfài che te sponciava la pèle.
Le fémene, co le se lavóva, le jera tuto un mistero. Le se inciavava, po’ le ’ndava, de scondon, in te ’l fosso co on fagoto. Daspò, drio casa, te catài on mastèo de pèsse co de le cordele che mi no capìa cossa che le fusse.
− Mare, cossa zea sta roba? − ghe go domandà na olta.
− Sbòtega de tosato! – me dise éa, secà. – Cossa vutu saver ti? Córi via! Va’ a zogar!
E la pajola, soto a i cavéi? Par un bel tòco la stava chiéta, po’ la scominziava a farse viva. Na gratada co le onge, oni tanto, e se faséa finta de gnente. Ma co ’l tenpo, la spissa deventava granda. Te te inpiantài le onge in testa e te tirài fora svanghetàe de rogna. No ghe mancava altro che se ignarasse i peòci. ’Lora te tocava ’réndarte. Petene in man, testa in zo e mezora intiera a gratare. On lèvaro de pajola par tera. A sòea volta che invidiàimo quei in piassa.
Le fémene co i cavéi longhi, dopo spajolàe, le se lavava co na ’issieta lisiera parché no i restasse inpetài, po’ le se resentava co aqua e aséo. Noantri, co i cavéi curti, na petenada in pressa e via!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Sta’ ’tenta, cara dona…
Xe ben che te diga ’ncora na volta quelo che penso e soratuto te racomando de… star sù co la recia, parché le moine e la confession che l’omo te farà l’8 de marzo, no le xe propio sincere, anca se fate a base de mimosa, al lume de candela e biceri de champagne.
de Mario Sileno Klein
Da Verona
Emilio Salgàri
e la maledission de fameja
de Mirco Castellani
|
