| de Vittorio Ingegneri-Dinerio |
|
Le storie de Dinerio
Magnari veci
− Ciò, barba, dame reta na s-cianta che stavolta a ocio me so’ inbalsà t’un paro de quarèi sghenbi fora squara.
− Mariavèrgola! Sito inbalorsìo o gheto le ganbe salèche? So’ qua tuto rece, dài va’ ’vanti ca te scolto.
− Marti matina de la stimana passà me so’ catà al Centro Gioto par raquante spesete de menucaja. In t’un vòltala e ménala me xe scanpà via la matinada. Me so’ inacorto che gera un bòto passà parché sul vegnere volta go visto la coa al “Spissego”. Dovendo ’ndare a lession a le dó e meza, go pensà de fermarme anche mi, torme na pisseta al tajo e un bicer de bira e cussì go fato. Sentà in fianco de mi pascolava a la sbafarona dó ansianoti da ’e parense bagolone che tra un bocon e l’altro se cuntava le so robe, vardàndose par tèndare le borse de la spesa, co quel giro de smàfari da le man sguelte che vorìa farse la ponga là drento. Mi go pensà che se no i vegnéa da la Mira i vegnéa dal Tajo parché l’acento gera propio quelo.
“Asto visto, pare, có xe l’ora del màstego ogni grupia vien bona par far marenda?”
“Credo ben, co la mòcola che s’à tirà drio tuti sti foresti che xe rivài qua” (puntando el déo verso la zente in fila), “xe custion de mode moderne, ma tuto somà, me toca despartirme da la me opinion parché sto tiramola ca so’ drio gramolare el s’inpasta cussì ben in boca che ’l sbrissa zo gualivo cofà tante sculieràe de cìnciari.”
“Tasi ca so’ drio licarme i bafi anca mi, dài valà, pare, (alsando el gomio naturalmente) ca mazemo ’naltro turco, ca se ciava l’avarissia e tuti i despiasseri de sto mondo! Uncò ghe semo e doman chi lo sa!” Gheto sentìo, barba, che rassa de rajonamenti svanpìi come la graspìa t’un fiasco sensa surlo? Secondo ti cossa ghe centra i turchi co quel litro de moro che i s’à fato fora in t’un bàtar d’ocio, parando basso un strangoloto de pissa?
− A oci vardare de strisso, no ghe sarìa granché da desbrojare te quei discursi, basta saver incamesare puìto le franze co la pietina. Me despiegarò mèjo. Sirca l’invito a massare un turco, posso dirte che gera na espression tìpica venessiana de un tenpo. I se la baratava i fachini in porto a Venessia có ghe vegnéa voja de bagnarse la boca prima de alsare el gomio al banco de l’ostarìa. Questo farìa crédare che i fusse dó venessiani da la tera crea come ca te ga pensà ti. Pa ’l resto invesse go calche dubio su la so proveniensa e te dirò parcossa. Có gero bocia mi la miseria staséa de casa da le nostre bande e to nona, bonànema, par tegnerne chieti tuti co le buele in bróntolo la diséa: “Tusi, volìo ca femo i manài?” La gera na menestra poareta che ogni tanto se sorbìa de gusto par lo più d’inverno dopo copà el mas-cio. Un sbrodacio pelagroso fato suso broando co un fià de desfrito, te la ramina picà al camin, un osso de porselo, un pugneto de fasòi messi in moja par tenpo e un corezin de verza tajà fina co quatro grani de sale. Có el brodo gera pronto, invesse de butar zo i subioti, se ghe zontava dasin dasieto calche pìssego de farina zala ben tamisà, menando puìto co ’l méscolo sinò se faséa i munari. Dopo na ventena de minuti i manài gera pronti da inmenestrare te i piati. Sicome la sghissa gera senpre retrata, cadéa passientare na s-ciantinela che la scòcia te la fondina fesse la so bela telarina veludà par dessora prima de calarse drento co ’l sculiero, sinò se coréa el ris-cio de vessigarse i sbàrbuli e tuto l’ingiotauro. Eco, caro Lalo, quei cinciarini che zagolando ga tirà fora uno de quei dó tachetoni rivieraschi inserti che te gavéi sentà in parte no xe altro che el menestron ca t’ò pena spiegà. Altro che i lo ciamava cussì, me pare, te le basse visentine. Invesse zo in Polésine e anca tel Cavarzeran ’ndaséa de moda i pàpari, batizài malafanti ’torno el Rovigoto Alto. Pènsate che quando to nona ne pareciava sto golosesso de i miràcoli mi staséa ’tento un fraco, me ricordo ’ncora ’desso, de no sbrissare tel pàndare, co gnissun, parché me vergognava de portar fora le miserie de casa nostra.
− No te scanpa propio gnente a ti, barba, gnanca un gran de pévare ben inscartossà de velina. Cossa goi da dirte alora, pì che un grassie sodisfà?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Sta’ ’tenta, cara dona…
Xe ben che te diga ’ncora na volta quelo che penso e soratuto te racomando de… star sù co la recia, parché le moine e la confession che l’omo te farà l’8 de marzo, no le xe propio sincere, anca se fate a base de mimosa, al lume de candela e biceri de champagne.
de Mario Sileno Klein
Da Verona
Emilio Salgàri
e la maledission de fameja
de Mirco Castellani
|
