Da Ponzano Veneto (TV)

Le done de le giostre

Me mama co dó me sorele.

Me mama a la cassa del scoter-autoscontro, con la mimosa a farghe festa.

A cavalo de l'oto de marso, co la me giostra se ’ndava a Valdobiadene parché ghe gera la Sagra de San Gregorio, el me scoter-autoscontro vegneva postà co le altre atrassion in Piassa Marconi, davanti a la cesa. Se ’rivava de matina bonora e dopo ’ver spartìo el logo in maniera che tuti gavesse el spiasso che ghe spetava, i òmeni tacava a montar el so esercissio, e le done, vece o zóvani che le fusse, se dava da far par desbrigar le solite inconbense.
No la gera de serto fàssile la vita de ’ste tose, mujer, mame, none che spartiva la so esistensa co i giostrài; se parla de i ani Sinquanta/Sessanta, có ghe gera par tuti ancora tanti problemi a sbarcar el lunario, ma el gusto del vìvar, la voja de alegressa e de far no mancava de serto. La prima funsion de ’ste fémene gera quela de catar l'aqua, e no gera ’na inpresa da poco. Po’ le ghe stava drìo anca a le carte, nel senso de burocrassìa, e a le spese; me ricordo in particolar me mama ’ndar in Comune par i permessi, ’ndar ne la scola par dirghe a le maestre che sarìa rivà novi scolari, ma solo par pochi dì; la faseva de seguito el giro de le boteghete par cronpar quel che ghe ocoreva e tuto in abondansa, parché i òmeni, fenìo de montar sù le giostre, i gaveva ’na fame orba.
Le gera brave a rangiarse a far tuto ’ste done, come par esenpio cusinar in loghi pìcoli e par tanti: marìo, fiòi, operai, ma le se inzegnava; tante volte le se conbinava fra lore par preparar da magnar par tuti e mi picenin gavevo gusto a védarle tute indafaràe a far i gnochi, menar polenta, rostir costesine, lugàneghe, polame, inpastar frìtole... insieme a i cugini de la me età, e se gera tanti, parché oltre a nassar ’na mucià de putèi, gèrimo anca quasi tuti inparentài, ’ndavo a torsio da rente a i foghi ne la speransa che cascasse calcossa de bon da métar soto i denti. Có tuto gera pronto le ciamava i òmeni, a catahar, che secondo el nostro dir sarìa a magnar, le sigava talmente forte che pareva de èssar a un rancio militar, có el sergente ciamava i soldài e la tronba sonava. El tenpo del disnar gera sacro, parché oltre a tirarse sù de suste el gera anca el momento par far el punto de la situassion, par far pati, comodamenti, progeti; le discussion no mancava e le gera radegose, ma ghe pensava le done a métar tuto a posto e le maniere no gera senpre dolse, parché ’ste fémene gera forte e de caràtere; no gera raro che le menasse anca le man.
Có vegneva l'ora de far ’ndar le giostre, tuti gaveva la so funsion, done conprese, me mama, tanto par dir, stava a la cassa, oltre a vèndar i getoni e tirar sù i schei, da la cassa, punto de osservassion special, la tegneva de ocio la giostra e anca tuta la zente che faseva calca e se spentonava par montar; no bastasse, la meteva sù i dischi co le canson in voga, par far ’ndar la musica e dar fià a le tronbe che par tuto el santo giorno gavarìa rintronà grandi e pìcoli co un batamento e un tal bacan, che faseva s-ciopar el sarvèo, ma nissun se lagnava. Le tose più zóvani e scaltre le stava sul barsalio o tiro a segno a bacajar o mèjo a sberegar co vose resoluta par tirar da le sue i tosati, parché i vegnesse a zogar co bale de pèssa par butar zo bussoloti o tirar de s-ciopo; le prometeva gran regali par chi vinseva, regali che podeva èssar: botiliete de vermouth, piagoloti, simioti de pelo, balete de pano a spìgoli zali, rossi, verdi e blè piene de segaura, o mèjo de tuto pipe de legno tute lavoràe e intarsiàe. Le putelete su i diese o dçdese ani le stava a tèndar el bancheto del sùcaro filà, postà da rente a quelo de so mame che vendeva paste, tira mola, pevarini, gorissie, spumilie, ciuci e bonboni. Tuto feniva a la sera tardi e tacava da novo al dopodisnar drìo, ma el da far de le done scumissiava la matina ’pena che se alsava el sol, no le gaveva mai un menuto de ben.
Qualche ano fà me xe capità de ’ndar a Valdobiadene e par caso me so’ inbatùo proprio ne la Fiera de San Gregorio, ne la Piassa Marconi no ghe gera più le giostre, ma ’na mostra-marcà de atressi agricoli, in casete de legno vegneva dà da bévar proseco e da magnar pan co sopressa, salame, formajo; le giostre se gera postàe poco distante, de banda a ’sta piassa. Cussì, sia par curiosità, sia par védar de catar qualche parente so’ ’ndà a torsiolar un poco là in mezo, e se le atrassion gera de ultima generassion e le carovane più atressàe e più grande de un apartamento, go visto le done far le stesse robe che le faseva có gero picenin mi, co la difarensa che, cascando l'oto de marso, tute gaveva ’na bela pianta o un masseto de mimosa a farghe festa.

[torna sopra]